మహా లింగ శివస్తుతి - Maha Linga Stuthi

https://youtu.be/IzV4NlwhPjs

🕉 Watch బ్రహ్మ, ఋషుల, దేవతల మహా లింగ శివస్తుతి - Maha Linga Stuthi 🕉

🌹🌹🌹🌹🌹

శ్రీ కార్తీక పురాణం 5వ అధ్యాయం వనభోజన మహిమ, కిరాతుడు (Kartika Puranam, Chapter 5: Vanabhojanam) (Youtube Video)

https://youtu.be/9iok9X3VZpk

🌹 5. శ్రీ కార్తీక పురాణం 5వ అధ్యాయం వనభోజన మహిమ, కిరాతుడు, మూషికుని పాపవిముక్తి
Sri Karthika Puranam Chapter 5 The Glory of Vana Bhojana, the Salvation of Kirata and the Mooshika 🌹


ప్రసాద్ భరద్వాజ

Like, Subscribe and Share


🌹🌹🌹🌹🌹

కార్తీక పురాణం - 5 వ అధ్యాయము : వనభోజన మహిమ (Karthika Puranam - Chapter 5: Vanabhojanam)

https://www.facebook.com/groups/chaitanyavijnanam/posts/2310517633068038

🌹🪔 కార్తీక పురాణం - 5 వ అధ్యాయము : వనభోజన మహిమ, కిరాత మూషికములు మోక్షము నొందుట. 🪔🌹
✍️ ప్రసాద్ భరద్వాజ


ఓ శివధనుస్సంపన్నా! జనకరాజా! శ్రద్దగా విను. మనము చేసిన పాపాలన్నింటినీ- నశింపచేయగల శక్తి ఒక్క కార్తీక మాస వ్రతానికి మాత్రమే వుంది. కార్తీకమాసములో విష్ణుసన్నిధిని ఎవరయితే భగవద్గీతా పారాయణమును చేస్తారో - వారి పాపాలన్నీ కూడా పాము కుబుసములాగా తొలగిపోతాయి. అందునా పదీ - పదకొండు అధ్యాయాలను పారాయణ చేసేవారు - వైకుంఠానికి క్షేత్రపాలకులవుతారు.

ఎవరయితే కార్తీకమాసంలో తులసీదళాలతోగాని, తెలుపు లేదా నలుపు గన్నేరు పూలతో గాని విష్ణుపూజను చేస్తారో -వాళ్లు వైంకుఠానికి చేరి, విష్ణు సమభోగాల ననుభవిస్తారు. ఈ కార్తీకమాసంలో హరిహరులెవరి సన్నిధినైనా సరే - ఏ పురాణాన్నయినా సరే ప్రవచించేవారు సర్వ కర్మబంధ విముక్తులవుతారు.


🌻. కార్తీక వనభోజనము

శ్లో" యః కార్తీకే సితే వనభోజన మాచరేత్
సయాతి వైష్ణవం ధామ సర్వపాపైః ప్రముచ్యతే !!

కార్తీకమాస శుక్లపక్షంలో వనభోజనము చేసినవారు - పాపవిముక్తులై విష్ణుధామాన్ని పొందుతారు. జప, హోమ, పూజా, భోజన, తర్పణ ఫలాలతో - పాపీ క్షుద్ర ఛండాలాది అశౌచవంతుల యొక్క సంభాషణలను వినిన పాపం తుడిచి పెట్టుకు పోతుంది. కాబట్టి మహారాజా! కార్తీకమాస శుక్లపక్షంలో అన్నిరకాల వృక్షాలతో బాటుగా ఉసిరిచెట్టు కూడా వున్న తోటలోనే వనభోజనమును ఏర్పాటు చేసుకోవాలి. ఉసిరి చెట్టు క్రింద సాలగ్రామము నుంచి, గంధ పుష్పాక్షతాదులతో పూజించి, యధాశక్తి బ్రాహ్మణుల నాహ్వానించి గౌరవించి, వారితో కలసి భోజనము చేయాలి. ఇలాగున - కార్తీక మాసములో వనభోజనాన్ని యెవరయితే నిర్వహిస్తారో, వాళ్లు ఆయా కాలాలలో చేసిన సర్వపాపాల నుంచీ తెములుకుని, విష్ణులోకాన్ని పొందుతారు.

జనకజనపతీ! ఈ కార్తీక మహాత్మ్యాన్ని భక్తిశ్రద్ధలతో విన్న బ్రహ్మణుడొకడు దుర్యోనీ సంకటము నుంచీ రక్షింపబడ్డాడు. కథ చెబుతాను విను.


🌻. దేవదత్తో పాఖ్యానము.

పూర్వం కావేరీ తీరములో దేవశర్మ అనే సద్భ్రాహ్మణుడు ఉండేవాడు. అతనికొక పరమ దుర్మార్గుడయిన కుమారుడు కలిగాడు. అతని పేరు దేవదత్తుడు (శివశర్మ). అతగాడి దుష్ట ప్రవర్తనలను గుర్తించిన తండ్రి, అతగాడిని పాపవిముక్తుని చేయాలని సంకల్పించి 'నాయనా! రోజూ కార్తీక ప్రాతః స్నానాన్ని ఆచరించు. సాయంకాలమున హరి సన్నిధిలో దీపారాధనమును చేస్తూ వుండు. ఈ విధంగా కార్తీక వ్రతాన్ని ఆచరించి ధన్యుడివికా' అని చెప్పాడు. కాని దుర్వర్తనుడయిన ఆ బ్రాహ్మణ పుత్రుడు - తానటువంటి కట్టుకథలను నమ్మననీ, కార్తీక వ్రతాన్ని ఆచరించననీ - తండ్రికి యెదురుతిరిగాడు. అందుకు కినిసిన దేవశర్మ తన కుమారుడిని 'అడవిలోని చెట్టు తొర్రలో యెలుకవై పడివుండు' అని శపించాడు. శాపానికి భయపడిన ఆ విప్రకుమారుడు తండ్రి పాదాలబడి, తనకు తరణోపాయం చెప్పమని కోరగా - ఆ తండ్రి ' నాయనా ! నీ వెప్పుడైతే కార్తీక మహాత్మ్యాన్ని సంపూర్ణముగా వింటావో అప్పుడే నీ యెలుక రూపము పోతుం'దని - శాపవిముక్తి అనుగ్రహించాడు.


🌻. దేవదత్తునికి శాపవిముక్తి:

పితృశాప కారణంగా అప్పటికప్పుడే మూషికరూపాన్ని ధరించిన బ్రాహ్మణ యువకుడు గజారణ్యములో ఫలవంతమైనదీ - అనేక జంతువుల కాధారభూతమైనదీ అయిన ఒకానొక మహావృక్ష కోటరములో మనసాగాడు.

ఇలా కొంతకాలము గడిచాక, ఒకానొకప్పుడు మహర్షియైన విశ్వామిత్రుడు శిష్య సమేతంగా కార్తీక స్నానమాచరించి వచ్చి, ఆ యెలుక వున్న చెట్టు మొదలునందు దువిష్ణుడై తన పరివారానికి పరమపావనమైన కార్తీక మహాత్మ్యాన్ని వినిపించసాగాడు.

ఆ సమయంలో దయాహీనుడూ, పాపాలపుట్టా, అడవి జీవాలను హింసించి పొట్టపోసుకునేవాడూ అయిన ఒక కిరాతకుడాప్రాంతాలకు వచ్చాడు. పుణ్యపురుషుల దర్శనమువల్ల ఉపకారమేగాని, అపకారము యేనాడూ జరుగదు. అదేవిధముగా, విశ్వామిత్రాది తపోబృంద దర్శనమాత్రం చేత - రవంత పశ్చాత్తప్తుడూ - జ్ఞానీ అయిన ఆ కిరాతకుడు వారిని సమీపించి 'అయ్యా ! మీరు చెప్పుకుంటున్న కథలేమిటి? అవి వింటూంటే - నాకీ కిరాతక జీవితం పట్ల చిరాకు పుడుతోంది. దయచేసి ఈ రహస్యమేమిటో చెప్పండి' అనగానే, అతనిలో వివేకం విచ్చుకుంటున్న వైనమును గమనించిన విశ్వమిత్రుడు - 'నాయనా! మేము కార్తీక వ్రతాన్ని ఆచరిస్తున్నాము. ఈ కార్తీక మాసములో యెవరయినా సరే తెలిసిగాని, తెలియకగాని స్నాన దాన జప తపః పురాణ శ్రవణాదును చేసినట్లయితే వారు వారి సర్వ పాపాలనుంచీ విముక్తులవుతారు. ఈ వ్రతాన్ని భక్తితో ఆచరించేవాళ్లు జీవన్ముక్తులవుతారు' అని తెలియజేశాడు.

ఈ విధముగా కిరాతకునికి చెబుతూన్న కార్తీక మహాత్మ్యాన్ని వినడమే తడవుగా - తొర్రలోనున్న యెలుక తన శాపగ్రస్తరూపాన్ని వదలివేసి, పూర్వ యువ బ్రాహ్మణ రూపాన్ని పొంది - విశ్వామిత్రాదులకు ప్రణమిల్లి తన పూర్వవుగాధను వినిపించి, ఆ బుషులనుండి సెలవు తీసుకొని తన ఆశ్రమానికి తరలిపోయాడు. అనంతరము ఆ కిరాతకుడు కూడా విశ్వామిత్రాదుల వలన కార్తీక మహత్మ్యాన్ని కడకంటా తెలుసుకోవడం వలన - ఆ జన్మకి కిరాతకూడయ్యీ కూడా - దేహంతరాన ఉత్తమగతులను పొందాడు.

కాబట్టి ఓ జనకరాజా! ఉత్తమ గతులను కోరేవారు ప్రయత్నపూర్వకముగా నయినాసరే కార్తీక వ్రతమాచరించాలి. లేదా, కనీసము కార్తీక మహాత్మ్యాన్నయినా భక్తి శ్రద్దలతో వినాలి.

ఏవం శ్రీస్కాంద పురాణాంతర్గత కార్తీక మహత్మ్యమందు. పంచమోధ్యాయ స్సమాప్తం.

✍️ ప్రసాద్ భరద్వాజ

🌹 🌹 🌹 🌹 🌹

నవనాగ నామములు నాగుల చవితి (Nava Naga Names - Nagula Chavithi)

https://youtube.com/shorts/eGMbiCA-Og0


🌹 నవనాగ నామములు నాగుల చవితి
Nava Naga Names - Nagula Chavithi 🌹

ప్రసాద్ భరద్వాజ

Like, Subscribe and Share

🌹 🌹 🌹 🌹 🌹

నాగులచవితి పండుగనాడు నిన్ను కొలిచేమమ్మా (On Nagula Chavithi, we worship You, O Mother)

https://youtube.com/shorts/yuXKQRmledE


🌹 నాగులచవితి పండుగనాడు నిన్ను కొలిచేమమ్మా 🌹
🌹 On the festival of Nagula Chavithi, we worship You, O Mother 🌹

ప్రసాద్ భరద్వాజ

Like, Subscribe and Share

🌹 🌹 🌹 🌹 🌹

నాగుల చవితి శుభాకాంక్షలు (Greetings on Nagula Chavithi)

https://www.facebook.com/groups/chaitanyavijnanam/posts/2309480646505070

🌹🐍 నాగుల చవితి శుభాకాంక్షలు అందరికి
Nagula Chavithi Greeting to All 🐍🌹


✍️ ప్రసాద్ భరద్వాజ

నవనాగ నామ స్తోత్రం - సర్ప సూక్తం - నాగ స్తోత్రం (Hymn of the Nine Serpents (Navanāga Nāma Stotram) - Sarpa Sūktam - Nāga Stotram)

https://youtu.be/W7z8M6_6yRo


🌹నవనాగ నామ స్తోత్రం - సర్ప సూక్తం - నాగ స్తోత్రం 🌹

🐍 కలిదోష నివారణకు, సర్వ దోష విముక్తికి తప్పక పఠించ వలసిన స్తోత్రాలు 🐍


🌹🌹🌹🌹🌹

నాగుల చవితి - ఆధ్యాత్మిక ప్రాముఖ్యత - అంతరార్థం - సనాతన ధర్మం చెప్పిన దివ్య రహస్యాలు (Nagula Chavithi – Spiritual Significance) (Youtube Video)

https://youtu.be/Ae803QhCLeE?=si


🌹నాగుల చవితి - ఆధ్యాత్మిక ప్రాముఖ్యత - అంతరార్థం - సనాతన ధర్మం చెప్పిన దివ్య రహస్యాలు
Nagula Chavithi – Spiritual Significance - Divine Secrets Revealed by Sanatana Dharma 🌹


ప్రసాద్ భరద్వాజ


Like, Subscribe and Share


🌹🌹🌹🌹🌹

నాగుల చవితి శుభాకాంక్షలు – సర్పదేవతల విశిష్టత, ఆధ్యాత్మిక రహస్యాలు / Greetings on Nagula Chavithi – The Serpent Deities and Spiritual Mysteries

https://www.facebook.com/groups/chaitanyavijnanam/posts/2309480646505070


🌹🔱🐍 నాగుల చవితి – సర్పదేవతల విశిష్టత, ఆధ్యాత్మిక రహస్యాలు మరియు జీవన పరమార్థం 🐍🔱🌹
🍀 నాగుల చవితి శుభాకాంక్షలు అందరికి Nagula Chavithi Greeting to All 🍀
✍️ ప్రసాద్ భరద్వాజ


భారతీయ సనాతన ధర్మంలో ప్రకృతిలోని సమస్త జీవరాశులను దైవస్వరూపంగా భావించి ఆరాధించడం ఒక గొప్ప సంప్రదాయం. చెట్లు, నదులు, పర్వతాలు, పశుపక్ష్యాదులతో పాటు సర్పాలను కూడా నాగదేవతలుగా పూజించడం మన సంస్కృతిలోని విశిష్టత. అటువంటి పవిత్రమైన పర్వదినమే నాగుల చవితి. ఈ రోజున నాగదేవతలను పూజిస్తూ కుటుంబ శ్రేయస్సు, ఆరోగ్యం, సంతాన సౌభాగ్యం, శాంతి కోసం ప్రార్థిస్తారు. అయితే ఈ నాగారాధన వెనుక ఎన్నో ఆధ్యాత్మిక రహస్యాలు, జీవన సందేశాలు దాగి ఉన్నాయి.


🐍 నాగదేవతలు – దైవచైతన్యానికి ప్రతీకలు

పురాణాలలో నాగులకు విశిష్టమైన స్థానం ఉంది. శ్రీమహావిష్ణువు ఆదిశేషునిపై పవళిస్తాడు. పరమశివుడు నాగాభరణాన్ని ధరించి ఉంటాడు. శ్రీకృష్ణుడు కాళీయ మర్దనం ద్వారా అహంకారాన్ని, అధర్మాన్ని అణచివేసే దైవశక్తిని ప్రదర్శించాడు. సుబ్రహ్మణ్య స్వామివారికి కూడా నాగస్వరూపంతో ప్రత్యేక సంబంధం ఉంది. నాగం అనంతత్వానికి, యోగశక్తికి, ఇంద్రియ నిగ్రహానికి, దైవచైతన్యానికి ప్రతీకగా నిలుస్తుంది. అనంతుడు, వాసుకి, తక్షకుడు, కర్కోటకుడు, పద్ముడు, మహాపద్ముడు వంటి నాగదేవతలను పురాణ సంప్రదాయంలో స్మరిస్తారు.


🍀 మనలోని కాలనాగం – ఆరు అంతర్గత విషాలు

ఆధ్యాత్మికంగా ప్రతి మనిషిలోనూ ఒక కాలనాగం నిద్రిస్తున్నట్లు భావించవచ్చు. ఈ కాలనాగం అంటే కామం, క్రోధం, లోభం, మోహం, మదం, మాత్సర్యం అనే ఆరు అంతర్గత శత్రువులకు ప్రతీక. ఇవి మనిషిలోని సత్వగుణాన్ని హరించి, వివేకాన్ని కప్పివేస్తాయి. కోపం శాంతిని, లోభం తృప్తిని, అహంకారం వినయాన్ని దూరం చేస్తాయి. ఈ ఆరు విషాలను జ్ఞానం, వివేకం, సాధన ద్వారా అధిగమించినప్పుడే మనలో ప్రేమ, కరుణ, సహనం, సమత్వం వంటి దైవగుణాలు వికసిస్తాయి. బయట నాగదేవతను పూజించడంతో పాటు మనలోని ఈ విషస్వభావాన్ని జయించడమే నాగారాధనలోని అసలైన అంతరార్థం.


🥛 నాగులకు పాలు సమర్పించడంలోని ఆధ్యాత్మిక రహస్యం

పాలు స్వచ్ఛతకు, పవిత్రతకు ప్రతీక. పాలు పెరుగుగా, పెరుగు చిలకడం ద్వారా వెన్నగా, వెన్నను కాచడం ద్వారా నెయ్యిగా మారుతుంది. ఈ పరిణామాన్ని మనిషి ఆధ్యాత్మిక జీవితానికి అన్వయించుకోవచ్చు. జీవితమనే పాలను జ్ఞానమనే వేడితో శుద్ధి చేసి, వివేకమనే తోడుతో పరిపక్వత అనే పెరుగుగా మార్చుకోవాలి. ఔదార్యమనే కవ్వంతో చిలికినప్పుడు శాంతి అనే వెన్న లభిస్తుంది. ఆ శాంతికి భగవదారాధన, ఆత్మజ్ఞానం జోడించినప్పుడు త్యాగం, యోగం, సేవాభావం అనే ఉన్నతమైన గుణాలు వికసిస్తాయి. ఇదే నాగులకు పాలను సమర్పించే ఆచారానికి చెప్పుకునే ఒక ప్రతీకాత్మక ఆధ్యాత్మిక వివరణ.

అయితే పాములు సహజంగా పాలు తాగే జీవులు కావు. పాలు వాటికి హాని కలిగించవచ్చు. కాబట్టి నాగదేవతలకు విగ్రహాలు లేదా చిత్రపటాల ద్వారా పూజలు చేసి పాలను నైవేద్యంగా సమర్పించడం మంచిది. నిజమైన పాములకు పాలు పోయకుండా, వాటిని హింసించకుండా ఉండటమే నిజమైన జీవకారుణ్యం.

🙏 నాగారాధన – క్షమాగుణం, అహింస, సహజీవనం

నాగుల చవితి సందర్భంగా పెద్దలు పిల్లలతో ఒక సంప్రదాయ ప్రార్థన చెప్పిస్తారు.


నడుము తొక్కితే నావాడు అనుకో,

పడగ తొక్కితే పగవాడు కాదు అనుకో,

తోక తొక్కితే తోటి వాడు అనుకో,

నా కంట నువ్వు పడకు, నీ కంట నేను పడకుండా చూడు తండ్రీ!


ఈ మాటల్లో ఎంతో గొప్ప జీవన సందేశం ఉంది. ప్రకృతిలోని ఏ జీవినీ శత్రువుగా భావించకూడదు. మనం ఇతరులకు హాని చేయకుండా, ఇతరుల వల్ల మనకు హాని కలగకుండా జాగ్రత్తగా జీవించాలి. మనల్ని బాధించినవారిని కూడా సాధ్యమైనంతవరకు క్షమించాలి. పిల్లలకు ఈ భావాలను నేర్పించడం ద్వారా కరుణ, సహనం, అహింస వంటి సద్గుణాలను పెంపొందించవచ్చు.


🌳 పుట్ట పూజ – ప్రకృతి పరిరక్షణ

సర్పాలు పర్యావరణ సమతుల్యతను కాపాడటంలో ముఖ్యమైన పాత్ర పోషిస్తాయి. ముఖ్యంగా ఎలుకల సంఖ్యను నియంత్రించడం ద్వారా వ్యవసాయానికి మేలు చేస్తాయి. పుట్టలు కూడా అనేక చిన్న జీవులకు ఆశ్రయంగా ఉంటాయి. అందువల్ల పుట్టలను ధ్వంసం చేయకుండా, ప్రకృతిలోని జీవుల నివాసాలను గౌరవించాలి. పుట్ట చుట్టూ బియ్యం, రవ్వ లేదా పిండి చల్లే సంప్రదాయం వెనుక చిన్న జీవులకు ఆహారం అందించాలనే జీవకారుణ్య భావన కూడా ఉంది. ప్రకృతిలోని ప్రతి జీవిని రక్షించడం కూడా దైవసేవలో భాగమే.


🐍 నాగుల చవితి మంత్రం

నాగదేవతలను స్మరిస్తూ ఈ శ్లోకాన్ని పఠించే సంప్రదాయం ఉంది.

కర్కోటకస్య నాగస్య దయయంత్యా నలస్య చ ।
ఋతుపర్ణస్య రాజర్షేః కీర్తనం కలినాశనమ్ ॥

ఈ శ్లోకం మహాభారతంలోని నలోపాఖ్యానంతో సంబంధం కలిగి ఉంది. దీనిని కలిదోష నివారణకు సంబంధించిన స్మరణ శ్లోకంగా సంప్రదాయంలో పఠిస్తారు.


🪔 ఆదిశేషుడు, కుండలినీ శక్తి – యోగరహస్యం

ఆదిశేషుడు అనంతత్వానికి ప్రతీక. సమస్త నామరూపాలు మారిపోయినా మిగిలి ఉండే పరమసత్యాన్ని ఆదిశేష తత్త్వం ద్వారా ప్రతీకాత్మకంగా దర్శించవచ్చు. అలాగే యోగశాస్త్రంలో మూలాధార చక్రం వద్ద నిద్రాణంగా ఉన్నట్లు వర్ణించే కుండలినీ శక్తిని చుట్టలు చుట్టుకున్న సర్పంతో పోలుస్తారు. ధ్యానం, ప్రాణాయామం, మంత్రోపాసన, ఆత్మవిచారణ వంటి సాధనల ద్వారా సాధకుడు తన అంతర్గత చైతన్యాన్ని ఉన్నత స్థాయికి తీసుకెళ్లడానికి ప్రయత్నిస్తాడు. ఈ నాగస్వరూపం మనలో నిద్రాణంగా ఉన్న ఆధ్యాత్మిక సామర్థ్యాన్ని గుర్తుచేస్తుంది.


🐍 నాగుల చవితి – మనం తెలుసుకోవలసిన జీవన పరమార్థం

నాగుల చవితి కేవలం సర్పాలను పూజించే పండుగ మాత్రమే కాదు. ప్రకృతిని ప్రేమించడం, జీవుల పట్ల కరుణ కలిగి ఉండటం, మనలోని ఆరు అంతర్గత విషాలను తొలగించుకోవడం, ఆత్మచైతన్యాన్ని తెలుసుకోవడం వంటి ఉన్నతమైన విలువలను బోధించే ఆధ్యాత్మిక పర్వదినం.

బయట ఉన్న నాగదేవతను పూజించడం భక్తి అయితే, మనలోని విషస్వభావాన్ని జయించడం సాధన. ప్రకృతిలోని ప్రతి జీవిని ప్రేమించడం ధర్మం అయితే, సమస్త జీవుల్లోనూ ఒకే పరమచైతన్యాన్ని దర్శించడం ఆత్మజ్ఞానం.

మనలోని కాలనాగం శాంతించి, హృదయంలో ప్రేమ, కరుణ, జ్ఞానం వికసించినప్పుడే నిజమైన నాగారాధన పరిపూర్ణమవుతుంది. ఇదే నాగుల చవితి మనకు అందించే మహోన్నతమైన సనాతన ధర్మ సందేశం!


🐍 సర్వేజనా సుఖినో భవంతు! 🐍

🌹🌹🌹🌹🌹




🌹 Watch నవనాగ నామ స్తోత్రం - సర్ప సూక్తం - నాగ స్తోత్రం 🌹
🐍 కలిదోష నివారణకు, సర్వ దోష విముక్తికి తప్పక పఠించ వలసిన స్తోత్రాలు 🐍


https://youtu.be/W7z8M6_6yRo

🌹🌹🌹🌹🌹

శ్రీ కార్తీక పురాణం 4వ అధ్యాయం దీపారాధన మహిమ (Sri Karthika Puranam - Chapter 4 - Deep Aradhana)

https://youtu.be/tLWmBRb7fPw

🌹 4. శ్రీ కార్తీక పురాణం 4వ అధ్యాయం దీపారాధన మహిమ
Sri Karthika Puranam Chapter 4 Glory of Deep Aradhana 🌹

ప్రసాద్ భరద్వాజ

Like, Subscribe and Share

🌹🌹🌹🌹🌹

కార్తీక పురాణం - 4 వ అధ్యాయము : దీపారాధన మహిమ, శతృజిత్ కథ (Kartika Puranam - Chapter 4: The Glory of Deeparadhana (Offering Lamps))

https://www.facebook.com/groups/chaitanyavijnanam/posts/2309471699839298

🌹. కార్తీక పురాణం - 4 వ అధ్యాయము : దీపారాధన మహిమ, శతృజిత్ కథ. 🌹
ప్రసాద్ భరద్వాజ

🌹🪔 Kartika Puranam - Chapter 4: The Glory of Deeparadhana (Offering Lamps) and the Story of Shatrajit. 🪔🌹
Prasad Bharadwaja


జనకుడు అడుగుతున్నాడు: "హే బ్రహ్మర్షీ ! నువ్వింత వరకూ కార్తీక మహాత్మ్యాన్ని అసాధారణ ధోరణిలో చెప్పావు. అయితే ఏ సంకల్పంతో యీ వ్రత మాచరించాలో - ఏయే దానాలు చేయాలో కూడా తెలియజేయి."

వశిష్ట ఉవాచ: అన్ని పాపాలనూ మన్ను చేసేదీ, పుణ్యాలను అగణ్యాలుగా మార్చేదీ అయిన యీ కార్తీక వ్రతానికి ఫలానా 'సంకల్పము' అనేది హాస్యాస్పదమయిన విషయము.

ఈ కార్తీక వ్రతం ఆచరించడం వలన నశించనంతటి పాపం అనేది ఇంకా ఈ ప్రపంచంలో పుట్టనే లేదు. అందువల్ల వ్రత ధర్మాలనూ, తత్ఫలాలనూ చెబుతాను విను.

కార్తీక మాసపు సాయంకాలము శివాలయములో దీపారాధన చేయడం వలన అనంతమైన ఫలము వస్తుంది. శివాలయ గోపురద్వార, శిఖరాలయందుగానీ - శివలింగ సన్నిధినిగానీ దీపారాధన చేయడం వలన అన్ని పాపాలూ అంతరించిపోతాయి. ఎవరయితే కార్తీకములో శివాలయములో ఆవునేతితోగాని, నువ్వులనూనెతో గాని, ఇప్ప - నారింజనూనెలతో గాని దీప సమర్పణ చేస్తారో - వాళ్లు ధర్మవేత్తలవుతారు. ఆఖరికి ఆముదపు దీపాన్నయినా సమర్పించిన వాళ్లు అత్యంత పుణ్యవంతులవుతారు. కనీసము, కాంక్షతో గాని - నలుగురి నడుమా బడాయి కోసం గానీ దీపాన్నిచ్చే వాళ్లు కూడా శివప్రియులవుతారు. ఇందు కుదాహరణగా ఒక చిన్న కథ చెబుతాను విను.


🌻. కార్తీక దీపారాధనా మహిమ

పూర్వము పాంచాలదేశాన్ని పరిపాలించే మహారాజొకడు, కుబేరుని మించిన సంపద కూర్చుకుని వున్నా, కుమారులు లేని కారణంగా క్రుంగిపోయినవాడై, కరంగపాణికై తపస్సుకు కూర్చున్నాడు. మధ్యకాలంలో అటుగా వచ్చిన పిప్పలుడనే ముని - అతని తపస్సుకు కారణమడిగి తెలుసుకుని, 'ఓ రాజా! ఈ మాత్రపు కోరికకు తపస్సుతో పని లేదు. కార్తీక మాసములో శివప్రీతిగా వ్రతమాచరించి, బ్రాహ్మణులను దీపదాన దక్షిణలతో సంతోషపెట్టు. అలా చేస్తే - నీకు తప్పక పుత్రక సంతానము కలుగుతుందని" చెప్పాడు. బుషి వాక్యమును శిరోధార్యముగా తలచి - ఆ పాంచాలుడు తన పట్టణము చేరి, కార్తీక వ్రతమాచరించి, శివప్రీతికై బ్రహ్మణులకు దీపదానములను చేశాడు. తత్ఫలముగా మహారాణి నెల తప్పి, యుక్తకాలములో పురుష శిశువును ప్రసవించింది. రాజ దంపతులా శిశువుకి 'శత్రుజిత్తు' అని పేరు పెట్టారు.


🌻. శత్రుజిత్తు చరిత్రము

ఆ శత్రుజిత్తు దినదిన ప్రవర్థమానుడై పెరిగి, యువకుడై, వీరుడై వేశ్యాంగనా లోలుడై, అప్పటికీ తృప్తి చెందక, పరస్త్రీరక్తుడై, యుక్తా యుక్త విచక్షణా నాస్తికుడై, శాస్త్ర దిక్కారియై, వర్ణసంకర కారకుడై హితవు చెప్పవచ్చిన వారిని చంపుతానని బెదరించుచు, స్వేచ్చాచారియై ప్రవర్తింపసాగేడు. అటువంటి సందర్భంలో -సౌందర్యరాశి సింహమధ్యమా, అరటి దోనెల వంటి తొడలు గలదీ, పెద్ద పెద్ద పిరుదులూ, కుచాలూ, కన్నులూ కలదీ, చిలుకవలే చక్కని పలుకులు గలదీయైన ఒక బ్రాహ్మణ పత్ని తారసిల్లింది. శత్రుజిత్తు ఆమె పట్ల మోహితుడయ్యాడు. అనుపమాన సౌందర్య, శౌర్య, తేజో విరాజితుడైన యీ యువరాజు పట్ల ఆ బాపనిది కూడా మోజుపడినది. తత్కారణముగా - ఆమె రోజూ రాత్రి తన భర్త నిద్రపోగానే - సంకేత స్ధలంలో రాజకుమారుని కలిసి - సురత క్రీడలలో సుఖించేది. రంకూ- బొంకూ దాగవు గదా! ఏదో విధంగా యీ సంగతి ఆ బాపనదాని భర్తకు తెలిసిపోయినది. అది మొదలు అతనొక కత్తిని ధరించి - ఈ రంకు జంటకు ప్రత్యక్షంగా చూసి, వారి గొంతు లుత్తరించాలని తిరుగుతున్నాడు. మహాకాముకురాలయిన జారిణిగాని, ఆ శత్రుజిత్తుగాని యీ సంగతి నెరుగరు.

రోజులిలా గడుస్తూ వుండగా ఒకానొక కార్తీక పూర్ణిమా సోమవారం నాడు రాత్రి ఆ కాముకులు తమ సురత క్రీడలకై ఒకానొక శిథిల శివాలయాన్ని సంకేత స్ధానముగా యెంచుకున్నారు. అపరరాత్రివేళ వాళ్లు అక్కడ కలుసుకున్నారు. గర్భగుడిలో అంతా చీకటిగా వుంది. ఆ బాపనిది తన చీరచెంగు చింపి వత్తిని చేసింది. రాజకుమారుడెక్కడినించో ఆముదమును తెచ్చాడు. ఇద్దరూ కలిసి అక్కడి ఖాళీప్రమిదలో ఆ రెంటిని జోడించి దీపం పెట్టారు. ఆ దీపపు వెలుగులో ఒకరి అందాలొకరు చూసుకుంటూ సంభోగములో లీనమయ్యారు.

ఈ విషయాన్ని ఆ బాపనదాని మొగుడెలాగో తెలుసుకున్నాడు. కత్తి పట్టుకుని వచ్చాడు. ముందుగా శత్రుజిత్తునీ, అనంతరం తన భార్యనూ తెగనరికి - తాను కూడా అదే కత్తితో పొడుచుకుని ఆత్మహత్య చేసుకున్నాడు. ఆ విధంగా వాళ్లు ముగ్గురూ ఆ రాత్రి అక్కడికక్కడే విగతజీవులు కాగానే - పాశహస్తులైన యమదూతలూ - పవిత్రాత్ములైన శివదూతలూ - ఒకేసారి అక్కడకు చేరారు. శివదూతలా రాకుమారుడినీ, రంకులాడినీ తమ విమానంలో కైలాసానికి తీసుకుపోసాగారు. యమదూతలీ యమాయకపు బాపడిని తమతో నరకమువైపు లాగుకొనిపోసాగారు.

అందుకచ్చెరుపడిన పారుడు - "ఓ శివదూతలారా! కానిపని చేసిన వారికి కైలాసభోగము - నా వంటి సదాచారుడికి నరక యోగమూనా?' అని ప్రశ్నించగా, అందులకా శివదూతలు - 'వీరెంత పాపాత్ములయినా - ఈ రోజు కార్తీక పూర్ణిమ సోమవారం కాబట్టి, శివాలయములో - అందునా - శిథిలాయములో శివలింగమునకు ఎదురుగా దీపారాధన చేశారు గనక, వారి పాపాలూ, నేరాలూ నశించి పుణ్యాత్ములయ్యారు. ఏ కారణం చేతనైనాసరే కార్తీక మాసములో అందునా పౌర్ణమినాడు, పైగా సోమవారమునాడు దేవాలయములో దీపారాధనము చేయడం వలన అత్యధిక పుణ్యాత్యులైన వీళ్లని పాపకర్ములుగా భావించి చంపిన కారణంగా నువ్వు పుణ్యహీనుడివీ, పాపాత్ముడివీ అయ్యావు. అందుకే, నీకు నరకము - వీరికి కైలాసము' అని చెప్పారు.

బ్రహ్మణుడికీ, శివపారిషదులకూ జరిగిన ఈ సంభాషణను విన్న శత్రుజిత్తు తాను కలుగజేసుకుని, 'అయ్యలారా! దోషులము మేమైయుండగా, మాకు కైవల్యమిచ్చి మమ్మల్ని చంపి పుణ్యాత్ములను చేసిన ఆ అమాయకుడిని నరకానికి పంపడం భావ్యము గాదు. కార్తీక మాసము దొడ్డదయితే, అందునా పూర్ణిమ గొప్పదయితే, సోమవారము మరీ ఘనమయనదయితే, దీపారధాన మరీ పుణ్యకరమైనదయితే మాతోబాటే కలసి మరణించిన ఆ బాపనికి కూడా కైలాసమీయక తప్ప'దని వాదించడం జరిగింది. తత్ఫలముగా - శత్రుజిత్తు తానూ, తన ప్రియురాలూ ఆచరించిన వత్తీ, తైలముల పుణ్యము తాముంచుకుని, ఆ దీపమును వెలిగించిన పుణ్యమును బ్రాహ్మణునకు ధారపోయగా , శివదూతలా విప్రుని కూడా యమదూతల నుండి విడిపించి - తమతో కైలాసానికి తీసికొనివెళ్ళారు.

కాబట్టి, ఓ మిధిలానగరాధీశ్వరా ! కార్తీకమాసములో తప్పనిసరిగా - శివాలయములోగాని, విష్ణ్వాలయంలో గాని దీపారాధన చేసి తీరాలి. నెల పొడుగునా చేసిన వాళ్లు జ్ఞానులై, తద్వారా మోక్షాన్ని పొందగలుగుతారు. అందునా, శివాలయములో చేసిన దీపారాధన విరంతర మోక్షప్రదాయినిగా గుర్తించు. నా మాట విని - కార్తీక మాసము నెల పొడుగునా నువ్వు శివాలయములో దీపారాధన చెయ్యి.

ఏవం శ్రీస్కాంద పురాణాంతర్గత కార్తీక మహత్మ్యమందు చతుర్థాధ్యాయ స్సమాప్త:

🌹 🌹 🌹 🌹 🌹

శ్రీ కార్తీక పురాణం-3 : 3వ అధ్యాయం కార్తీక స్నాన మహిమ (Sri Karthika Puranam: Chapter 3: Karthika Snanam)

https://www.youtube.com/watch?v=TazsKMkDoXM


🌹 3. శ్రీ కార్తీక పురాణం 3వ అధ్యాయం కార్తీక స్నాన మహిమ Sri Karthika Puranam Chapter 3 Glory of Karthika Snanam 🌹

ప్రసాద్ భరద్వాజ

Like, Subscribe and Share

🌹🌹🌹🌹🌹

కార్తీక పురాణం - 3 - 3వ అధ్యాయం : కార్తీకస్నాన మహిమ, బ్రహ్మరాక్షసులకు ముక్తి కలుగుట (Kartika Puranam - 3 - Chapter 3 - Kartika Bath)

https://www.facebook.com/groups/chaitanyavijnanam/posts/2308193359967132

🌹 కార్తీక పురాణం - 3 🌹
🌻 3వ అధ్యాయం : కార్తీకస్నాన మహిమ, బ్రహ్మరాక్షసులకు ముక్తి కలుగుట. 🌻
ప్రసాద్ భరద్వాజ

🌹🔱 Kartika Puranam - 3 🌹
🌻 Chapter 3: The Glory of the Kartika Bath; Attaining Liberation for Brahma-Rakshasas. 🔱🌻
Prasad Bharadwaja


బ్రహ్మర్షియైన శ్రీ వశిష్ఠ మహర్షి రాజర్షియైన జనకునికి ఇంకా యిలా చెప్పసాగాడు; 'రాజా! స్నానదాన జప తపాలలో దేవినిగానీ, ఈ కార్తీకమాసంలో ఏ కొద్దిపాటిగా ఆచరించినప్పటికీ కూడా - అది అక్షయమైన ఫలాన్నిస్తుంది. ఎవరైతే సుఖలలాసులై శరీర కష్టానికి జడిసి కార్తీక వ్రతాన్ని ఆచరించరో - ఆటువంటివాళ్ళు వంద జన్మలు కుక్కలుగా పుడతారు.

శ్లో" పౌర్ణమ్యాం కార్తీకేమాసి స్నానాందీస్తు నాచరన్ !
కోటిజన్మసు చండాలయోనౌ సంజాయతే నృప !!

శ్లో" క్రమాద్యోనౌ సముత్సన్నో భవతి బ్రహ్మరాక్షసః !
అత్త్రై వోదాహరంతీ మ మితిహాసం పురాతనమ్ !!


భావం: కార్తీక పౌర్ణమినాడు, స్నాన దాన జపోపవాసాలలో ఏ ఒక్కటీ కూడా ఆచరించని వాళ్లు కోటి పర్యాయాలు చండాలపు యోనులలో జన్మించి, తుదకు బ్రహ్మ రాక్షసులుగా పరిణమిస్తారు. ఇందుకు ఉదాహరణగా ఒక గాథను చెబుతాను విను.

అతి పూర్వకాలంలో ఆంధ్రదేశంలో తత్త్వనిష్ఠుడనే బ్రహ్మణుడుండేవాడు. సకల శాస్త్ర పారంగతుడు, అసత్యములను పకులనివాడూ, అన్ని భూతములయందునూ దయాళువూ, తీర్థాటన ప్రియుడూ అయిన ఆ విప్రుడు ఒకానొక తీర్థయాత్రా సందర్భముగా ప్రయాణిస్తూ మార్గమధ్యములో గోదావరీ తీరానగల ఒకానొక యెత్తయిన మర్రిచెట్టు మీద - కారు నలుపు కాయచ్చాయ గలవాళ్లూ, ఎండిన డొక్కలు కలవాళ్లూ, ఎర్రని నేత్రములు - గడ్డములూ కలవాళ్లూ, గ్రుచ్చబడిన ఇనుపతీగెలకుమల్లే పైకి నిక్కివున్న తలవెంట్రుకలతో, వికృత వదనార విందాలతో, కత్తులూ, కపాలాలూ ధరించి, సర్వజీవ భయంకరులుగా వున్న ముగ్గురు బ్రహ్మరాక్షసులను చూశాడు. ఆ రాక్షసుల వలన భయము చేత ఆ మర్రి చెట్టు నాలుగు వైపులా కూడా పన్నెండు మైళ్ల దూరంలో యెక్కడా ప్రాణి సంచారమనేదే వుండేది కాదు. అటు వంటి భయంకర స్వరూపులైన ఆ రాక్షసులను అల్లంత దూరము నుంచే చూసిన తత్వనిష్ఠుడు ఆదిరిపడ్డాడు. దానితో బాటే ఆ రాక్షసులు కూడా తనను చూడటంతో మరింత భయపడినవాడై - శోకాకుల చిత్తముతో శ్రీహరిని స్మరించసాగాడు.


🌻. తత్వనిష్ఠుడి శరణాగతి

శ్లో" త్రాహి దేవేశ లోకేశ! త్రాహి నారాయ ణావ్యయ సమస్త భయవిధ్వంసిన్! త్రాహిమాం శరణాగతం వ్యాసం పశ్యామి దేవేశ ! త్వత్తోహం జగదీశ్వర !!

అంటే - "దేవతలకూ, లోకాలకూ కూడా యజమానివయిన వాడా ! నారాయణా ! అవ్యయా! నన్ను కాపాడు. అన్నిరకాల భయాలనూ అంతము చేసేవాడూ! నిన్నే శరణుకోరుతున్న నన్ను రక్షించు. ఓ జగదీశ్వరా! నువ్వు తప్ప ఇంకొక దిక్కు ఎరుగనివాడను. నన్ను కాపాడు రక్షించు" అని యెలుగెత్తి స్మరించుచు రాక్షస భయముతో అక్కడ నుంచి పారిపోసాగాడు. అతనిని పట్టి వదించాలనే తలంపుతో ఆ రాక్షసత్రయము అతని వెనుకనే పరుగెత్తసాగినది. రక్కసులా పారునికి చేరువవుతున్న కొద్దీ, సాత్వికమైన విప్ర తేజస్సు కంటబడడం వలనా - తెరిపి లేకుండా అతనిచే స్మరించబడుతూన్న హరినామము చెవులబడుట వలనా - వెంటనే వారికి జ్ఞానోదయమయింది. అదే తడవుగా ఆ బాపని కెదురుగా చేరుకొని, దండ ప్రణామా లాచరించి, అతనికి తమ వలన కీడు కలుగబోదని నమ్మబలికి, 'ఓ బ్రాహ్మణుడా! నీ దర్శనముతో మా పాపాలు నశించిపోయాయి. అని పునః పునః నమస్కరించారు. వారి నమ్రతకు కుదుట పడిన హృదయముతో - తత్వనిష్ఠుడు 'మీరెవరు? చేయరాని పనులు వేనిని చేయడం వలన యిలా అయిపోయారు? మీ మాటలు వింటుంటే బుద్దిమంతుల్లా వున్నారు. మరి ఈ వికృత రూపాలేమిటి? నాకు వివరముగా చెప్పండి. మీ భయబాధావళి తొలగే దారి చెబుతాను' అన్నాడు.


🌻. ద్రావిడుని కథ

పారుని పలుకులపై, ఆ రక్కసులలో ఒకడు తన కథనిలా వినిపించసాగాడు. 'విప్రోత్తమా! నేను ద్రావిడుడను. ద్రవిడ దేశమందలి మంధరమనే గ్రామాధికారినైన నేను, కులానికి బ్రహ్మణుడనే అయినా - గుణానికి కుటిలుడనీ, వంచనామయ వచః చమత్కారుడినీ అయి వుండేవాడిని. ణా కుటుంబ శ్రేయస్సుకై, అనేక మంది విప్రుల విత్తాన్ని హరించాను. బంధువలకుగాని, బ్రాహ్మణులకు గాని యేనాడూ పట్టెడన్నమయినా పెట్టి ఎరుగను. నయవంచనలతో బ్రాహ్మణ ధనాన్ని అపహరించడంచేత - నా కుటుంబము నాతో సహా ఏడు తరాల వాళ్లు అధోగతుల పాలయిపోయారు. మరణానంతరము దుస్సహమైన నరకయాతనల ననుభివించి చివరికిలా బ్రహ్మరాక్షసుడనయ్యాను. కృపాయత్త చిత్తుడవై - నాకు ముక్తినిచ్చే యుక్తిని చెప్పు' అన్నాడు.


🌻. ఆంధ్రదేశీయుని గాథ

రెండవ రాక్షసునిలా విన్నవించుకోసాగేడు - 'ఓ పవిత్రుడా! నేను ఆంధ్రుడను. నిత్యమూ నా తల్లిదండ్రులతో కలహించుచు, వారిని దూషించుచు వుండేవాడిని. నేను నా భార్యాపిల్లలతో మృష్టాన్నాన్ని తింటూ, తల్లిదండ్రులకు మాత్రం చద్దికూటిని పడవేసే వాడిని. బందావ బ్రాహ్మణ కోటికేనాడూ ఒక పూటయినా భోజనము పెట్టక - విపరీతముగా ధనార్జన చేసి ఆ కావరముతో బ్రతికే వాడిని. ఆ శరీరము కాలంచేశాక నరకానపడి ఘోరాతి ఘోరమైన బాధలనుభవించి చివరి కిక్కడిలా పరిణమించాను. ఆ ద్రావిదునికివలెనే - నాకు కూడా ముక్తి కలిగే దారిని బోధించుము' అని అన్నాడు.


🌻. పూజారి కథ

అనంతరం మూడవ రాక్షసుడు ముందరకు వచ్చి ఇలా మొఱపెట్టనారంభించాడు. 'ఓ సదాచార సంపన్నుడా! నేను ఆంధ్రదేశపు బ్రహ్మణుడను. విష్ణ్వాలయంలో పూజారిగా వుండేవాడిని. కాముకుడనూ, అహంభావినీ, కఠినవచస్కుడినీ అయిన నేను - భక్తులు స్వామి వారికర్పించే కైంకర్యాలన్నిటినీ - నా వేశ్యలకు అందచేసి, విష్ణు సేవలను సక్రమముగా చేయక గర్వముతో తెరిగేవాడిని. తుదకు గుడి దీపాలలో నూనెను కూడా హరించి, వేశ్యలకు ధారపోసి వారితో సంభోగ సుఖములనుభవించుచు పాపపుణ్య విచక్షణారహితుడనై ప్రవర్తించేవాడిని. ఆ నా దోషాలకు ప్రతిఫలంగా నరకమును చవిచూసి, అనంతరము యీ భూమిపై నానావిధహీన యోనులలోనూ, నానా నీచజన్మలనూ యెత్తి కట్టకడకీ బెట్టిదమయిన బ్రహ్మరాక్షసునిగా పరిణమించాను. ఓ సదాయుడా! నన్ను మన్నించి - మరలా జన్మించే అవసరం లేకుండా - మోక్షాన్ని పొందే మార్గాన్ని ప్రవచించవయ్యా' అని ప్రార్ధించాడు.


🌻 బ్రహ్మరాక్షసులు ఉత్తమ గతి పొందుట

తమ తమ పూర్వ భవకృత మహాఘరాశికి - ఎంతగానో పశ్చాత్తాప పడుతూన్న ఆ రక్కసులకు అభయమిచ్చి 'భయపడకండి - నాతో కలిసి కార్తీక స్నానానికి రండి. మీ సమస్త దోషాలూ నశించిపోతాయి' అని చెప్పి వారిని తన వెంట బయలుదేరదీశాడా బ్రహ్మణుడు. అందరూ కలిసి కావేరీ నదిని చేరారు. అక్కడ తత్వనిష్ఠుడు - బ్రహ్మరాక్షసుల నిమిత్తమై సంకల్పం చేసి తాను స్వయముగా ముందు స్నానం చేసి, పిమ్మట రక్కసుల చేత కూడా స్నానం చేయించాడు. అనంతరము


శ్లో" అముకానాం బ్రహ్మరాక్షసత్వ వివారణార్ధం !
అస్యాం కావేర్యాం - ప్రాతఃస్నాన మహం కరిష్యే !!

అనే సంకల్పములతో అతడు విధివిధానముగా స్నానం చేసి, తత్ఫలాన్ని బ్రహ్మరాక్షసులకు ధారపోయగా - వారు విగతదోషులూ - దివ్యవేషులూ అయి తక్షణమే వైకుంఠానికి ప్రయాణమయ్యారు.

విదేహరాజా! అజ్ఞానము వలన కాని, మోహ - ప్రలోభాల వలన గాని, ఏ కారణము చేతనైనా గాని - కార్తీక మాస సూర్యోదయ కాలాన కావేరీనదిలో స్నానమాచరించి, విష్ణువును పూజించిన వాళ్లకు నిస్సందేహముగా పదివేల యజ్ఞాలు చేసిన ఫలము కలుగుతుంది. అందువల్ల - ఏదో ఒక ఉపాయం చేసైనా సరే కార్తీకంలో కావేరీ స్నానమును తప్పకుండా చేయాలి. కావేరీలో సాధ్యము కాకపోతే గోదావరిలోనైనా, మరెక్కడయినా సరే - ప్రాతః స్నానం మాత్రం చేసి తీరాలి. అలా ఎవరైతే కార్తీక దామోదర ప్రీతిగా ప్రాతః స్నానము చేయరో, వాళ్లు పది జన్మలు చండాలపు యోనులలో పుట్టి, అనంతరము ఊరపందులుగా జన్మిస్తారు సుమా! కాబట్టి - ఎటువంటి మీమాంసతోటీ నిమిత్తం లేకుండా స్త్రీలుగాని, పురుషులుగాని కార్తీక మాసంలో తప్పనిసరిగా ప్రాతఃస్నానం ఆచరించాలి.

ఏవం శ్రీస్కాంద పురాణాంతర్గత కార్తీక మహత్మ్యమందు త్రయీధ్యాయ స్సమాప్త:

🌹 🌹 🌹 🌹 🌹

కార్తీక పురాణం 2వ అధ్యాయం - సోమవార వ్రత మహిమ, కుక్క కైలాసముకు ఏగుట (Kartika Puranam – Chapter 2 - Monday Vrata and a Dog’s Journey to Kailasa)

🌹. కార్తీక పురాణం 2వ అధ్యాయం 🌹
🌻. సోమవార వ్రత మహిమ, కుక్క కైలాసముకు ఏగుట 🌻
ప్రసాద్ భరద్వాజ

🌹. Kartika Puranam – Chapter 2 🌹
🌻. The Glory of the Monday Vrata (Observance) and a Dog’s Journey to Kailasa 🌻
Prasad Bharadwaja


వశిష్టుడు జనక మహారాజుతో ఇలా అంటున్నాడు ”జనకా! ఇంతవరకు నీకు కార్తీక మాసములో చేయాల్సిన కార్యక్రమాలను మాత్రమే చెప్పాను. అయితే… కార్తీక మాసంలో సోమవారాలకు ప్రత్యేకత ఉంది. ఆ రోజున ప్రత్యేకంగా సోమవార వ్రతం నిర్వహిస్తారు. ఎంతో మహత్తు కలిగిన ఆ సోమవార వ్రత విధానాన్ని, దాని మహత్యాన్ని గురించి చెబతాను. సావధానంగా విను” అని ఇలా చెప్పసాగాడు.

”కార్తిక మాసములో సోమవారం శివుడికి అత్యంత ప్రీతికరమైన రోజు. ఆ రోజున స్త్రీ గాని, పురుషుడుగాని ఏజాతి వారైనా గాని రోజంతా ఉపవాసముండాలి.

నదీస్నానం చేసి, తమ శక్తికొద్దీ దానధర్మాలు చేయాలి. శివుడికి బిల్వపత్రాభిషేకం చేసి, సాయంత్రం నక్షత్రదర్శనం తర్వాత అల్పాహారం తీసుకోవాలి. ఈ విధంగా నిష్టతో ఉంటూ… ఆ రాత్రంతా జాగరణ చేసి, పురాణ పఠనం చేయాలి. ఉదయం నదీస్నానమాచరించాలి. నువ్వులను దానం చేయాలి (తిలాదానం). తమ శక్తికొద్దీ పేదలకు అన్నదానం చేయాలి. అలా చేయలేనివారు కనీసం ముగ్గురు బ్రాహ్మణులకు తృప్తిగా భోజనం పెట్టిన తర్వాత, తాము భుజించాలి. ఈ కార్తీక సోమవార వ్రతం కేవలం భక్తి, సంకల్పంపైనే ఆధారపడి ఉంటాయి. పెద్దగా పూజాదికాలు నిర్వహించలేనివారు సైతం కనీసం ఉపవాసం ఉంటే… కార్తీక సోమవార వ్రతం ఫలితాన్ని పొందగలరు.

ఇందుకు సంబంధించి ఒక ఇతిహాసముంది. దాన్ని మీకు తెలియజేస్తాను. సావధానంగా విను” అని ఇలా చెప్పసాగాడు.


🌻. కుక్క కైలాసానికి వెళ్లుట…

”పూర్వ కాలమున కాశ్మీర్లో ఒక బ్రాహ్మణుడు ఉండేవాడు. అతడు పురోహిత వృతిని చేపట్టి తన కుటుంబాన్ని పోషించేవాడు. అతనికి లేకలేక ఒక కూతురు పుట్టింది. ఆమెకు స్వాతంత్ర నిష్టురి అని పేరు పెట్టారు. తండ్రి ఆమెకు సౌరాష్ట్రకు చెందిన మిత్రశర్మ అనే సద్బ్రాహ్హణుడికి ఇచ్చి పెళ్లి చేశాడు. అయితే ఆ బ్రాహ్మణ యువకుడు నాలుగు వేదాలు, శాస్త్రాలు అభ్యసించడం వల్ల సదాచారపరుడై ఉండేవాడు. భూతదయ కలిగి ఉండేవాడు. నిత్య సత్యవాది. నిరంతరం భగవన్నామస్మరణ చేసేవాడు ఈ కారణాలతో ప్రజలంతా అతన్ని ‘అపర బ్రహ్మ’ అని పిలిచేవారు. ఇంతటి ఉత్తమ పురుషుడికి భార్య అయిన స్వాతంత్ర అందుకు భిన్నంగా ఉండేది. యవ్వన గర్వంతో, కన్నుమిన్నుగానక పెద్దలను దూషించేది. అత్తమామలను, భర్తను తిట్టడం, కొట్టడం, రక్కడం చేసేది. పురుషసాంగత్యంతో వ్యభిచారిణియై… తన ప్రియులు తెచ్చిన తినుబండారాలు, బట్టలు, పువ్వులు, ధరించి దుష్టురాలై తిరుగసాగింది. ఆమె తమ వంశాన్ని అప్రతిష్టపాలు చేస్తోందని అత్తమామలు ఆమెను ఇంటినుంచి వెళ్లగొట్టారు. అయితే శాంత స్వరూపుడైన ఆమె భర్త మాత్రం ఆమెను ఏవగించుకోకుండా… ఆమెతో కలిసే ఉండేవాడు. చుట్టుపక్కలవారంతా ఆమెను గయ్యాళి అని ఏవగించుకుంటూ… కర్కశ అని పేరుపెట్టి ఎగతాళి చేసేవారు.

ఇలా కొంతకాలం తర్వాత ఆమె ఒకనాటి రాత్రి తన భర్త గాఢనిద్రలో ఉండగా… ఒక బండరాయితో అతని తలపై కొట్టి చంపింది. ఆ మృతదేహాన్ని అతిరహస్యంగా దొడ్డిదారిన ఊరి చివరకు తీసుకెళ్లింది. అక్కడున్న బావిలో మృతదేహాన్ని పారేసి, పైన చెత్తచెదారంతో నింపింది. తనకు ఏమీ తెలియదన్నట్లుగా ఇంటికి తిరిగి వచ్చింది. తనకిక ఎదురులేదని, అడ్డూఅదుపు ఉండదనే అహంకారం పెరిగి… ఇష్టారాజ్యంగా తిరగసాగింది. తన సౌందర్యాన్ని చూపి ఎందరినో క్రీగంటనే వశపరుచుకుంది. వారి వ్రతాలను పాడుచేసి, నానాజాతి పురుషులతో సంభోగిస్తూ వర్ణసంకరురాలైంది.

అంతటితో ఆగకుండా… కన్యలు, పెళ్లైన మహిళలకు దుర్బుద్దులు నేర్పి, పాడుచేసి, విటులకు వారిని అప్పగిస్తూ ధనార్జన చేయనారంభించింది. ఆ తర్వాత ఆమె యవ్వనం క్రమంగా నశించడం ఆరంభమైంది. వయసు పైపడసాగింది. చేసిన పాపాలకు గురుతుగా శరీరంపై పుండ్లు ఏర్పడ్డాయి. వాటి నుంచి చీము, రక్తం కారుతూ, క్రమంగా కుష్టువ్యాధిబారిన పడింది. రోజురోజుకూ ఆమె శరీర పటుత్వం కృశించి కురూపిగా మారింది. యవ్వనంలో ఆమెకోసం వంతులవారీగా ఎగబడే విటుల్లో ఒక్కరూ ఇప్పుడామెవైపు కన్నెత్తికూడా చూడడం లేదు. అలా కొంతకాలం ఆమె ప్రత్యక్ష నరకాన్ని చవిచూచి, పురుగులు పడి చనిపోయింది.

బతికినన్ని రోజులు ఒక్క పురాణ శ్రవణమైనా చేయని పాపి కావడంతో భయంకరంగా కనిపించే యమకింకరులు ఆమెను యముని ముందు హాజరుపరిచారు. చిత్రగుప్తుడు ఆమె పాపపుణ్యాలను ఏకరవు పెట్టారు. పాపాలకు ఎర్రగా కాల్చిన ఇనుప స్తంభానికి కట్టాలని, విటులతో సుఖించినందుకు ఇనుపస్తంభాన్ని కౌగిలించుకోవాలని ఆదేశించారు. భర్తను బండరాతితో కొట్టి చంపినందుకు ఇనపగదలతో ఆమెను మోదాలని ఆదేశించారు.

పతివ్రతలను వ్యభిచారిణిలుగా మార్చినందుకు సలసలా కాగే నూనెలో వేచారు. తల్లిదండ్రులు, అత్తమామలకు అపకీర్తి తెచ్చినందుకు సీసం కరిగించి నోట్లో, చెవిలో పోశారు. ఇనపకడ్డీలు కాల్చి వాతలు పెట్టారు. చివరకు కంఉబీపాకంలో వేశారు. ఆమె చేసిన పాపాల ఫలితాలను ఆమె ఒకత్తే కాకుండా, ఇటు ఏడు తరాలు, అటు ఏడు తరాలు నరక బాధలు అనుభవించసాగారు. ఆ తర్వాత ఆమె నీచజన్మలు ఎత్తుతూ, క్రిమికీటకాలుగా పుట్టి.. చివరకు పదిహేనో జన్మలో కళింగ దేశంలో ఒక కుక్కగా జన్మనెత్తింది.

కుక్కజన్మలో ఆమె ఆకలికి తట్టుకోలేక ఇంటింటికీ తిరిగింది. కర్రతో కొట్టేవారు ఆమెను కొడుతుంటే.. తిట్టేవాడు తిడుతున్నారు. పిల్లలు తరుముతున్నారు. అయితే… ఒక బ్రాహ్మడు కార్తీక సోమవార వ్రతమాచరించి, ఉపవాసముండి, సాయంత్రం నక్షత్ర దర్శనం చేసి, ఉపవాస విరమణ నిమిత్తం సిద్ధం చేసుకున్న అల్పాహారాన్ని అరుగుపై పెట్టి, కాళ్లూచేతులు కడుక్కునేందుకు వెళ్లాడు. అయితే… ఆ కుక్క గబగబా వెళ్లి ఆ ఆహారాన్ని భుజించింది.

వ్రత నిష్ఠ గరిష్ఠుడైన ఆ బ్రాహ్మడి పూజ విధానముతో జరిపెంచిన బలియన్నం కావడం… కార్తీక సోమవారం నాడు కుక్క ఆకలితో రోజంతా ఉపవాసముండడం, శివపూజ పవిత్ర స్థానంలో ఆరగించడం వల్ల ఆ కుక్కకు పూర్వజన్మ విజ్ఞానం ఉద్భవించింది.

వెంటనే ఆ కుక్క ‘విప్రోత్తమా… నన్ను కాపాడుము’ అని మొరపెట్టుకుంది. ఆ మాటలు బ్రాహ్మణుడికి ఆశ్చర్యాన్ని కలిగించింది. మనుష్యులెవరూ కనిపించకపోయేసరికి అంతా భ్రమ అనుకున్న ఆ విప్రుడికి మళ్లీ మాటలు వినిపించాయి. ‘రక్షించు… రక్షించు…’ అనే కేకలు వినిపించాయి. ఆ మాటలు కుక్క నుంచి వస్తున్నాయని గ్రహించిన బ్రాహ్మడు ‘ఎవరు నీవు? నీ వృత్తాతమేమిటి?’ అని ప్రశ్నించాడు. అంత ఆ కుక్క తన వృత్తాంతాన్ని వివరించింది. పదిహేను జన్మల క్రింద సద్భ్రాహ్మణుడి భార్యయైన తాను వ్యభిచారం చేసిన తీరు, భర్తను చంపడం, వృద్ధాప్యంలో కుష్టువ్యాధితో దినదినగండంగా బతికి, చనిపోయిన తీరును, నరకంలో అనుభవించిన శిక్షలను గురించి వివరించింది. ‘ఈ రోజు మీరు కార్తీక సోమవార వ్రతం చేసి, ఇక్కడ పెట్టిన బలిఅన్నం తినడం వల్ల నాకు జ్ఞానోదయం కలిగింది. కాబట్టి ఓ విప్రోత్తమా…! నాకు మహోపకరాంగా మీరు చేసిన కార్తీక సోమవార వ్రత ఫలమొక్కటి ఇచ్చి, నాకు మోక్షం కలిగించు’ అని ప్రార్థించింది.

దాంతో ఆ శునకం మీద జాలితో ఆ బ్రాహ్మణుడు తాను చేసిన కార్తీక సోమవార వ్రతాల్లో ఒక రోజు నాటి ఫలాన్ని ఆమెకు ధారబోశాడు. అలాచేసిన వెంటనే… ఒక పుష్పక విమానం అక్కడకు చేరుకుంది. కుక్క తన జన్మను చాలింది, సూక్ష్మదేహంతో పుష్పకాన్ని చేరింది. అటు నుంచి శివసాన్నిథ్యాన్ని చేరుకుంది.”

ఇతి శ్రీ సాంద పురాణే తర్గత, వశిష్ట ప్రోక్త కార్తీక మహత్యే ద్వితీయ అధ్యాయం సమాప్తం.

🌹 🌹 🌹 🌹 🌹

శ్రీ కార్తీక పురాణం 2వ అధ్యాయం సోమవార వ్రత మహిమ (Karthika Puranam 2nd Chapter - Somavara Vrat Mahatyam) (Youtube Video)

https://youtu.be/lzaV3BqgX4o

🌹2. శ్రీ కార్తీక పురాణం 2వ అధ్యాయం సోమవార వ్రత మహిమ
Karthika Puranam 2nd Chapter Somavara Vrat Mahatyam 🌹

ప్రసాద్ భరద్వాజ

Like, Subscribe and Share

🌹🌹🌹🌹🌹

కార్తీక మాసం సోమవార విశిష్టత - విధులు పరిహారాలు (Significance of Karthika Masam Somavaram)

https://youtu.be/1-jjrSAApKU

🌹 Watch కార్తీక మాసం సోమవార విశిష్టత - విధులు పరిహారాలు
Significance of Karthika Masam Somavaram - Remedies 🌹

🌹🌹🌹🌹🌹

శ్రీ కార్తీక పురాణం – ద్వితీయ అధ్యాయం - సోమవార వ్రత మహిమ (Sri Kartika Puranam – Chapter Two)

https://www.facebook.com/groups/chaitanyavijnanam/posts/2307236613396140

🌹🪔 శ్రీ కార్తీక పురాణం – ద్వితీయ అధ్యాయం 🪔🌹
🍀 సోమవార వ్రత మహిమ – నిష్ఠురకు (శునకమునకు) మోక్షప్రాప్తి 🍀
✍️ ప్రసాద్ భరద్వాజ

🌹🔱🪔 Sri Kartika Puranam – Chapter Two 🪔🔱🌹
🍀 The Glory of the Monday Vrata (Observance) – Attainment of Liberation by a Dog 🍀
✍️ Prasad Bharadwaja


కార్తీక పురాణంలోని ప్రతి అధ్యాయం మనిషికి ధర్మం, భక్తి, జ్ఞానం, వైరాగ్యం వంటి ఆధ్యాత్మిక విలువలను తెలియజేస్తుంది. కార్తీక మాసంలో శివకేశవుల ఆరాధన, దీపదానం, స్నానం, దానం, జపం, ధ్యానం చేయడం ద్వారా మనిషి తన అంతరంగాన్ని పవిత్రం చేసుకోవాలనే సందేశం ఈ పురాణ కథలలో అంతర్లీనంగా ఉంటుంది.

వశిష్ఠ మహర్షి జనక మహారాజుతో ఇలా చెప్పసాగాడు. “ఓ రాజా! కార్తీక మాస మహాత్మ్యాన్ని నీకు వివరిస్తాను. ఈ మాసంలో శివునికి అత్యంత ప్రీతికరమైనది సోమవార వ్రతం. కార్తీక సోమవారాలలో భక్తిశ్రద్ధలతో ఉపవాసం ఉండి, శివుని ఆరాధించి, స్నానదాన జపతపాదులను ఆచరించినవారు విశేషమైన పుణ్యఫలాలను పొందుతారు. ఈ పవిత్రమైన రోజున చేసే శివారాధన, అభిషేకం, బిల్వపత్ర సమర్పణ, దానం, జపం వంటివి భక్తుల పాపాలను తొలగించి వారికి శివానుగ్రహాన్ని ప్రసాదిస్తాయి.”

కార్తీక సోమవార వ్రతాన్ని ఆచరించడానికి ఆరు విధానాలు చెప్పబడ్డాయి. మొదటిది సంపూర్ణ ఉపవాసం, రెండవది ఏకభుక్తం అంటే రోజులో ఒక్కసారే భోజనం చేయడం, మూడవది నక్తవ్రతం అంటే రాత్రి నక్షత్ర దర్శనం తరువాత భోజనం చేయడం, నాలుగవది అయాచిత భోజనం అంటే తాను స్వయంగా ఆహారాన్ని కోరుకోకుండా లభించిన ఆహారాన్ని స్వీకరించడం, ఐదవది స్నానం, ఆరవది తిలాదానం అంటే నువ్వులను దానం చేయడం. ఎవరి శారీరక సామర్థ్యం, ఆరోగ్యం, పరిస్థితులకు అనుగుణంగా వారు తమకు సాధ్యమైన విధానాన్ని ఎంచుకొని ఈ వ్రతాన్ని ఆచరించవచ్చు. ఉపవాసం చేయలేనివారు తమ శక్తికి తగినట్లుగా నియమాలను పాటిస్తూ శివుని ఆరాధించవచ్చు.

కార్తీక సోమవారం నాడు ఉదయాన్నే నదీస్నానం లేదా పవిత్ర స్నానం చేసి, శివాలయానికి వెళ్లి శివలింగానికి అభిషేకం చేయాలి. బిల్వపత్రాలు, పుష్పాలు సమర్పించి, శివనామస్మరణ చేయాలి. రోజంతా భగవంతుని ధ్యానిస్తూ, సత్యం, దయ, దానం, అహింస వంటి సద్గుణాలను పాటించాలి. సాయంత్రం ప్రదోష సమయంలో శివారాధన చేసి, నక్షత్ర దర్శనం అనంతరం భోజనం చేయాలి. వీలైనవారు రాత్రి జాగరణ చేస్తూ శివనామస్మరణ, పురాణ పఠనం చేయాలి. మరుసటి రోజు ఉదయం స్నానం చేసి, తిలాదానం, అన్నదానం వంటి దానధర్మాలను తమ శక్తి మేరకు నిర్వహించాలి.

ఈ సోమవార వ్రత మహిమను వివరించడానికి వశిష్ఠ మహర్షి ఒక పురాతన కథను జనక మహారాజుకు చెప్పసాగాడు.

కాశ్మీర దేశంలో ఒకప్పుడు ఒక బ్రాహ్మణ పురోహితుడు నివసించేవాడు. అతనికి నిష్ఠుర అనే కుమార్తె ఉండేది. ఆమెకు అందం, యవ్వనం ఉన్నప్పటికీ మంచి నడవడిక, సత్ప్రవర్తన, ధర్మాచరణ పట్ల ఆసక్తి ఉండేవి కావు. ఆమె స్వేచ్ఛాచారానికి అలవాటుపడి, దుర్మార్గుల సాంగత్యంలో కాలం గడుపుతూ ఉండేది. ఆమె ప్రవర్తన చూసి తల్లిదండ్రులు, అత్తమామలు కూడా ఆమెకు దూరమయ్యారు.

ఆమెకు సౌరాష్ట్ర దేశానికి చెందిన మిత్రశర్మ అనే బ్రాహ్మణుడితో వివాహం జరిగింది. మిత్రశర్మ వేదవేదాంగాలలో పండితుడు, సత్యనిష్ఠ కలిగినవాడు, దయాగుణం కలవాడు. అతడు ధర్మాన్ని ఆచరిస్తూ, తీర్థయాత్రలు చేస్తూ, సర్వజీవుల పట్ల ప్రేమతో జీవించేవాడు. అయితే అతని భార్య నిష్ఠుర మాత్రం అతని మంచితనాన్ని గుర్తించలేకపోయింది. భర్తను నిరంతరం బాధపెడుతూ, అతనితో కలహిస్తూ ఉండేది. అయినప్పటికీ మిత్రశర్మ తన గృహస్థ ధర్మాన్ని విడిచిపెట్టకుండా ఆమెతోనే జీవించసాగాడు.

కాలక్రమంలో నిష్ఠుర దుర్మార్గులైన కొందరితో సంబంధాలు ఏర్పరచుకుంది. వారు ఇచ్చిన ధనం, ఆభరణాలకు ఆశపడి తన భర్తను హత్య చేయడానికి కూడా సిద్ధపడింది. ఒక రాత్రి భర్త నిద్రిస్తున్న సమయంలో అతని తలపై బండరాయితో కొట్టి చంపింది. అనంతరం అతని మృతదేహాన్ని ఒక పాడుబడిన బావిలో పడవేసి, తన నేరాన్ని దాచిపెట్టింది. ఆ తరువాత కూడా ఆమె దురాచారాలను విడిచిపెట్టకుండా పరుల కుటుంబాలను విచ్ఛిన్నం చేస్తూ, ఇతరుల జీవితాలకు బాధ కలిగిస్తూ, దేవతలను నిందిస్తూ, ధర్మాన్ని పూర్తిగా విస్మరించి జీవించింది.

కొంతకాలానికి ఆమె యవ్వనం క్షీణించింది. శరీరమంతా తీవ్రమైన వ్యాధులు, గాయాలు ఏర్పడ్డాయి. ఆమెను ఆశ్రయించినవారు కూడా దూరమయ్యారు. తన పాపకర్మల ఫలితంగా అనేక బాధలను అనుభవిస్తూ చివరకు ఆమె మరణించింది. మరణించిన తరువాత యమభటులు ఆమెను యమలోకానికి తీసుకువెళ్లారు. అక్కడ ఆమె చేసిన పాపకర్మలకు తగిన నరకయాతనలను అనుభవించవలసి వచ్చింది. అనంతరం ఆమె భూమిపై కుక్కగా జన్మించింది. అలా పదిహేను జన్మలపాటు కుక్కగా పుట్టి, చివరకు కళింగ దేశంలో ఒక బ్రాహ్మణుని ఇంట కుక్కగా జన్మించింది.

ఒకరోజు ఆ బ్రాహ్మణుడు కార్తీక సోమవార వ్రతాన్ని ఎంతో భక్తిశ్రద్ధలతో ఆచరించాడు. ఉదయాన్నే స్నానం చేసి, రోజంతా ఉపవాసం ఉండి, ఇంట్లో శివలింగానికి అభిషేకం చేసి, పూజలు నిర్వహించాడు. సాయంత్రం నక్షత్ర దర్శనం చేసిన తరువాత శివునికి నైవేద్యం సమర్పించి, భూతబలి కోసం కొంత అన్నాన్ని ఇంటి బయట ఉంచాడు. అనంతరం తన నిత్యకర్మలను ముగించుకొని ఇంటిలోకి వెళ్లిపోయాడు.

ఆ ఇంట్లో ఉన్న కుక్క ఆరోజంతా ఆహారం దొరకక ఆకలితో అలమటిస్తూ ఉంది. సాయంత్రం వేళ బ్రాహ్మణుడు ఉంచిన భూతబలిని అది తిన్నది. ఆశ్చర్యకరంగా, ఆ అన్నాన్ని తిన్న వెంటనే ఆ కుక్కకు తన పూర్వజన్మ స్మృతి కలిగింది. గత జన్మలో తాను చేసిన పాపాలు, తన భర్తను హత్య చేసిన సంఘటనలు, అనుభవించిన నరకయాతనలు అన్నీ గుర్తుకు వచ్చాయి. ఆ జ్ఞాపకాలతో భయపడిపోయిన కుక్క, “ఓ బ్రాహ్మణోత్తమా! నన్ను రక్షించండి! నన్ను రక్షించండి!” అంటూ ఆర్తనాదాలు చేసింది. ఆ అరుపులు విన్న బ్రాహ్మణుడు బయటకు వచ్చి ఆశ్చర్యపోయాడు. “ఓ కుక్కా! నీకు ఏమైంది? ఎందుకు నన్ను రక్షించమని వేడుకుంటున్నావు?” అని అడిగాడు.

అప్పుడు ఆ కుక్క తన పూర్వజన్మ వృత్తాంతాన్ని వివరించింది. “ఓ మహాత్మా! నేను పూర్వజన్మలో బ్రాహ్మణ స్త్రీని. నా దురాశ, కామం, అహంకారం కారణంగా ధర్మాన్ని విడిచిపెట్టాను. సద్గుణాలు కలిగిన నా భర్తను హత్య చేశాను. అనేక పాపకార్యాలు చేశాను. వాటి ఫలితంగా యమలోకంలో ఘోరమైన బాధలను అనుభవించాను. తిరిగి భూమిపై పదిహేను జన్మలపాటు కుక్కగా పుట్టాను. ఇప్పుడు నాకు నా పూర్వజన్మల జ్ఞాపకం కలిగింది. ఈ కుక్క జన్మ నుంచి నాకు విముక్తి కలిగే మార్గాన్ని చూపించండి” అని వేడుకుంది.

ఆమె మాటలు విన్న బ్రాహ్మణుడు తన జ్ఞానదృష్టితో అసలు కారణాన్ని గ్రహించాడు. “ఓ జీవీ! ఈ రోజు కార్తీక సోమవారం. నేను శివుని ఆరాధిస్తూ రోజంతా ఉపవాసం ఉన్నాను. నక్షత్ర దర్శనం అనంతరం ఉంచిన భూతబలిని నీవు స్వీకరించావు. కార్తీక సోమవార వ్రత మహిమ వల్ల నీకు పూర్వజన్మ స్మృతి కలిగింది. ఈ పవిత్రమైన రోజు ప్రభావం నీలోని పూర్వజన్మ జ్ఞాపకాలను మేల్కొలిపింది” అని చెప్పాడు.

అప్పుడు ఆ కుక్క బ్రాహ్మణుని పాదాలపై పడి, “ఓ మహాత్మా! నాకు పూర్వజన్మలో చేసిన పాపాల నుంచి విముక్తి కలిగే మార్గం చూపించండి. ఈ హీనమైన జన్మ నుంచి నన్ను ఉద్ధరించండి” అని ప్రార్థించింది.

ఆమె దీనస్థితిని చూసి బ్రాహ్మణుని హృదయం కరుణతో నిండిపోయింది. తాను కార్తీక సోమవారాలలో ఆచరించిన వ్రతం వల్ల పొందిన పుణ్యఫలంలో ఒక సోమవార వ్రత పుణ్యాన్ని ఆ జీవికి ధారపోశాడు. ఆ పుణ్యప్రభావంతో ఆ కుక్క శరీరాన్ని విడిచిపెట్టి దివ్యరూపాన్ని పొందింది. ప్రకాశవంతమైన వస్త్రాలు, ఆభరణాలు, పుష్పమాలలతో అలంకరించబడిన దివ్యశరీరంతో తన పితృదేవతలతో కలిసి కైలాసానికి చేరుకుంది. అక్కడ పార్వతీ పరమేశ్వరుల సన్నిధిలో దివ్యానందాన్ని పొందింది.

ఈ అద్భుతమైన కథను వివరించిన వశిష్ఠ మహర్షి జనక మహారాజుతో ఇలా అన్నాడు. “ఓ రాజా! కార్తీక మాసంలో ఆచరించే సోమవార వ్రతానికి ఉన్న మహిమ అపారమైనది. ఈ వ్రతాన్ని భక్తిశ్రద్ధలతో ఆచరించినవారికి శివానుగ్రహం కలుగుతుంది. ఈ వ్రతం ద్వారా మనిషి తన పాపకర్మల ప్రభావం నుంచి విముక్తి పొందడానికి మార్గాన్ని పొందుతాడు. కాబట్టి నీవు కూడా కార్తీక సోమవార వ్రతాన్ని ఆచరించి శివుని అనుగ్రహాన్ని పొందుము” అని ఉపదేశించాడు.


🪔 ఈ అధ్యాయం అందించే ఆధ్యాత్మిక అంతరార్థం 🪔

ఈ కథలోని నిష్ఠుర జీవితం మనిషి చేసే కర్మలకు తగిన ఫలితాలు తప్పక ఉంటాయని తెలియజేస్తుంది. మనిషికి అందం, సంపద, విద్య, హోదా ఉన్నప్పటికీ వాటితోపాటు సద్గుణాలు, ధర్మబుద్ధి, దయ, కరుణ లేకపోతే ఆ జీవితం పతనమవుతుంది. కామం, క్రోధం, లోభం, మోహం, అహంకారం వంటి అంతర్గత శత్రువులు మనిషిని అధర్మ మార్గంలోకి నడిపిస్తాయి. వాటి ప్రభావంతో చేసిన కర్మలు భవిష్యత్తులో బాధలకు కారణమవుతాయి.

ఈ కథలో బ్రాహ్మణుడు తన వ్రతపుణ్యాన్ని మరొక జీవికి ధారపోయడం అత్యంత ముఖ్యమైన ఆధ్యాత్మిక సందేశం. నిజమైన భక్తి కేవలం వ్యక్తిగత ముక్తి కోసం చేసే సాధన మాత్రమే కాదు. ఇతరుల బాధను అర్థం చేసుకోవడం, వారి పట్ల కరుణ చూపించడం, అవసరమైనప్పుడు మనకు ఉన్న మంచితనాన్ని, పుణ్యఫలాన్ని కూడా పంచాలనే విశాల హృదయాన్ని పెంపొందించుకోవడం కూడా భక్తిలో భాగమే.

కార్తీక సోమవార వ్రతం మనకు ఉపవాసం ద్వారా ఇంద్రియ నిగ్రహాన్ని, శివారాధన ద్వారా మనస్సు ఏకాగ్రతను, జపం ద్వారా అంతరంగ శుద్ధిని, దానం ద్వారా నిస్వార్థ భావాన్ని నేర్పుతుంది. ఉపవాసం అంటే కేవలం ఆహారాన్ని తినకుండా ఉండటం మాత్రమే కాదు; మనలోని దురాలోచనలు, దుర్గుణాలు, స్వార్థం, ద్వేషం వంటి మలినాలను విడిచిపెట్టడం కూడా నిజమైన ఉపవాస భావన.

శివుడు అంటే శుభాన్ని ప్రసాదించేవాడు. ఆయన ఆరాధనలోని అసలైన ఉద్దేశం మనలోని అజ్ఞానాన్ని తొలగించి జ్ఞానాన్ని మేల్కొలపడం. బిల్వపత్ర సమర్పణ, అభిషేకం, దీపారాధన, శివనామస్మరణ వంటి ఆచారాలు మనస్సును పవిత్రం చేసి పరమాత్మ చైతన్యం వైపు నడిపించే సాధనాలుగా భావించాలి.

అందువల్ల కార్తీక సోమవార వ్రతం మనకు తెలియజేసే ప్రధాన సందేశం ఏమిటంటే, భక్తి అనేది ఆచారంలో మాత్రమే కాదు, ఆచరణలో కూడా కనిపించాలి. పూజతోపాటు దయ, ఉపవాసంతోపాటు ఇంద్రియ నిగ్రహం, జపంతోపాటు సత్కర్మ, శివారాధనతోపాటు సర్వజీవుల పట్ల కరుణ కలిగినప్పుడే మన ఆధ్యాత్మిక సాధన పరిపూర్ణతను పొందుతుంది.


✍️ ప్రసాద్ భరద్వాజ

ఓం నమః శివాయ! హర హర మహాదేవ!

ఇతి శ్రీ స్కాంద పురాణాంతర్గత వశిష్ఠ ప్రోక్త కార్తీక మహాత్మ్యే ద్వితీయ అధ్యాయం సమాప్తం.

🌹🌹🌹🌹🌹

కార్తీక మాసం 30 రోజులు - పూజించవలసిన దైవం - చేయవలసిన మంత్రం - దానం (he 30 Days of the Month of Kartika – Deities to Worship)

_🌹. కార్తీక మాసం 30 రోజులు - పూజించవలసిన దైవం - చేయవలసిన మంత్రం - దానం - నైవేద్యం - ఫలితం 🌹_

📚. ప్రసాద్ భరద్వాజ


The 30 Days of the Month of Kartika – Deities to Worship, Mantras to Chant, Acts of Charity, Offerings (Naivedyam), and the Resulting Blessings 🌹

📚. Prasad Bharadwaja




మొదటి రోజు :

నిషిద్ధములు :- ఉల్లి, ఉసిరి, చద్ది. ఎంగిలి. చల్లని వస్తువులు

దానములు :- నెయ్యి, బంగారం

పూజించాల్సిన దైవము :- స్వథా అగ్ని

జపించాల్సిన మంత్రము :- ఓం జాతవేదసే స్వథాపతే స్వాహా

ఫలితము :- తేజోవర్ధనము




2 వరోజు :

నిషిద్ధములు :- తరగబడిన వస్తువులు

దానములు :- కలువపూలు, నూనె, ఉప్పు

పూజించాల్సిన దైవము :- బ్రహ్మ

జపించాల్సిన మంత్రము :- ఓం గీష్పతయే - విరించియే స్వాహా

ఫలితము :- మనః స్థిమితము



3 వ రోజు :

నిషిద్ధములు :- ఉప్పు కలిసినవి, ఉసిరి

దానములు :- ఉప్పు

పూజించాల్సిన దైవము :- పార్వతి

జపించాల్సిన మంత్రము :- ఓం పార్వత్యై - పరమేశ్వర్యై స్వాహా

ఫలితము :- శక్తి, సౌభాగ్యము




4 వ రోజు :

నిషిద్ధములు :- వంకాయ, ఉసిరి

దానములు :- నూనె, పెసరపప్పు

పూజించాల్సిన దైవము :- విఘ్నేశ్వరుడు

జపించాల్సిన మంత్రము :- ఓం గం గణపతయే స్వాహా

ఫలితము :- సద్బుద్ధి, కార్యసిద్ధి




5 వ రోజు :

నిషిద్ధములు :- పులుపుతో కూడినవి

దానములు :- స్వయంపాకం, విసనకర్ర

పూజించాల్సిన దైవము :- ఆదిశేషుడు

జపించాల్సిన మంత్రము :- (మంత్రం అలభ్యం, ప్రాణాయామం చేయాలి)

ఫలితము :- కీర్తి




6 వ రోజు :

నిషిద్ధములు :- ఇష్టమైనవి, ఉసిరి

దానములు :- చిమ్మిలి

పూజించాల్సిన దైవము :- సుబ్రహ్మణ్యేశ్వరుడు

జపించాల్సిన మంత్రము :- ఓం సుం.బ్రం. సుబ్రహ్మణ్యాయ స్వాహా

ఫలితము :- సర్వసిద్ధి, సత్సంతానం, జ్ఞానలబ్ధి




7 వ రోజు :

నిషిద్ధములు :- పంటితో తినే వస్తువులు, ఉసిరి

దానములు :- పట్టుబట్టలు, గోధుమలు, బంగారం

పూజించాల్సిన దైవము :- సూర్యుడు

జపించాల్సిన మంత్రము :- ఓం. భాం. భానవే స్వాహా

ఫలితము :- తేజస్సు, ఆరోగ్యం




8 వ రోజు :

నిషిద్ధములు :- ఉల్లి, ఉసిరి, మద్యం, మాంసం

దానములు :- తోచినవి - యథాశక్తి

పూజించాల్సిన దైవము :- దుర్గ

జపించాల్సిన మంత్రము :- ఓం - చాముండాయై విచ్చే - స్వాహా

ఫలితము :- ధైర్యం, విజయం




9 వ రోజు :

నిషిద్ధములు :- నూనెతో కూడిన వస్తువులు, ఉసిరి

దానములు :- మీకు ఇష్టమైనవి పితృ తర్పణలు

పూజించాల్సిన దైవము :- అష్టవసువులు - పితృ దేవతలు

జపించాల్సిన మంత్రము :- ఓం అమృతాయ స్వాహా - పితృదేవతాభ్యో నమః

ఫలితము :- ఆత్మరక్షణ, సంతాన రక్షణ




10 వ రోజు :

నిషిద్ధములు :- గుమ్మడికాయ, నూనె, ఉసిరి

దానములు :- గుమ్మడికాయ, స్వయంపాకం, నూనె

పూజించాల్సిన దైవము :- దిగ్గజాలు

జపించాల్సిన మంత్రము :- ఓం మహామదేభాయ స్వాహా

ఫలితము :- యశస్సు - ధనలబ్ధి




11 వ రోజు :

నిషిద్ధములు :- పులుపు, ఉసిరి

దానములు :- వీభూదిపండ్లు, దక్షిణ

పూజించాల్సిన దైవము :- శివుడు

జపించాల్సిన మంత్రము :- ఓం రుద్రాయస్వాహా, ఓం నమశ్శివాయ

ఫలితము :- ధనప్రాప్తి, పదవీలబ్ధి




12 వ రోజు :

నిషిద్ధములు :- ఉప్పు, పులుపు, కారం, ఉసిరి

దానములు :- పరిమళద్రవ్యాలు, స్వయంపాకం, రాగి, దక్షిణ

పూజించాల్సిన దైవము:- భూదేవీసహిత శ్రీమహావిష్ణు లేక కార్తీక దామోదరుడు

జపించాల్సిన మంత్రము :- ఓం భూర్భువర్విష్ణవే వరాహాయ కార్తీక దామోదరాయ స్వాహా

ఫలితము :- బంధవిముక్తి, జ్ఞానం, ధన ధాన్యాలు




13 వ రోజు :

నిషిద్ధములు :- రాత్రి భోజనం, ఉసిరి

దానములు :- మల్లె, జాజి వగైరా పూవులు, వనభోజనం

పూజించాల్సిన దైవము :- మన్మధుడు

జపించాల్సిన మంత్రము :- ఓం శ్రీ విరిశరాయ నమః స్వాహా

ఫలితము :- వీర్యవృద్ధి, సౌందర్యం.




14 వ రోజు :

నిషిద్ధములు :- ఇష్టమైన వస్తువులు, ఉసిరి

దానములు :- నువ్వులు, ఇనుము, దున్నపోతు లేదా గేదె

పూజించాల్సిన దైవము :- యముడు

జపించాల్సిన మంత్రము:- ఓం తిలప్రియాయ సర్వ సంహార హేతినే స్వాహా

ఫలితము :- అకాలమృత్యువులు తొలగుట




15వ రోజు :

నిషిద్ధములు :- తరగబడిన వస్తువులు

దానములు :- కలువపూలు, నూనె, ఉప్పు

'ఓం శ్రీ తులసీథాత్రీ సమేత కార్తీక దామోదరాయ నమః'




16 వ రోజు :

నిషిద్ధములు :- ఉల్లి, ఉసిరి, చద్ది ,ఎంగిలి, చల్ల

దానములు :- నెయ్యి, సమిధలు, దక్షిణ, బంగారం

పూజించాల్సిన దైవము :- స్వాహా అగ్ని

జపించాల్సిన మంత్రము:- ఓం స్వాహాపతయే జాతవేదసే నమః

ఫలితము :- వర్చస్సు, తేజస్సు ,పవిత్రత.




17 వ రోజు :

నిషిద్ధములు:- ఉల్లి, ఉసిరి, చద్ది, ఎంగిలి, చల్ల మరియు తరిగిన వస్తువులు

దానములు :- ఔషధాలు, ధనం

పూజించాల్సిన దైవము :- అశ్వినీ దేవతలు

జపించాల్సిన మంత్రము :- ఓం అశ్విన్యౌవైద్యౌ తేనమః స్వాహా

ఫలితము :- సర్వవ్యాధీనివారణం ఆరోగ్యం




18 వ రోజు :

నిషిద్ధములు :- ఉసిరి

దానములు :- పులిహార, అట్లు, బెల్లం

పూజించాల్సిన దైవము :- గౌరి

జపించాల్సిన మంత్రము :- ఓం గగగగ గౌర్త్యె స్వాహా

ఫలితము :- అఖండ సౌభాగ్య ప్రాప్తి




19 వ రోజు :

నిషిద్ధములు :- నెయ్యి, నూనె, మద్యం, మాంసం, మైధునం, ఉసిరి

దానములు :- నువ్వులు, కుడుములు

పూజించాల్

సిన దైవము:- వినాయకుడు

జపించాల్సిన మంత్రము :- ఓం గం గణపతయే స్వాహా

ఫలితము :- విజయం, సర్వవిఘ్న నాశనం




20 వ రోజు :

నిషిద్ధములు :- పాలుతప్ప - తక్కినవి

దానములు :- గో, భూ, సువర్ణ దానాలు

పూజించాల్సిన దైవము :- నాగేంద్రుడు

జపించాల్సిన మంత్రము :- ఓం సర్పాయ మహాసర్పాయ దివ్యసర్వాయపాతుమాం

ఫలితము :- గర్భదోష పరిహరణం, సంతానసిద్ధి




21 వ రోజు :

నిషిద్ధములు :- ఉల్లి, ఉసిరి, ఉప్పు, పులుపు, కారం

దానములు :- యథాశక్తి సమస్త దానాలూ

పూజించాల్సిన దైవము :- కుమారస్వామి

జపించాల్సిన మంత్రము :- ఓం సాం శరవణ భవాయ కుమారాయ స్వాహా

ఫలితము :- సత్సంతానసిద్ధి, జ్ఞానం, దిగ్విజయం




22 వ రోజు :

నిషిద్ధములు :- పంటికి పనిచెప్పే పదార్ధాలు, ఉసిరి

దానములు :- బంగారం, గోధుమలు, పట్టుబట్టలు

పూజించాల్సిన దైవము :- సూర్యుడు

జపించాల్సిన మంత్రము :- ఓం సూం - సౌరయే స్వాహా, ఓం భాం - భాస్కరాయ స్వాహా

ఫలితము :- ఆయురారోగ్య తేజో బుద్ధులు




23 వ రోజు :

నిషిద్ధములు :- ఉసిరి, తులసి

దానములు :- మంగళ ద్రవ్యాలు

పూజించాల్సిన దైవము :- అష్టమాతృకలు

జపించాల్సిన మంత్రము :- ఓం శ్రీమాత్రే నమః , అష్టమాతృ కాయ స్వాహా

ఫలితము :- మాతృరక్షణం, వశీకరణం




24 వ రోజు :

నిషిద్ధములు :- మద్యమాంస మైధునాలు, ఉసిరి

దానములు:- ఎర్రచీర, ఎర్ర రవికెలగుడ్డ, ఎర్రగాజులు, ఎర్రపువ్వులు

పూజించాల్సిన దైవము :- శ్రీ దుర్గ

జపించాల్సిన మంత్రము :- ఓం అరిషడ్వర్గవినాశిన్యై నమః శ్రీ దుర్గాయై స్వాహా

ఫలితము :- శక్తిసామర్ధ్యాలు, ధైర్యం, కార్య విజయం




25 వ రోజు :

నిషిద్ధములు :- పులుపు, చారు - వగయిరా ద్రవపదార్ధాలు

దానములు :- యథాశక్తి

పూజించాల్సిన దైవము :- దిక్వాలకులు

జపించాల్సిన మంత్రము :- ఓం ఈశావాస్యాయ స్వాహా

ఫలితము :- అఖండకీర్తి, పదవీప్రాప్తి




26 వ రోజు :

నిషిద్ధములు :- సమస్త పదార్ధాలు

దానములు :- నిలవవుండే సరుకులు

పూజించాల్సిన దైవము :- కుబేరుడు

జపించాల్సిన మంత్రము :- ఓం కుబేరాయవై శ్రవణాయ మహారాజాయ స్వాహా

ఫలితము :- ధనలబ్ది, లాటరీవిజయం, సిరిసంపదలభివృద్ధి




27 వ రోజు :

నిషిద్ధములు :- ఉల్లి, ఉసిరి, వంకాయ

దానములు :- ఉసిరి, వెండి, బంగారం, ధనం, దీపాలు

పూజించాల్సిన దైవము :- కార్తీక దామోదరుడు

జపించాల్సిన మంత్రము :- ఓం శ్రీభూతులసీ ధాత్రీసమేత కార్తీక దామోదరాయ స్వాహా

ఫలితము :- మహాయోగం, రాజభోగం, మోక్షసిద్ధి




28 వ రోజు :

నిషిద్ధములు :- ఉల్లి, ఉసిరి, సొర, గుమ్మడి ,వంకాయ

దానములు :- నువ్వులు, ఉసిరి

పూజించాల్సిన దైవము :- ధర్ముడు

జపించాల్సిన మంత్రము :- ఓం ధర్మాయ, కర్మనాశాయ స్వాహా

ఫలితము :- దీర్ఘకాల వ్యాధీహరణం




29 వ రోజు :

నిషిద్ధములు :- పగటి ఆహారం, ఉసిరి

దానములు :- శివలింగం, వీభూది పండు, దక్షిణ, బంగారం

పూజించాల్సిన దైవము :- శివుడు (మృత్యుంజయుడు)

జపించాల్సిన మంత్రము :- ఓంత్రియంబకం యజామహే సుగంధం పుష్టివర్ధనం,

ఉర్వారుకమివ బంధనాన్తృత్యో ర్ముక్షీయ మామృతాత్

ఫలితము :- అకాలమృత్యుహరణం, ఆయుర్వృద్ధి, ఆరోగ్యం, ఐశ్వర్యం




30 వ రోజు :

నిషిద్ధములు :- పగటి ఆహారం, ఉసిరి

దానములు :- నువ్వులు, తర్పణలు, ఉసిరి

పూజించాల్సిన దైవము :- సర్వదేవతలు + పితృ దేవతలు

జపించాల్సిన మంత్రము :- ఓం అమృతాయ స్వాహా మమసమస్త పితృదేవతాభ్యో నమః

ఫలితము :- ఆత్మస్థయిర్యం, కుటుంబక్షేమం


🍓🍓🍓🍓🍓🍓🍓🍓🍓🍓🍓🍓

శ్రీ శివ కేశవ అష్టోత్తర శతనామావళీ (యమకృతం) - కార్తీక మాసంలో విశేష ఫలితాలను ఇచ్చే / Shiva Keshava Ashtotharam

https://youtu.be/i6ILOiB826c


🌹 కార్తీక మాసంలో విశేష ఫలితాలను ఇచ్చే శ్రీ శివ కేశవ అష్టోత్తర శతనామావళీ (యమకృతం) -
Shiva Keshava Ashtotharam తప్పక వీక్షించండి, పఠించండి. 🌹

ప్రసాద్‌ భరధ్వాజ

🌹🌹🌹🌹🌹

శ్రీ కార్తీక పురాణం 1వ అధ్యాయం – కార్తీక మాస మహాత్మ్యం / Karthika Puranam - 1st Chapter - Mahathyam

https://youtu.be/z6ZnvOR7sF8

🌹 శ్రీ కార్తీక పురాణం 1వ అధ్యాయం – కార్తీక మాస మహాత్మ్యం Karthika Puranam - 1st Chapter - Mahathyam 🌹

ప్రసాద్ భరద్వాజ

Like, Subscribe and Share

🌹🌹🌹🌹🌹

శ్రీ కార్తీక పురాణం - ప్రథమ అధ్యాయం – కార్తీక మాస మహాత్మ్యం - కార్తీక మాస వ్రత విధానం .... (Sri Kartika Purana - First Chapter – Kartika Masa Mahatmyam)

https://www.facebook.com/groups/chaitanyavijnanam/posts/2306241373495664

🌹🪔 1. శ్రీ కార్తీక పురాణం - ప్రథమ అధ్యాయం – కార్తీక మాస మహాత్మ్యం🪔 🌹

🪔 కార్తీక మాస వ్రత విధానం, కార్తీక స్నాన విధానం, కార్తీక దీపారాధన మహిమ, మాస ఆధ్యాత్మిక సందేశం 🪔

✍️ ప్రసాద్ భరద్వాజ


ఓం శ్రీ గణేశాయ నమః । ఓం నమః శివాయ । ఓం నమో భగవతే వాసుదేవాయ ।

కార్తీక మాసం సర్వమాసాలలో అత్యంత పవిత్రమైనదిగా, విశిష్టమైనదిగా పురాణాలు పేర్కొన్నాయి. ఈ మాసంలో చేసే స్నానం, దానం, జపం, తపస్సు, దీపారాధన, భగవన్నామస్మరణం విశేషమైన పుణ్యఫలాలను ప్రసాదిస్తాయని శాస్త్రవచనం.


🍀 ప్రథమాధ్యాయం 🍀

ఒకప్పుడు నైమిశారణ్యంలో శౌనకాది మహర్షులు సత్రయాగం చేస్తూ, సూత మహాముని వద్దకు వచ్చి భక్తితో నమస్కరించి ఇలా ప్రార్థించారు. "ఓ మహాత్మా! తమరి ద్వారా ఎన్నో పురాణేతిహాసాలను, వేదవేదాంగాల రహస్యాలను తెలుసుకున్నాము. ఇప్పుడు సకల పాపాలను తొలగించి, పుణ్యఫలాలను ప్రసాదించే కార్తీక మాస మహాత్మ్యాన్ని వినాలని మా కోరిక. ఈ పవిత్ర మాసం యొక్క విశిష్టతను, ఈ మాసంలో ఆచరించవలసిన ధర్మాలను, కార్తీక వ్రతం యొక్క ఫలితాలను మాకు వివరించవలసిందిగా కోరుతున్నాము" అని అడిగారు.

శౌనకాది మహర్షుల మాటలను విన్న సూత మహాముని ఎంతో సంతోషించి ఇలా చెప్పసాగాడు. "ఓ మహర్షులారా! మీరు అడిగిన ప్రశ్న ఎంతో పవిత్రమైనది. కార్తీక మాస మహిమను గతంలో వసిష్ఠ మహర్షి జనక మహారాజుకు, బ్రహ్మదేవుడు నారద మహర్షికి, పరమశివుడు పార్వతీదేవికి, శ్రీమహావిష్ణువు లక్ష్మీదేవికి వివరించారు. అటువంటి మహిమాన్వితమైన కార్తీక మాస వృత్తాంతాన్ని మీకు వివరిస్తాను. భక్తిశ్రద్ధలతో శ్రద్ధగా వినండి. ఈ మహాత్మ్యాన్ని వినడం వల్ల జన్మజన్మాంతరాలలో చేసిన పాపాలు తొలగి, పుణ్యఫలాలు కలుగుతాయి" అని పలికాడు.

అదే సమయంలో పరమశివుడు పార్వతీదేవికి కార్తీక వ్రత మహిమను వివరిస్తూ, "దేవీ! నీవు అడిగిన వ్రతం స్కాంద పురాణంలో వివరించబడింది. మిథిలా నగరంలో వసిష్ఠ మహర్షి జనక మహారాజుకు ఈ వ్రత విశిష్టతను ఉపదేశించబోతున్నాడు. ఆ వృత్తాంతాన్ని ఆలకించు" అని చెప్పాడు.

అప్పుడు మిథిలా నగరంలో జనక మహారాజు వద్దకు వసిష్ఠ మహర్షి విచ్చేశారు. మహర్షిని చూసిన జనకుడు ఎంతో ఆనందించి సింహాసనం నుంచి లేచి, భక్తితో నమస్కరించి, అర్ఘ్యపాద్యాలతో సత్కరించి, పాదపూజ చేసి ఆ పాదోదకాన్ని తన శిరస్సుపై చల్లుకున్నాడు. అనంతరం "మహర్షీ! తమ రాకతో నా జన్మ ధన్యమైంది. నా రాజ్యం, నా ప్రజలు, నా గృహం పవిత్రమయ్యాయి. తమరు మా నగరానికి విచ్చేయడానికి గల కారణాన్ని సెలవివ్వండి" అని ప్రార్థించాడు.

అందుకు వసిష్ఠ మహర్షి "జనక మహారాజా! నేను ఒక మహాయజ్ఞాన్ని నిర్వహించాలని సంకల్పించాను. ఆ యజ్ఞానికి అవసరమైన ధనసహాయం, ఇతర సహాయాలను పొందడానికి నీ వద్దకు వచ్చాను" అని అన్నారు. జనకుడు అందుకు అంగీకరిస్తూ, "మహర్షీ! తమరు కోరిన సహాయాన్ని తప్పకుండా అందిస్తాను. అయితే చాలాకాలంగా నా మనస్సులో ఒక సందేహం ఉంది. సంవత్సరంలోని పన్నెండు మాసాలలో కార్తీక మాసానికే ఎందుకు అంతటి విశిష్టత కలిగింది? ఈ మాసం యొక్క మహిమ ఏమిటి? దీనిని ఆచరించడం వల్ల కలిగే పుణ్యఫలాలు ఏమిటి? దయచేసి వివరించండి" అని అడిగాడు.

జనక మహారాజు ప్రశ్నకు వసిష్ఠ మహర్షి సంతోషించి, "రాజా! నీవు అడిగిన ప్రశ్న ఎంతో ఉత్తమమైనది. కార్తీక మాసం హరిహర స్వరూపమైన పవిత్ర మాసం. ఈ మాసంలో ఆచరించే వ్రతం సకల పాపాలను తొలగించి, మానవులకు ఇహలోక సుఖాలను, పరలోక శ్రేయస్సును ప్రసాదిస్తుంది. ఈ వ్రతాన్ని ఆచరించడమే కాకుండా, దాని మహిమను శ్రద్ధగా వినడం వల్ల కూడా పుణ్యఫలం లభిస్తుంది. వయస్సు, వర్ణం, కులం అనే భేదాలు లేకుండా ప్రతి ఒక్కరూ ఆచరించదగిన మహోన్నతమైన వ్రతం ఇది" అని వివరించడం ప్రారంభించారు.


🛕 కార్తీక మాస వ్రత విధానం 🛕

"ఓ జనక మహారాజా! కార్తీక మాసంలో సూర్యుడు తులారాశిలో సంచరించే సమయంలో, ప్రతి ఒక్కరూ సూర్యోదయానికి ముందే నిద్రలేచి కాలకృత్యాలు తీర్చుకొని పవిత్ర స్నానం ఆచరించాలి. అనంతరం దానధర్మాలు, దేవతారాధనలు చేయాలి. కార్తీక మాసం ప్రారంభమైనప్పటి నుంచి ప్రతిరోజూ విష్ణుసహస్రనామ పారాయణం, శివలింగార్చన, హరిహర నామస్మరణం భక్తిశ్రద్ధలతో నిర్వహించాలి. ముందుగా ఈ మాసానికి అధిదేవత అయిన శ్రీదామోదరుని స్మరించి, 'ఓ దామోదరా! నేను భక్తితో ఆచరించబోయే కార్తీక వ్రతానికి ఎటువంటి ఆటంకాలు కలగకుండా నన్ను అనుగ్రహించు' అని ప్రార్థించి వ్రతాన్ని ప్రారంభించాలి."


🛀 కార్తీక స్నాన విధానం 🛀

"రాజా! కార్తీక వ్రతాన్ని ఆచరించేవారు ప్రతిరోజూ సూర్యోదయానికి ముందే నిద్రలేచి, నదికి లేదా పవిత్ర జలాశయానికి వెళ్లి స్నానం చేయాలి. స్నానానికి ముందు గంగాదేవిని, శ్రీమహావిష్ణువును, పరమశివుడిని, భైరవుడిని భక్తితో స్మరించాలి. సంకల్పం చెప్పుకొని పవిత్ర జలాల్లో స్నానం ఆచరించిన తరువాత సూర్యభగవానుడికి అర్ఘ్యప్రదానం చేయాలి. పితృదేవతలకు శాస్త్రోక్తంగా తర్పణాలు సమర్పించాలి. అనంతరం నదీతీరంలో పితృదేవతలను స్మరించి జలాన్ని సమర్పించాలి."

"ఈ కార్తీక మాసంలో గంగ, గోదావరి, కృష్ణ, కావేరి, తుంగభద్ర, యమున వంటి పవిత్ర నదులలో ఏ ఒక్క నదిలో స్నానం చేసినా విశేష పుణ్యఫలం లభిస్తుంది. స్నానం అనంతరం శుభ్రమైన వస్త్రాలను ధరించి, శ్రీమహావిష్ణువుకు ప్రీతికరమైన పుష్పాలతో ధూపదీప నైవేద్యాలు సమర్పించి పూజించాలి. భగవంతునికి గంధం, పుష్పాలు సమర్పించి, భక్తితో నమస్కరించాలి. అనంతరం అతిథులను, అభ్యాగతులను గౌరవించి, వారికి ప్రసాదం అందించాలి. ఇంటి వద్దగానీ, దేవాలయంలోగానీ, రావిచెట్టు సమీపంలోగానీ కూర్చొని కార్తీక పురాణాన్ని పఠించాలి లేదా శ్రద్ధగా వినాలి."


🪔 కార్తీక దీపారాధన మహిమ 🪔

"సాయంకాలం సంధ్యావందనం, నిత్యకర్మలు పూర్తిచేసిన తరువాత శివాలయంలోగానీ, విష్ణు ఆలయంలోగానీ, తులసి కోట వద్దగానీ భక్తితో దీపారాధన చేయాలి. శక్తిని బట్టి నైవేద్యాన్ని తయారుచేసి భగవంతునికి సమర్పించాలి. ఆ ప్రసాదాన్ని ఇతరులకు పంచిపెట్టి, అనంతరం తాను స్వీకరించాలి. మరుసటి రోజు శక్తిని బట్టి అన్నదానం చేసి, సమస్త జీవుల పట్ల దయాభావాన్ని కలిగి ఉండాలి."

ఇలా కార్తీక మాసమంతా నియమ నిష్ఠలతో వ్రతాన్ని ఆచరించే స్త్రీలు, పురుషులు ఈ జన్మలో చేసిన పాపాలే కాకుండా, పూర్వజన్మలలో చేసిన పాపకర్మల నుంచి కూడా విముక్తి పొంది, మోక్షప్రాప్తికి అర్హులవుతారు. ఈ వ్రతాన్ని స్వయంగా ఆచరించే అవకాశం లేనివారు, భక్తితో వ్రతాన్ని ఆచరించే వారిని దర్శించి నమస్కరించినా పుణ్యఫలాన్ని పొందుతారు అని వసిష్ఠ మహర్షి జనక మహారాజుకు కార్తీక మాస మహాత్మ్యాన్ని వివరించారు.

ఈ విధంగా సూత మహాముని శౌనకాది మహర్షులకు కార్తీక మాస మహిమను వివరించాడు.


🌺 ఈ అధ్యాయం యొక్క ఆధ్యాత్మిక సందేశం. 🌺

కార్తీక మాసం కేవలం స్నానాలు, పూజలు, దీపారాధనలకే పరిమితమైనది కాదు. శరీర శుద్ధితో పాటు మనస్సును పవిత్రం చేసుకోవడం, ఇంద్రియ నిగ్రహం, దానధర్మాలు, జీవకారుణ్యం, హరిహర తత్త్వాన్ని స్మరించడం ఈ మాసంలోని ముఖ్యమైన ఆధ్యాత్మిక సాధనలు.

ఇతి శ్రీ స్కాంద పురాణాంతర్గత కార్తీక మాహాత్మ్యే ప్రథమాధ్యాయం సంపూర్ణం.

🌹 🌹 🌹 🌹 🌹

దీపావళి అంటే ఏమిటి What is Diwali?

https://youtube.com/shorts/xLI4fMkomnY

🌹 దీపావళి అంటే ఏమిటి What Deepavali means Do you know? 🌹

ప్రసాద్ భరద్వాజ

Like, Subscribe and Share

🌹 🌹 🌹 🌹 🌹

దీపావళి పండుగ శుభాకాంక్షలు అందరికి. / Wishing everyone a very Happy Diwali!

🌹🪔🔥 దీపావళి పండుగ శుభాకాంక్షలు అందరికి. / Wishing everyone a very Happy Diwali! 🔥🪔🌹

మనలోని అహంకారం, దుర్గుణాలు అనే నరకాసుర తత్త్వాన్ని జ్ఞానం, వివేకం, ధర్మాచరణతో సంహరించుకున్నప్పుడే నిజమైన దీపావళి సాధ్యమవుతుంది.

🔥🔥🔥🔥🔥🔥🔥




Watch అగస్త్య కృత శ్రీ లక్ష్మీ స్తోత్రం - తాత్పర్య సహితం

AGASTYA KRUTA SRI MAHA LAKSHMI STOTRAM with MEANING

https://youtu.be/tBiiiqL6GCE

ఈ స్తోత్రమును పఠించు వారికి సంతాపము, దారిద్రము, ప్రియ వియోగము, సంపత్తి క్షయము ఉండవు.

🌹 🌹 🌹 🌹 🌹

దీపావళి పండుగ ఆధ్యాత్మిక విశిష్టత (The Spiritual Significance of the Festival of Diwali/Deepavali)

https://www.facebook.com/groups/chaitanyavijnanam/posts/2303847577068377

🌹🪔 దీపావళి పండుగ ఆధ్యాత్మిక విశిష్టత – జ్ఞానజ్యోతి, ఆధ్యాత్మిక చైతన్యం, త్రిమూర్తుల స్వరూపం, అజ్ఞానంపై జ్ఞాన విజయం 🪔🌹

🍀🪔 దీపావళి శుభాకాంక్షలు అందరికి. Deepavali Greetings to All 🪔🍀

✍️ ప్రసాద్ భరద్వాజ


దీపావళి భారతీయ సంస్కృతిలో అత్యంత పవిత్రమైన పండుగలలో ఒకటి. దీపాల వెలుగులతో ఇళ్లను, ఆలయాలను అలంకరించి ఆనందోత్సాహాలతో జరుపుకునే ఈ పండుగ కేవలం బాహ్య కాంతికి సంబంధించినది మాత్రమే కాదు. మనిషి అంతరంగంలోని అజ్ఞానమనే చీకటిని తొలగించి, జ్ఞానమనే వెలుగును నింపుకోవాలని బోధించే గొప్ప ఆధ్యాత్మిక పర్వదినం.

చీకటి నిరాశకు, నిస్పృహకు, అజ్ఞానానికి ప్రతీక. వెలుగు ఆనందానికి, ఆశకు, విజ్ఞానానికి ప్రతీక. మనిషి జీవితంలో ఎన్ని భౌతిక సంపదలు ఉన్నప్పటికీ జ్ఞానమనే వెలుగు లేకపోతే అతని జీవితం అంధకారంలోనే ఉంటుంది. అందుకే దీపావళి మనకు అందించే సందేశం – అజ్ఞానమనే చీకటి నుంచి జ్ఞానమనే వెలుగులోకి ప్రయాణించి, మన అంతరంగాన్ని సద్గుణాలతో ప్రకాశింపజేసుకోవాలి.


🪔 దీపం – త్రిమూర్తుల స్వరూపం, దైవశక్తికి ప్రతీక

'దీపావళి' అంటే దీపాల వరుస. హిందూ సంప్రదాయంలో దీపానికి అత్యంత విశిష్టమైన స్థానం ఉంది. ఏ శుభకార్యాన్ని ప్రారంభించినా ముందుగా దీపాన్ని వెలిగించడం మన ఆచారం. దీపం జ్ఞానానికి, పవిత్రతకు, దైవసాన్నిధ్యానికి ప్రతీక.

ఆధ్యాత్మిక సంప్రదాయాల్లో దీపజ్యోతిని త్రిమూర్తుల స్వరూపంగా భావిస్తారు. దీపంలోని కాంతిని బ్రహ్మ, విష్ణు, మహేశ్వరుల సృష్టి, స్థితి, లయ తత్త్వాలకు ప్రతీకగా వివరిస్తారు. అదేవిధంగా దీపం మహాలక్ష్మి, మహాసరస్వతి, మహాదుర్గాదేవి అనుగ్రహాలకు కూడా సంకేతం. లక్ష్మీదేవి ఐశ్వర్యాన్ని, సరస్వతీదేవి జ్ఞానాన్ని, దుర్గాదేవి శక్తిని ప్రసాదిస్తారు.

ఒక దీపం మరొక దీపాన్ని వెలిగించినప్పుడు తన వెలుగును కోల్పోదు. అలాగే మనం ఇతరులకు జ్ఞానాన్ని, ప్రేమను, ఆనందాన్ని పంచినప్పుడు మనలోని సంపద మరింత పెరుగుతుంది. అందుకే దీపావళి రోజున దీపాలు వెలిగించడం ద్వారా మనలోని దైవత్వాన్ని మేల్కొలుపుకోవాలి.


🌺 దీపావళి – లక్ష్మీ ఆరాధన, అలక్ష్మి పరిహారం

దీపావళికి మహాలక్ష్మీ ఆరాధనతో విడదీయలేని సంబంధం ఉంది. లక్ష్మీదేవి కేవలం ధనానికి మాత్రమే కాకుండా సౌభాగ్యం, ఆరోగ్యం, శాంతి, సంతోషం, ఐశ్వర్యాలకు ప్రతీక.

సంపద అంటే బంగారం, ధనం, ఆస్తులు మాత్రమే కాదు. మంచి ఆరోగ్యం, జ్ఞానం, కుటుంబ ఐక్యత, సత్సంబంధాలు, సంతృప్తి, దైవభక్తి కూడా నిజమైన సంపదలే.

అలక్ష్మి అంటే దారిద్ర్యం, అశాంతి, అసంతృప్తి, కలహాలకు ప్రతీకగా భావిస్తారు. మన ఇంటిలో శుభ్రత, పవిత్రత, ప్రేమ, పరస్పర గౌరవం, ధర్మాచరణ ఉన్నప్పుడు లక్ష్మీతత్త్వం పరిఢవిల్లుతుంది.

అందుకే దీపావళి సందర్భంగా ఇంటిని శుభ్రపరచి, దీపాలు వెలిగించి, లక్ష్మీదేవిని ఆరాధిస్తారు. ఇంటిలోని ధూళిని తొలగించినట్లే మనస్సులోని అసూయ, ద్వేషం, అహంకారం, స్వార్థం వంటి మలినాలను కూడా తొలగించుకోవాలి. ధర్మబద్ధంగా సంపాదించడం, దానధర్మాలు చేయడం, ఇతరులకు సహాయం చేయడం – ఇవే నిజమైన లక్ష్మీ ఆరాధనలో భాగాలు.


🙏 దీపావళి అభ్యంగన స్నానం – ఆధ్యాత్మిక విశిష్టత

దీపావళి పర్వదినాన తెల్లవారుజామున చేసే అభ్యంగన స్నానానికి ప్రత్యేకమైన ప్రాముఖ్యత ఉంది. సాంప్రదాయ విశ్వాసం ప్రకారం, ఈ రోజున నువ్వుల నూనెలో లక్ష్మీదేవి, స్నాన జలాల్లో గంగాదేవి సాన్నిధ్యం ఉంటుందని చెబుతారు.

తైలే లక్ష్మీర్జలే గంగా దీపావళ్యాం వసేత్ సదా । అలక్ష్మీ పరిహారార్థం అభ్యంగస్నానమాచరేత్ ॥ğ

అందువల్ల దీపావళి రోజున తెల్లవారుజామున నిద్రలేచి నువ్వుల నూనెతో అభ్యంగనం చేసి, సంప్రదాయ పద్ధతిలో స్నానం ఆచరిస్తారు.

గంగాస్నానం పాప పరిహారానికి ప్రతీకగా భావించబడుతుంది. ఇక్కడ పాపం అంటే మనం తెలిసి తెలియక చేసిన తప్పులు, ఇతరులకు కలిగించిన బాధలు, మనలో పేరుకుపోయిన దురాలోచనలు కూడా. వాటిని గుర్తించి పశ్చాత్తాపంతో సరిదిద్దుకోవడమే నిజమైన ప్రాయశ్చిత్తం.

ఈ ఆచారం మనకు శరీరశుద్ధితో పాటు మనస్సు, ఆలోచనలు, ప్రవర్తనలను కూడా పవిత్రం చేసుకోవాలని గుర్తుచేస్తుంది.


🔱 నరకాసుర వధ – చెడుపై మంచి సాధించిన విజయం

దీపావళి పండుగ వెనుక ఉన్న ప్రధాన పురాణగాథల్లో నరకాసుర వధ ఒకటి. పురాణాల ప్రకారం, భూదేవి, వరాహస్వామికి జన్మించిన నరకాసురుడు బ్రహ్మదేవుని వరప్రభావంతో అత్యంత శక్తివంతుడయ్యాడు. తన తల్లి చేతిలోనే మరణం సంభవించేలా వరం పొందాడు. వరగర్వంతో దేవతలను, ఋషులను, ప్రజలను హింసిస్తూ లోకకంటకుడిగా మారాడు. అప్పుడు శ్రీకృష్ణుడు తన భార్య సత్యభామతో కలిసి యుద్ధం చేసి నరకాసురుడిని సంహరించాడు. సత్యభామ భూదేవి అంశగా అవతరించిందని పురాణ సంప్రదాయం చెబుతుంది. నరకాసురుని మరణంతో ప్రజలు ఆనందంగా దీపాలు వెలిగించి విజయోత్సవం జరుపుకున్నారని కథనం.

ఈ కథలోని అంతరార్థం ఎంతో గొప్పది. నరకాసురుడు మనలోని అహంకారం, దురాశ, క్రూరత్వం, అధర్మానికి ప్రతీక. శ్రీకృష్ణుడు, సత్యభామ ధర్మశక్తికి, దైవచైతన్యానికి ప్రతీకలు.

మనలోని అహంకారం, దుర్గుణాలు అనే నరకాసుర తత్త్వాన్ని జ్ఞానం, వివేకం, ధర్మాచరణతో సంహరించుకున్నప్పుడే నిజమైన దీపావళి సాధ్యమవుతుంది.


🌼 దీపావళి అమావాస్య – పితృదేవతల స్మరణ, జీవోన్నతి

అమావాస్య తిథికి హిందూ సంప్రదాయంలో ప్రత్యేకమైన ప్రాముఖ్యత ఉంది. పితృదేవతలను స్మరించుకోవడం, వారికి కృతజ్ఞతలు తెలియజేయడం, తర్పణాది కర్మలు ఆచరించడం వంటి ఆచారాలు అమావాస్యతో ముడిపడి ఉన్నాయి.

దీపావళి అమావాస్యలో ఒకవైపు మహాలక్ష్మీ ఆరాధన, మరోవైపు పితృదేవతల స్మరణ అనే రెండు ఆధ్యాత్మిక భావనలు సమన్వయమవుతాయి.

అలాగే దీపావళి మనిషికి జీవోన్నతి సాధించుకునే అవకాశంగా భావించాలి. సూర్యోదయానికి ముందే నిద్రలేవడం, సంధ్యాసమయంలో దీపారాధన చేయడం, నిత్య దైవస్మరణ, ధర్మబద్ధమైన జీవనం, దానధర్మాలు వంటి ఆచారాలు మన జీవితాన్ని క్రమశిక్షణతో నడిపిస్తాయి.

తెలిసి తెలియక చేసిన తప్పులను గుర్తించి, వాటిని పునరావృతం చేయకుండా జీవన విధానాన్ని మెరుగుపరచుకోవడం నిజమైన పాప పరిహారానికి మార్గం. భౌతిక సుఖాలతో పాటు ఆధ్యాత్మిక ఉన్నతిని కూడా సాధించుకోవడమే జీవోన్నతి.


🕉 తమసోమా జ్యోతిర్గమయ – ఉపనిషత్తుల సందేశం

దీపావళి ఆధ్యాత్మిక తత్త్వాన్ని ఉపనిషత్తులలోని ఈ ప్రార్థన అద్భుతంగా వివరిస్తుంది.

అసతో మా సద్గమయ । తమసో మా జ్యోతిర్గమయ । మృత్యోర్మా అమృతంగమయ ॥

అసత్యం నుంచి సత్యం వైపు నడిపించు. అంధకారం నుంచి వెలుగు వైపు నడిపించు. మృత్యువు నుంచి అమృతత్వం వైపు నడిపించు.

ఇక్కడ అంధకారం అంటే కేవలం వెలుతురు లేని స్థితి కాదు. అజ్ఞానం, అవిద్య, అహంకారం, మోహం, భ్రమలకు కూడా అంధకారం అనే అర్థం ఉంది. జ్యోతి అంటే ఆత్మజ్ఞానం, వివేకం, సత్యదర్శనం, ఆధ్యాత్మిక చైతన్యం.

మనిషి తాను కేవలం శరీరం మాత్రమే కాదని, తనలో సాక్షిగా వెలుగుతున్న చైతన్యమే తన అసలైన స్వరూపమని తెలుసుకున్నప్పుడు నిజమైన జ్ఞానోదయం కలుగుతుంది.

దీపంలో నూనె మన భక్తికి, వత్తి మన సాధనకు, జ్యోతి మన జ్ఞానానికి ప్రతీకగా భావించవచ్చు. భక్తి, సాధన, జ్ఞానం సమన్వయమైనప్పుడే మనిషి జీవితం ఆధ్యాత్మికంగా ప్రకాశిస్తుంది.


🌸 ఐదు రోజుల దీపావళి పర్వదినాల విశిష్టత

భారతదేశంలోని అనేక ప్రాంతాల్లో దీపావళిని ఐదు రోజుల పండుగగా జరుపుకుంటారు.

1. ధన త్రయోదశి: ధన్వంతరి జయంతిగా కూడా జరుపుకుంటారు. ఆరోగ్యం, ఆయురారోగ్యం, సంపద కోసం ధన్వంతరి, లక్ష్మీదేవిని ఆరాధిస్తారు.

2. నరక చతుర్దశి: నరకాసుర సంహారానికి గుర్తుగా, చెడుపై మంచి సాధించిన విజయానికి ప్రతీకగా జరుపుకుంటారు.

3. దీపావళి అమావాస్య: మహాలక్ష్మీ పూజ, దీపారాధన, దైవస్మరణతో ఈ రోజును జరుపుకుంటారు.

4. బలి పాడ్యమి: బలి చక్రవర్తి స్మరణార్థం లేదా గోవర్ధన పూజగా వివిధ ప్రాంతాల్లో జరుపుకుంటారు.

5. భగినీ హస్త భోజనం: సోదరసోదరీమణుల మధ్య ప్రేమ, అనుబంధానికి ప్రతీకగా జరుపుకుంటారు.


ఈ ఐదు రోజుల పర్వదినాలు ఆరోగ్యం, సంపద, ధర్మం, ప్రకృతి ఆరాధన, కుటుంబ అనుబంధాల ప్రాముఖ్యతను తెలియజేస్తాయి.


🌻 దీపావళి మనకు అందించే సందేశం

దీపావళి రోజున మనం వెలిగించే ప్రతి దీపం ఒక మంచి సంకల్పానికి ప్రతీక కావాలి.


- అజ్ఞానాన్ని తొలగించి జ్ఞానాన్ని పెంపొందించుకోవాలి.

- ద్వేషాన్ని తొలగించి ప్రేమను పంచాలి.

- అహంకారాన్ని విడిచిపెట్టి వినయాన్ని అలవర్చుకోవాలి.

- స్వార్థాన్ని తొలగించి సేవాభావాన్ని పెంపొందించుకోవాలి.

- అసత్యాన్ని విడిచిపెట్టి ధర్మమార్గంలో నడవాలి.

- ప్రతి జీవిలోనూ దైవచైతన్యాన్ని దర్శించాలి.


మన ఇంట్లో వెలిగించే దీపం గృహాన్ని ప్రకాశింపజేస్తుంది. మన హృదయంలో వెలిగించే జ్ఞానదీపం మన జీవితాన్నే కాకుండా మన చుట్టూ ఉన్నవారి జీవితాలను కూడా ప్రకాశింపజేస్తుంది. దీపావళి అంటే కేవలం దీపాలను వెలిగించే పండుగ కాదు. మనలోని దైవత్వాన్ని మేల్కొలిపే పండుగ.

దీపావళి అంటే కేవలం సంపదను కోరుకునే పర్వదినం కాదు. అజ్ఞానం, అహంకారం, దుర్గుణాలను తొలగించుకుని జ్ఞానం, ధర్మం, సద్గుణాలనే నిజమైన సంపదగా పొందే రోజు.

ఈ దీపావళి సందర్భంగా మన ఇళ్లలోనే కాకుండా మన హృదయాల్లో కూడా జ్ఞానజ్యోతులను వెలిగించుకుందాం. సత్యం, ధర్మం, ప్రేమ, కరుణ, జ్ఞానం అనే వెలుగులతో మన జీవితాలను ప్రకాశింపజేసుకుందాం.


🪔 దీపావళి శుభాకాంక్షలు 🪔

అజ్ఞానమనే అంధకారం తొలగి, జ్ఞానమనే జ్యోతి ప్రతి హృదయంలో ప్రకాశించాలి. మహాలక్ష్మీదేవి అనుగ్రహంతో అందరికీ ఆయురారోగ్యాలు, సుఖసంతోషాలు, ఐశ్వర్యం, ఆధ్యాత్మిక చైతన్యం కలగాలని మనస్ఫూర్తిగా కోరుకుంటున్నాను.

✍️ ప్రసాద్ భరద్వాజ

🌹🌹🌹🌹🌹

దీపావళి శుభాకాంక్షలు అందరికి. Happy Diwali!

https://youtube.com/shorts/_z0biVgUq3E


🌹🪔 దీపావళి శుభాకాంక్షలు అందరికి. Happy Diwali! 🪔🌹

🪔🪔🪔🪔🪔🪔🪔🪔🪔🪔


వెలుగులు నింపే దీపావళి పండుగ నాడు శ్రీకృష్ణ పరమాత్మ, మహాలక్ష్మీ దేవి ఆశీస్సులు మనందరి జీవితాలలో శుభం చేకూర్చాలని, ధనధాన్య సమృద్ధిని కలిగించాలని, ఐశ్యర్యవంతులని చేయాలని ప్రార్థిస్తూ ....

On the festival of Diwali, which fills our lives with light, may Lord Krishna and Goddess Mahalakshmi bless all of us with prosperity, abundance of wealth and grains, and lead us to a life of fortune and happiness.

ప్రసాద్‌ భరధ్వాజ / Prasad Bharadwaj

🔥🔥🔥🔥🔥🔥🔥