దేవాపి మహర్షి బోధనలు - 119

🌹. దేవాపి మహర్షి బోధనలు - 119 🌹

✍️. సద్గురు కె. పార్వతి కుమార్
సేకరణ : ప్రసాద్ భరద్వాజ

🌻 96. పనితనము 🌻

కొందరు పరమగురువుల బృందముల గూర్చి మాటాడరు. తలవంచుకొని వారి పని వారు చేయుచుందురు. మరికొందరు గురువులను గూర్చి అధికముగ మాట్లాడుదురు. మా అనుభవమున రెండవ తెగవారే మా బృందమునకు ద్రోహము చేయుదురు. మాకు అధికముగ మాటాడువారన్నచో భయము. మౌనముగ పనిచేయువారు మా దృష్టిలో శ్రేయస్కరులు. అధిక భాషణము అపాయకరము. పనిచేయువారికది తగదు.

మమ్మనుసరించువారికి పగలు పనిచేయుట, రాత్రి నిద్రించుట అని యుండదు. పగలుబట్టి పనికాదు. పనిని బట్టి పగలు. పని యున్నచో వారికి పగలు, రాత్రి తేడా యుండదు. ఇట్టివారే పనిని ప్రేమింపగలవారు. అట్టివారిని మేము ప్రేమింతుము. ఇట్టిపనివారు ఉల్లాసముగ నృత్యము, గీతము అనుభవించు చున్నట్లుగ పనిచేయు చున్నప్పుడు మేమును వారితో వంత కలుపుదుము.చేయవలసిన పనియందు యిట్టి ప్రీతికలుగుట ఉత్తమోత్తమ స్థితి.

సశేషం...

🌹 🌹 🌹 🌹 🌹


28 Jul 2021