దేవాపి మహర్షి బోధనలు - 127

🌹. దేవాపి మహర్షి బోధనలు - 127 🌹

✍️. సద్గురు కె. పార్వతి కుమార్
సేకరణ : ప్రసాద్ భరద్వాజ

🌻 104. పెద్దరికము 🌻

అకస్మాత్ సంఘటనలలో చెదరకుండుట ఒక సాధన. ఆశ్చర్యపడుట, నిశ్చేష్టుడగుట సర్వసామాన్యము. కలవరపడుట, ఆనందోత్సాహముతో తబ్బిబ్బగుట, ఇవి అన్నియు సర్వసామాన్యములే. ఇట్లగుట చిన్నపిల్లలవంతు. అప్పటికప్పుడు నవ్వుదురు. వెంటనే ఏడురు. ఇది పిల్లల తత్త్వము.

అట్లుకాక అన్ని సమయముల యందు, సన్నివేశముల యందు, ఒకేతీరున ప్రశాంతముగ నిర్లిప్తముగ నుండుట పెద్దరికము. ఇది వయస్సును రది కాదు. జీవి

లోతును బట్టి వచ్చునది. జీవచైతన్యము సెలయేరువలె సాగినచో నిర్మలముగ నుండును. దూకుట, పడుట జరిగినచో బురదగ నుండును.

ఈ సాధనకు ఒక సత్యమును గ్రహించవలసి యున్నది. “ఎప్పుడు ఎక్కడ, ఎవరికైనను ఏదైనను జరుగవచ్చును.” సృష్టిలో అకస్మాత్ విషయమేమియును లేదు. గ్రహింపు గలవారికి అకస్మార్లు లేవు. అన్నియును సృష్టి యందు క్రమముగనే జరుగును. లోదృష్టి యున్నప్పుడే అది గమనింపబడును. లేనప్పుడు గమనింపబడవు. ఈ అవగాహనతో నిత్యజీవితమును గడుపువారికి విద్యుత్ ఘాతములు (Shocks) అనునవి ఉండవు. ఈ స్థితి జేరుటకు ఒక సులభమగు మార్గమున్నది.

మీ గురువు లేక దైవము యొక్క రూపమునే మొదలు ధ్యానమందు స్థిరపరచుకొనుడు. ఆయన చేతన యందు మీ చేతన లయము చేయుటకు ప్రయత్నింపుడు. వారిలో మీరు లీనమైనట్లు భావింపుడు. తత్ఫలితముగ మీ యందు వారే వసించియున్నట్లు భావింపుడు. ఇది చాల వివరముగ జరుగవలెను.

అప్పుడు మీ గురువు లేక దేవత యొక్క ఎఱుకయే మీ ఎఱుకగ పనిచేయగలదు. సంకల్ప మాత్రమున మీ మనోఫలకముపై మీ సద్గురువు యొక్క రూపముగానీ, మీరు ఆరాధించు దైవము యొక్క రూపముగాని స్పష్టముగ దర్శించ గలిగిననాడు మీకు ఈ సిద్ధి కలుగును. అట్లు జరిగినచో అపుడు, ఆకస్మికములగు అపాయములు, అద్భుతములేమియు నుండవు.


సశేషం...

🌹 🌹 🌹 🌹 🌹


16 Aug 2021