🌻. చతుర్థ దత్తావతారము 🌻
📚. ప్రసాద్ భరద్వాజ
*ప్రభువు యొక్క అద్భుతలీల చూసి బీదర్ నివాసులకు ప్రభువుపై శ్రద్ధ, భక్తి రెట్టింపయింది. శ్రద్ధ ఉన్న ముసల్మాను భక్తులు ఎవరు ప్రభువు అలౌకిక సామర్ధ్యాన్ని చవిచూశారో వారు భక్తితో రోజూ ఝరణికి వచ్చేవారు. కొంతమంది ముస్లింలకు ప్రభువు కీర్తి పెరగడం నచ్చలేదు. తమ జాతి వాళ్ళు ప్రభువును ఇంతగా పూజ్యనీయులుగా భావించడం చూసి ఎలాగైనా ప్రభువును అవమానించాలని ఉపాయం ఆలోచించారు. ప్రభువు యొక్క సామర్ధ్యం వాళ్లకు తెలుసు కాని ఇంతకన్నా ఎక్కువ అద్భుత శక్తిని చూపించగలరేమో పరీక్షించాలని, ఏదైనా మహిమను చూపిస్తేనే ప్రభువును సాధువుగా ముస్లిం వాళ్ళు నమ్ముతారని ఆలోచించి అందరూ ప్రభువు దగ్గరికి వచ్చారు. అంతరంగంలో కపటం ఉంచుకొని పైకి మాత్రం వినయంతో ఇతర మతాల వాళ్ళను ఎలా పావనం చేసారో అలాగే తమ ఇంటికి వచ్చి పూజ స్వీకరించాలని చెప్పారు.*
*ప్రభువుకు వాళ్ళ అంతరంగ ఆలోచన తెలుసు. కానీ, ఆనందంతో మీరు చెప్పినట్లు మీ ఇంటికి వచ్చి మీ సేవ స్వీకరిస్తాను అని చెప్పారు. ప్రభువు ఇలా మాట ఇవ్వగానే అందరూ తమ ఇళ్లకు వెళ్లి ఏర్పాట్లు చేసుకున్నారు. మరుసటిరోజు అనుకున్నట్లుగానే తన శిష్యులతో కలిసి ప్రభువుని సన్మానంతో స్వాగతించి తీసుకొని వెళ్లి ఒక సింహాసనంపైన కూర్చోపెట్టారు. అక్కడ ఊరిలో ఉన్న ముస్లింలందరూ పోగయ్యారు. అందరూ ప్రభు మెడలో పూలదండలు వేశారు. పళ్ళాలలో మాంసంతో చేసిన పదార్ధాలను కావాలనే రుమాళ్ళు కప్పి ప్రభువు ముందు ఉంచారు. ప్రభువుని తినమని చెప్తూ, హిందువులు ముస్లింలు ప్రభువుకి సమానమే అని జై కొడుతున్నారు. అందుకని మేము సమర్పిస్తున్న ఈ పదార్ధాలను కూడా తినాలని ప్రభువుకి చెప్పారు. ప్రభువు తింటే, ప్రభు కులం భ్రష్టమై వారి కులంలో కలుస్తారని, తినకపోతే అపరాధ భావనతో వారి కులం వాళ్ళ శ్రద్ధ ప్రభువుపై తగ్గిపోతుందని వాళ్ళ దురాలోచన. అక్కడున్న ముస్లింలలో ఈ చర్య కొంతమందికి ఇష్టం లేదు. కానీ ఏమి చేయలేక మౌనంగా ఉండిపోయారు.*
*ప్రభువుకి వాళ్ళ కపటం తెలుసు. అయినా స్మితహాసంతో తన శిష్యుడైన చిమన్యాకు పళ్ళాలపై మూసిన రుమాళ్ళు తొలగించమని ఆజ్ఞాపించారు. అందరూ శిష్యులు భయంతో చూస్తున్నారు. చిమన్యా భయంతో పళ్లెంపై నుండి రుమాళ్ళు తీసేసరికి ఆ పళ్ళాలలో పువ్వులు, ఖర్జురపళ్ళు మొదలైనవి ఉన్నాయి. వాటిని ప్రసాదంగా అందరికీ ప్రభువు పంచారు. దానితో కపట ముస్లింలకు గర్వభంగం అయ్యింది. ప్రభువులో దైవ సామర్ధ్యం ఉందని వాళ్లకు అర్ధమై అందరూ ప్రభువును శరణువేడుకొన్నారు. ప్రభువు దయతో వారిని క్షమించి భగవంతుని శక్తి పరీక్ష ఇలా చేయరాదని మధురమైన వాక్కులతో ఉపదేశించారు. ప్రభువు యొక్క దైవసామర్ధ్యం మరియు ప్రభువు యొక్క మనస్సు ఉదారస్వభావం చూసి ముస్లింలందరూ ప్రభువుపై పుష్పవృష్టి కురిపించి "పీరానే పీర్ దస్తగీర్" అనే బిరుదుతో సత్కరించి ఊరేగించారు. బీదర్ లో ప్రభువు యొక్క గాదీ ముస్లింల ప్రాంతంలోనే స్థాపించారు.*
తరువాయి భాగము రేపు చదువుకుందాము....
దిగంబర దిగంబర శ్రీపాదవల్లభ దిగంబర
🌹 🌹 🌹 🌹 🌹
No comments:
Post a Comment