ఎరుకతో ఉన్న స్వేచ్ఛలో నియంత్రణ విచ్ఛలవిడితనం రెండూ ఉండవు

🌹. ఎరుకతో ఉన్న స్వేచ్ఛలో నియంత్రణ విచ్ఛలవిడితనం రెండూ ఉండవు 🌹

🍀. ‘స్వేచ్ఛ. మీరనుకుంటున్నది కాదు’ నుంచి ( ఓషో బోధ ) 🍀

✍️. భరత్‌, 📚. ప్రసాద్ భరద్వాజ

మీలో వేడి ఉంటే, భయం కూడా ఉంటుంది. అప్పుడు మీరు ఏదో ఒకటి చెయ్యక తప్పదు. అందుకే నియంత్రించు కోవడమనే విష ప్రయోగంతో ఎవరిని వారే చంపుకుంటారు.

‘‘ఎప్పటికీ హాయిగా జీవించకూడదు’’ అనేది నియంత్రణలో ఉన్నవారికి తెలిసే ఏకైక జీవిత పరిష్కారం. కాబట్టి, బుద్ధ విగ్రహంలా ఉండండి. అప్పుడు మీరు క్రమశిక్షణ పొందిన సహనశీలిగా నటించగలరు. కానీ నేను ఇక్కడ బోధించేది అది కాదు. విచ్చలవిడి తనాన్ని విడిచి పెట్టినట్లే నియంత్రణను కూడా మీరు విడిచి పెట్టాలంటాను. అంటే మీరు చిక్కులో పడినట్లే.

ఎందుకంటే, విచ్చలవిడితనం, నియంత్రణలలో ఏదో ఒక దానిని మాత్రమే మీరు ఎంచుకోగలరు. ఎలాగంటే, ‘‘నియంత్రణను వదిలి విచ్చలవిడిగాను, విచ్చలవిడిని విడిచిపెట్టి నియంత్రణలోను ఉండొచ్చు’’ కదా!’’ అని మీరు అడగవచ్చు. నిజమే.

కానీ, మీరు ఎరుకలో ఉన్నట్లైతే నియంత్రణ, విచ్చలవిడితనాలు రెండూ మీ నుంచి వాటంతటవే తొలగిపోతాయి. ఎందుకంటే, అవి రెండూ ఒకే విషయానికి సంబంధించిన రెండు అంశాలు. ఎరుకలో ఉంటే వాటి అవసరముండదు.

పద్దెనిమిదేళ్ళ కుర్రాడు ఒకరోజు తన తండ్రితో ‘‘ఇంతకాలం మీ నియంత్రణలో నలిగిపోయాను. నా వయసు కుర్రాళ్ళందరూ చక్కగా తాగుతూ, అమ్మాయిలతో తిరుగుతూ హాయిగా ఆనందిస్తున్నారు. నేను కూడా అలాంటి సాహసాలుచేసి, వాటి అనుభూతిని ఆస్వాదించాలని నిర్ణయించుకున్నా. అందుకే ఇల్లు విడిచి వెళ్తున్నా. నన్ను ఆపేందుకు ప్రయత్నించకండి. వెళ్ళొస్తా’’ అన్నాడు. వెంటనే అతని తండ్రి ‘‘ఉండరా బాబూ! నేను కూడా నీతో వస్తాను. ఇంత కాలం నేనుకూడా నా తల్లిదండ్రుల నియంత్రణలో అలాంటి సాహసాలు చెయ్యలేదు’’ అన్నాడు కొడుకుతో.

నియంత్రించ బడిన వారందరి పరిస్థితి ఇలాగే ఉంటుంది. వారు లోలోపల రగిలిపోతూ, విచ్చలవిడిగా తిరిగే అవకాశం కోసం నిరంతరం నిరీక్షిస్తూ ఉంటారు. కానీ వాస్తవ పరిస్థితిని సరిగా అర్థంచేసుకోవాలి. అందరూ తమకు తాముగా ఉంటూనే, జీవితంలో ఎదురయ్యే పరిస్థితులను మనస్ఫూర్తిగా అంగీకరించేందుకు, అనుభవించేందుకు, ఎదుర్కొనేందుకు సిద్ధంగా ఉండాలి.

అయితే మీరు ఎప్పుడూ పరిపూర్ణ చైతన్యంతో కూడిన ఎరుకతో చాలా అప్రమత్తంగా ఉండాలి. అలాగే మీరు ఎప్పుడూ ఆత్మస్మృతిలోనే ఉండాలి. ఇదే మీరు ఎప్పుడూ గుర్తుంచు కోవలసిన ముఖ్య విషయం. మిమ్మల్ని మీరు ఎప్పుడూ మరచిపోకూడదు.

అలాగే మీరు ఎప్పుడూ మీ ఉనికి అంతర్గత కేంద్రంనుంచే ముందుకు కదలాలి. మీరుచేసే పనులన్నీ అక్కడినుంచే జరగాలి. అప్పుడు మీరుచేసే ప్రతి పని ధర్మమవుతుంది.

ఎరుక చేసే పనులలో ఒకటి ధర్మం. పైపైన మీరు చేసే పని పైకి పాప కార్యంలా కనిపించక పోవచ్చు. అందువల్ల అది సమాజానికి నచ్చవచ్చు. సమాజం మిమ్మల్ని కీర్తించవచ్చు. అయినా అది పాపకార్యమే. ఎందుకంటే, మీకు తెలుసు ఆ పని చేసినందువల్ల అనవసరంగా మీరు మీ జీవితాన్ని కోల్పోయారని.

అందువల్ల మీలో మీరు మిమ్మల్ని నిందించుకుంటూనే ఉంటారు. కాబట్టి, మీలో మీరు సంతోషంగా ఉండలేరు.

సమాజం మిమ్మల్ని కీర్తించడంలో అర్థమేముంది, అందువల్ల మీకు దక్కేదేముంది? అన్నీ సొల్లుకబుర్లే.

వాటి కోసం, మీ చుట్టూ ఉన్న మూర్ఖుల మెప్పు కోసం మీరు మీ జీవితంతో పాటు దివ్యత్వాన్ని కూడా కోల్పోయారు. అందువల్ల అవి ముఖ్యవిషయాలు ఎలా అవుతాయి? జీవితాన్ని మీ అంతర్గత కేంద్రం నుంచి జీవించడం ప్రారంభించండి. ధ్యానమంటే అదే.

- ఇంకాఉంది.

🌹 🌹 🌹 🌹 🌹


04 Mar 2021