దేవాపి మహర్షి బోధనలు - 109

🌹. దేవాపి మహర్షి బోధనలు - 109 🌹

✍️. సద్గురు కె. పార్వతి కుమార్
సేకరణ : ప్రసాద్ భరద్వాజ

🌻 90. మానవ లక్షణము -1 🌻

సహకరించుట సామాన్య విషయము కాదు. సహకారమొక ఉత్తమ గుణము. దైనందిన జీవితమున సద్భావములకు, సత్కార్యము లకు, సహకరించుట సాధకునకు అత్యవసరము. దీనికి తరుల భావములను మన్నించగలుగు సద్బుద్ధి యుండవలెను.

ఇతరుల భావములను కొట్టివేయుట, ఇతరుల సత్కార్యములను తిరస్కరించుట, దూషించుట నిరుపయోగము. నీవట్లు చేసినచో నీకును అట్లే జరుగును. ఇట్టి సాధకులెందరో అధ్యాత్మిక సోదరత్వమని ఆరాటపడు చున్నారు. సోదరత్వమునకు సహకారము మొదటి లక్షణము.

సహకరించుట తెలియని వానికి సోదరత్వము లేదు. ప్రతి సాధారణ సాధకుడును తనతో నెవ్వరును సహకరించుట లేదని వాపోవుచుండును. దానికి కారణము తానే. తానితరులతో
సహకరించుట ముఖ్యము. ఇతరులు తనతో సహకరించు వలెననుట అహంకారము.

మొదటిది వినయమగు మార్గము. రెండవది అవిధేయ తను సూచించును. ఉట్టికెక్కలేనమ్మ, స్వర్గమునకు ప్రాకులాడుట యెట్లో, పెద్దలతో సహకరించని పిన్నలకు, దైవీభావమందుట అట్లే అసాధ్యము. ఇట్టి వారి ఆధ్యాత్మిక సోదరత్వ భావము కారుమేఘములతో కూడినదై ఉరుములు, మెరుపులు, గాలివానగ యుండును.


సశేషం...

🌹 🌹 🌹 🌹 🌹


06 Jul 2021