దేవాపి మహర్షి బోధనలు - 113

🌹. దేవాపి మహర్షి బోధనలు - 113 🌹

✍️. సద్గురు కె. పార్వతి కుమార్
సేకరణ : ప్రసాద్ భరద్వాజ

🌻 92. జ్ఞానము - భాష - 1 🌻

జ్ఞానము అందరి కొరకును నిర్దేశింపబడినది. దానినే కొందరికే పరిమితము చేయుట ధర్మము కాదు. సూర్యుని వెలుగు, వాయువు, నీరు, భూమి అందరికిని నిర్దేశింపబడినవి. అట్లే జ్ఞానము కూడను. అందరికి అందుబాటులో జ్ఞానము నుంచుట పెద్దల కర్తవ్యము. అందుకొనుటకందరు రుచి చూపించక పోవచ్చును. కాని అందుబాటులోనుంచుట మాత్రము కర్తవ్యమై యున్నది.

జ్ఞానము, కాలమును బట్టి భాషను మార్చుకొను చుండును. ప్రాచీన భాషలయందు గల జ్ఞానమును ప్రాంతీయ భాషలలోనికి కొని తెచ్చుట ఒక మహా యజ్ఞము. భాష భావమును తెలుపుటకే కదా! దివ్యభావమును ప్రాంతీయ భాషలోనికి, ప్రాచీన భాష నుండి గొని వచ్చుట వలన జ్ఞానము యొక్క అందుబాటు మిక్కుటముగ నుండును. అట్లు కానిచో ఆవశ్యకత యున్న తావులకు జ్ఞానమందదు. ప్రస్తుత కాలమున భాష అంతకంతకును అవస్థితి చెందుచు నున్నది. కావున జ్ఞానము కూడ అట్టి భాషలలోనికి కొని రావలెనా? అను ప్రశ్నపుట్టును.

వికారము చెందిన భాష నుండి జ్ఞానము నందించుట సులభము కాదు. కావున భాష వికారము చెందకుండుటకై చేయు ప్రయత్నము కూడ లోకహిత కార్యముగ కన్పట్టును.


సశేషం...

🌹 🌹 🌹 🌹 🌹


14 Jul 2021