మాస్టర్ ఇ.కె. గారి సందేశములు - 130

🌹. మాస్టర్ ఇ.కె. గారి సందేశములు - 130 🌹
✍️. రచన : సద్గురు ఇ. కృష్ణమాచార్యులు
📚 . సేకరణ : ప్రసాద్ భరద్వాజ

🌻. సదవగాహన - 1 🌻

ఆధునిక మానవుడు ఎంతో అభివృద్ధిని విజ్ఞానశాస్ర్త పరముగాను, నాగరికత పరముగాను సాధించుచున్నాడు.

ప్రాచీనులకన్న మిక్కిలి తెలివిగలవాడనని కూడ విర్రవీగుచున్నాడు. ధనము, అధికారము, విజ్ఞానము, ప్రసిద్ధి ఇట్టి విషయములు సాధించుటలో శ్రమించుచు, ఈ శ్రమకు ప్రయోజనమయిన ఆనందమును మాత్రము పొందలేకున్నాడు.

తన స్వరూపమయిన ఆనందమునందు నిలుచుటకు అవరోధములుగా మానవ మనస్సునందు, వికారములు రేకెత్తి, అతని బ్రతుకు అను నావను తుఫానుతోడి సముద్రపు కెరటముల వలె ఊపుచున్నవి.

నిజమునకు సమస్యలు తనకు వెలుపల లేవు‌ తనలోనే నెలకొనియున్నవి. ఉదాహరణకు, ఒరుల యందు జుగుప్స. ఇతరుల లోపముల యందే చూపు నిలిపి, వారి సద్గుణములను మరచుట వలన ఇట్టి జుగుప్స పెరుగును.

విచిత్రమేమనగా, ఇతరుల యందు, తాను తెలివిగలవాడననుకొను మానవుడు ఏ దోషమును గమనించుచుండునో, ఆ దోషము తన యందే దృఢముగా దాగియుండును.

జుగుప్స వలన, మానవుడు వివేకమను చూపును కోల్పోయి, గ్రుడ్డివాడగును. తనకు, ఒరులకు అడ్డుగోడలను కట్టుకొని వారితో సంఘర్షణకు తలపడును. దానితో భయభ్రాంతుడై, వినాశమును గొని‌ తెచ్చుకొనువాడగును.

ఒకసారి మనస్సునందు ఇతరులపై దోషారోపణ చేయు తలంపు జనింపగనే, దానిని కొనసాగనీయక, వారిపై ప్రేమ, దయలను అనుభవించి, వారిని సదవగాహన చేసికొనుటకు యత్నింపవలెను. దానితో జుగుప్స క్రమముగా అదృశ్యమగును.

....✍ మాస్టర్ ఇ.కె.🌻
🌹 🌹 🌹 🌹 🌹

#ChaitanyaVijnanam #PrasadBhardwaj #చైతన్యవిజ్ఞానం #మాస్టర్ఇకె