🌹. మాస్టర్ ఇ.కె. గారి సందేశములు - 128 🌹
✍️. రచన : సద్గురు ఇ. కృష్ణమాచార్యులు
సంకలనము : పద్మావతి దేవి
📚. సేకరణ : ప్రసాద్ భరద్వాజ
🌻. ధ్యానము - విశిష్టత 🌻
భాగవత మార్గమందలి సాధకులు సృష్టియందు నారాయణుని చరణకమలముల జాడలు గమనించుచు ధ్యానింతురు. ఇచట ధ్యానమప్రయత్నము.
ఇతర సాధన మార్గములలో కన్నులు మూసికొని , ముక్కులు మూసికొని హృదయ పద్మమున నున్న పరబ్రహ్మమును ధ్యానించుట యుండును.
దానివలన నిష్ఠ కుదిరినపుడు కొన్ని క్షణములాత్మానందము వేయి మెఱపులు మెఱసినట్లు తళుక్కుమనును. అది ఎంత గొప్పదైనను ఇంద్రియ సుఖాదుల వలె క్షణికము.
అట్లు గాక సృష్టిని నారాయణుని అడుగుజాడలుగ స్మరించువారికి అదే పరబ్రహ్మము కనుమూసినను, కనుతెరచినను తానే అయి నిత్యముగ భాసించును.
"అంతర్బహిశ్చ తత్సర్వం వ్యాప్య నారాయణః స్థితః", అని వేదమంత్రములు భాగవత మార్గమును గూర్చి అభయముద్ర పట్టియున్నవి.
ఇట్లు ఇంద్రియములను , మనస్సును సొంతముగా దమించుకొని హృదయమున పరబ్రహ్మము దుకాణము పెట్టుకొనువారి మార్గము కన్న అట్లు సాధన చేయునట్టి తన్నే అంతర్యామికి సమర్పణ చేసి శరణాగతి చెందు మార్గము శాశ్వతానందమిచ్చును.
✍🏼 మాస్టర్ ఇ.కె.🌻
🌹 🌹 🌹 🌹 🌹
No comments:
Post a Comment