సృజనాత్మకత - ‘‘దేని కోసం స్వేచ్ఛ- దేని నుంచి స్వేచ్ఛ’’

🌹. సృజనాత్మకత - ‘‘దేని కోసం స్వేచ్ఛ- దేని నుంచి స్వేచ్ఛ’’ 🌹

🍀. ‘స్వేచ్ఛ. మీరనుకుంటున్నది కాదు’ నుంచి ( ఓషో బోధ ) 🍀

✍️. భరత్‌, 📚. ప్రసాద్ భరద్వాజ

పనిచెయ్యడమంటే అందరికీ అసహ్యమే. అందుకే పని చేసేందుకు ఎవరూ ఇష్టపడరు. కాబట్టి, పని విషయంలో అందరికీ ఇతరుల సహాయం ఎక్కువగా అవసరమవుతుంది. అందుకే పనులన్నీ గుట్టలు గుట్టలుగా పేరుకుపోతూ ఉంటాయి. కార్యాలయాలలో అది మీకు స్పష్టంగా కనిపిస్తుంది. లంచమిస్తేనే పేరుకుపోయిన గుట్టలో ఎక్కడో అడుగున ఉన్న మీ దస్త్రం పైకి వస్తుంది. లేకపోతే అది అక్కడే ఉంటుంది. పెత్తందార్ల అధికారానికి ఆనందాన్నిచ్చేవి, వారి ప్రాముఖ్యాన్ని పెంచేవి పేరుకుపోయిన ఆ దస్త్రాల గుట్టలే.

నేను కూడా అరాచకవాదినే అయినా గతంలోని వారిలా కాదు. నా వైఖరి నాదే. ఎందుకంటే, విభిన్న ప్రాతిపదికతో కూడిన నా శైలి చాలా తీవ్రంగా ఉంటుంది. ప్రభుత్వానికి, న్యాయస్థానాలకు నేను ఎప్పుడూ వ్యతిరేకిని కాదు. కానీ, అవి అవసరమయ్యే విధానాలకు నేను పూర్తిగా వ్యతిరేకిని. మనిషి ఎలాంటి నియంత్రణలకు- ధార్మిక, రాజకీయ- గురి కాకుండా జీవించే సమయం ఏదో ఒకరోజు తప్పక వస్తుందని నాకు తెలుస్తోంది. ఎందుకంటే, అప్పుడు మనిషి తనకు తానే ఒక ప్రవర్తనా నియమావళి అవుతాడు.

ప్రియతమ ఓషో, ‘‘దేనికోసం స్వేచ్ఛ- దేనినుంచి స్వేచ్ఛ’’- వీటి మధ్యగల తేడాలను దయచేసి వివరించండి.

మీకొక దార్శనికత ఉంటుంది. అది వాస్తవరూపం దాల్చాలని మీరు కోరుకుంటారు. దాని కోసం మీకు స్వేచ్ఛ కావాలి. ఎందుకంటే, మీకు తెలియని దానిలోకి అడుగు పెడుతున్నారు, బహుశా, ఏదో ఒకరోజు మీరు తెలుసుకోలేని దానిలోకి కూడా అడుగుపెడతారు. అదే దాని ఆధ్యాత్మిక పార్శ్వం. అందుకే స్వేచ్ఛగా ఎగిరేందుకు మీకు రెక్కలొస్తాయి.

కాబట్టి, ‘‘దేనికోసం స్వేచ్ఛ’’అనేది ఎప్పుడూ సృజనాత్మకమైనది, భవిష్యత్తుకు సంబంధించినదే. ‘‘దేని నుంచి స్వేచ్ఛ’’ అనేది సాధారణ లౌకిక విషయం. మనిషి ఎప్పుడూ అనేక విషయాల నుంచి స్వేచ్ఛ కోసం ప్రయత్నించాడు.

కాబట్టి, అది సృజనాత్మకమైనది కాదు. అది స్వేచ్ఛకు ప్రతికూల పార్శ్వం. అందుకే ‘‘దేని నుంచి స్వేచ్ఛ’’అనేది ఎప్పుడూ గతానికి సంబంధించినదే. మహా అయితే, అది మీ చేతి సంకెళ్ళను తొలగించగలదు. అంత మాత్రాన, అది లాభదాయకమైనదేమీ కాదు. గతించిన చరిత్ర అంతా అందుకు నిదర్శనమే.

మనుషులు నేను చెప్తున్న స్వేచ్ఛ గురించి ఎప్పుడూ ఆలోచించలేదు. ఎందుకంటే, దానిని అర్థం చేసుకునే పరిజ్ఞానం వారికి లేదు. కంటికి కనిపించే బంధనాలైన చేతి సంకెళ్ళు, కాళ్ళ సంకెళ్ళనుంచి స్వేచ్ఛ పొందడం గురించే వారు నిరంతరం ఆలోచిస్తారు. తరువాత వాటితో ఏం చెయ్యాలో మీకు తెలియదు. పైగా, వాటి నుంచి స్వేచ్ఛ కోరుకున్నందుకు మీరు పశ్చాత్తాపం కూడా పడవచ్చు.

- ఇంకాఉంది.

🌹 🌹 🌹 🌹 🌹


08 Mar 2021