గీతోపనిషత్తు -308

🌹. గీతోపనిషత్తు -308 🌹

✍️. సద్గురు కంభంపాటి పార్వతి కుమార్
సేకరణ : ప్రసాద్ భరద్వాజ

📚. 9వ అధ్యాయము - రాజవిద్య రాజగుహ్య యోగము - 21 -1 📚

🍀 21-1. జనన మరణ చక్రము - విశేషమగు పుణ్యమార్జించిన వారు సుఖ భోగములను పొందుచు నుండగ పుణ్యము క్షీణించుచు నుండును. పుణ్యము క్షీణించగనె సుఖము, భోగము అంతరించును. అపుడు మరల సుఖమునకై, భోగమునకై ప్రయత్నించుట యుండును. ధన మనగా కేవలము రూపాయి నోట్లు కాదు. సుఖప్రాప్తి నిచ్చు ప్రయత్నము లన్నియు ధనార్జనము వంటివే. 🍀

21. తే తం భుక్యా స్వర్గలోకం విశాలం క్షీణే పుణ్యే మర్త్యలోకం విశంతి |
ఏవం త్రయీధర్మ మమప్రపన్నా గతాగతం కామకామా లభంతే ||

తాత్పర్యము : దివ్యలోకములందు విస్తృతముగ దివ్య భోగానుభవము అనుభవింపగనే, చేసిన పుణ్యము క్షీణించుట వలన మరల జీవులు మర్త్యలోకములందు ప్రవేశించు చున్నారు. అర్థకామములను ధర్మము నాశ్రయంచి పొందుచున్నవారు ఇట్లు స్వర్గలోకమునకు, మర్త్యలోకమునకు నడుమ రాకపోకలను పొందుచు నున్నారు.

వివరణము : భోగముల ననుభవించుచుండగ చేసిన పుణ్యము క్షీణించుచు నుండును. విశేషమగు పుణ్యమార్జించిన వారు సుఖ భోగములను పొందుచు నుండగ పుణ్యము క్షీణించుచు నుండును. పుణ్యము క్షీణించగనె సుఖము, భోగము అంతరించును. అపుడు మరల సుఖమునకై, భోగమునకై ప్రయత్నించుట యుండును. ధనము కూడబెట్టిన వాడు ఆ ధనమును వెచ్చించుట వలన భోగములు లభించుచు నుండును.

ధన మనగా కేవలము రూపాయి నోట్లు కాదు. సుఖప్రాప్తి నిచ్చు ప్రయత్నము లన్నియు ధనార్జనము వంటివే. ఆర్జించునది ఖర్చు కాగానే మరల ఆర్జింపవలెను. ఆదాయము, ఖర్చుగ చక్రము తిరుగుచు నుండును. ఒక మాసమంతయు ఆర్జించినది, ఒక రోజులో ఖర్చుకాగలదు. ఒక సంవత్సర మంతయు ఆర్జించినది కూడ ఒక రోజు ఖర్చునకే సరిపోగలదు. భోగములట్టివి.


సశేషం...

🌹 🌹 🌹 🌹 🌹


18 Jan 2022