🌹 శ్రీ యోగ వాసిష్ఠ సారము - 5 🌹

🌹 శ్రీ యోగ వాసిష్ఠ సారము 🌹
✍ రచన : పేర్నేటి గంగాధరరావు
5 వ భాగము

🌴 ఉత్పత్తి ప్రకరణము  🌴

🌻 4. సూక్ష్మశరీరము   🌻

తదుపరి వశిష్ఠుడు శ్రీరామునికి సూక్ష్మశరీరతత్వమును బోధించుచున్నాడు. ఏ ప్రాణియైనను, మృతి చెందినపుడు, జీవాత్మ సూక్ష్మశరీరము ధరించి హృదయాకాశమున వాసనామయములగు (సంస్కారములు) త్రిలోకములను గాంచుచుండును. నిజానికి ఈ జీవాత్మ జన్మాది వికార రహితుడగు పరబ్రహ్మము. మరణ సమయమున మానసమందు నిలబడు కోర్కెలలో నేది అగ్రగణ్యమో దానినే జీవు డనుభవించును. నిజానికి జగత్తుమిధ్య, అసత్యమైనది. ఈ విషయము మరణ సమయ మందు, జనన సమయమందు, హృదయాకాశమున అనుభూతమగును. అనగా మరణ వేదనలో తన సంస్కారములన్ని, అనుభూతికి వచ్చి అంతా భ్రమయని తోచును. కాని సంస్కారములు నశించవు.

జన్మ సమయములో గూడ, ఆ సంస్కారములు భ్రమయని తెలిసినప్పటికి జన్మించిన తరువాత, మాయ ఆవరించి తన గత సంస్కారములు అలానే వుండును. బ్రతుకు నందలి ఆశ, పుట్టుక, చావు అనుమిధ్యా ప్రపంచము నిజమని తలచును.

స్ధూల శరీరములో సూక్ష్మ శరీరము, సూక్ష్మ శరీరములో కారణ శరీరము గలదు. ఈ మూడు శరీరములే సంసారమునకు కారణమగుచున్నవి.

సాధన ద్వారా ఈ మూడు శరీరములు దగ్ధమైనపుడే ముక్తి లభించును. ఈ సంస్కార తరంగములు నిద్రాసమయమందును, ప్రళయ సమయమందును చలనము లేక స్ధిరముగ వుండును. అది విశ్రాంతి సమయము. సృష్టి సమయము, స్వప్న సమయము లందు మరల భ్రాంతులు, తరంగములు లేచుచున్నవి. ఈ దేహత్రయములకు బ్రహ్మయే ఉపాధి. అందువలన స్థూల, సూక్ష్మ, కారణ శరీరములు నశించగానే బ్రహ్మము మిగులును.

సంస్కారముల ననుసరించి జన్మ లభించును.
జనులు మాటి మాటికి పుట్టుచూ, చచ్చుచూ క్రమముగా  సంస్కారములలోమార్పు తెచ్చుకొనుచు, చివరికి విదేహముక్తులగుదురు.

ఉదాహరణకు వ్యాసుడు ఈ బ్రహ్మయుగములో ముప్పది రెండవ వ్యాసుడు. అనగా పూర్వపు సృష్టులందు, ముప్పది ఒక్క వ్యాసులు చనిరి. ఇంకను వ్యాసులు ఎనిమిది పర్యాయములు జన్మించి, భారత ఇతిహాసములను, వేదవిభజనను ఎనిమిది పర్యాయములు చేసి భారత వంశమునకు కీర్తి దెచ్చి, పిదప విదేహముక్తుడై బ్రహ్మమును పొందును.

అలానే ప్రతి జీవి లక్షల జన్మములు ఎత్తి చివరకు ముక్తులు కావలసినదే. వివిధ జన్మలలో, ఇప్పుడున్న వారె అప్పుడు యధావిధిగ జన్మించి, సమకాలికులుగ వుందురు. అప్పుడప్పుడు విడివిడిగా గూడ జన్మింతురు. ఆయా జన్మలలో వారి వారి భార్య, బంధువులు, ఆయుర్ధాయము, జ్ఞానము ఒకే విధముగ ఇప్పుడున్నట్లే వుండును.

కేవలము ఒక్క తత్వజ్ఞాని మాత్రమే, వికల్పములు లేక పరమ శాంతుడై సంతృప్తుడై బ్రహ్మ పదమును పొందును. జ్ఞాని సదేహముక్తుడైనను, విదేహముక్తుడైనను ఒకటియె. ఈ రెండు ముక్తులును భిన్నములు కావు. సదేహముక్తునకు విషయ భోగములున్నచో, విదేహముక్తుని కంటే, తక్కువగ నెంచుకొనవచ్చును. అయితే విషయ భోగమందు రసబోధ లేనందు వలన రెండును నిర్వాణముక్తి వంటివే. నీరు అలలుగా వున్నను, కదలకున్నను నీరు నీరే కదా! అలానే గాలి కదులుచున్నను, కదలకవున్నను గాలి గాలే కదా!.
🌹 🌹 🌹 🌹 🌹
🙏 ప్రసాద్

🌹 శ్రీ యోగ వాసిష్ఠ సారము - 4 🌹

🌹 శ్రీ యోగ వాసిష్ఠ సారము 🌹
✍ రచన : పేర్నేటి గంగాధరరావు
4 వ భాగము

🌴 ఉత్పత్తి ప్రకరణము  🌴

🌻 3. అఖండ చైతన్య స్వరూపము  🌻

అందుకు జనకుడు తాను గ్రహించినది తన తండ్రి పల్కినది కాక వేరేదియు లేదనియు ''అఖండచైతన్య స్వరూపము, అద్వితీయమైన పరమాత్మ స్వరూపము ఒక్కటే వున్నదని, తక్కిన వన్నియు లేనివేనని, అజ్ఞాన సంస్కారములు నశించినచో వ్యక్తి ముక్తుడై స్వస్వరూపమును పొందునని'' పల్కెను. చిన్న వయస్సులోనే శుకుడు భోగములను అనుభవించకుండగనే, విరక్తిని ప్రకటించి, పూర్ణత్వమును సాధించి సర్వజ్ఞానమును పొంది, వేదవ్యాసుని కంటే, గురువగు తన కంటే అధికుడవైనట్లు జనకుడు పల్కెను. నీ మనోరధము సిద్దించినదని, నీవు పొందవలసినదంతయు పొందియెయుంటి, ముక్తుడవని తెల్పెను.

తదుపరి శుకుడు సంశయరహితుడై, నిష్కాముడై నిర్వికల్ప సమాధి యందు, పదివేల ఏడ్లుండి, తైలహీన మగుదీపము వలె, ఆత్మ స్వరూపమున నిర్వాణమందెను. అని విశ్వామిత్రుడు శుకుని చరిత్రను తెల్పెను.*
*శుకుని వలె శ్రీరామచంద్రుడు తెలుసుకొనవలసినదంతయు తెలుసుకున్నాడని, శ్రీరాముడు భోగములందు విరక్తుడైనాడని పల్కెను.

కామక్రోధాదుల నెవడు జయించునో వాడే ముక్తుడు. అయితే శ్రీరాముని చిత్త శాంతి కొరకు వశిష్ఠుడు అతనికి తత్వబోధన చేయవలెనని పల్కెను. తక్కిన ఋషి పుంగవులు విశ్వామిత్రునితో ఏకీభవించిరి.

శ్రీ వశిష్ఠులు విశ్వామిత్రుని వచనములను తలదాల్చి శ్రీరామునికి అఖండ ఆత్మజ్ఞానమును బోధించుటకు ఉద్యుక్తుడయ్యెను. కాని శ్రీరాముడు మోక్ష శాస్త్రమును బోధించుటకు ముందు తన సందేహమును తీర్చవలయునని ఇట్లు పల్కెను.

శుకుని తండ్రియైన వ్యాసమహర్షి సర్వజ్ఞుడైనను విదేహముక్తిని పొందలేదు. అతని కుమారుడైన శుకుడు ఏల నిర్వాణముక్తిని పొందగల్గెను. అందుకు వశిష్ఠుడు ఇట్లు పల్కెను. పరమాత్ముని చైతన్య శక్తి యందు లేచి, మరల లీనమగు బ్రహ్మండత్రసరేణువులు అసంఖ్యాకములు, త్రిభువన మండలములు కూడ అసంఖ్యాకములు. అలాంటి జగద్రేణువులను జీవన్ముక్త పురుషులైన శుకుని వంటవారు నమ్మరు. అందువలన వీరు విదేహముక్తులుగ పిలువబడతారు. అందుకు శ్రీరాముడు తృప్తి చెంది, తాను అఖండ బ్రహ్మత్వమును గ్రహించితినని తెల్పెను.
🌹 🌹 🌹 🌹 🌹
🙏 ప్రసాద్

🌹 శ్రీ యోగ వాసిష్ఠ సారము - 3🌹

🌹 శ్రీ యోగ వాసిష్ఠ సారము 🌹
✍ రచన : పేర్నేటి గంగాధరరావు
3 వ భాగము

🌴 ఉత్పత్తి ప్రకరణము 🌴

2. ముముక్షుత్వము

అంతట సభనలంకరించి యున్న వశిష్ఠ, విశ్వామిత్రాది మహర్షులు, ఇతర మంత్రులు, సామంతులు, దశరధుడు మొ|| వారందరు, రాముని వాక్యములు విని పులకిత శరీరులై, రాముని కలత తీర్చుటకు ఎవ్విధమైన సమాధానము లభించునో అని కుతూహలురై యుండిరి. అలానే సిద్ధులు రాముని ప్రశ్నలకు పులకించి, పుష్పవర్షము కురిపించి సభలోకి ప్రవేశించి ఉపవిష్ఠులై, సమాధానములు వినుటకు కుతూహలురైరి. వారిలో నారదుడు, దేవతలు, వ్యాసుడు, మరీచి, దుర్వాసుడు, అంగీరసుడు, వాత్సాయనుడు, భరద్వాజుడు, వాల్మీకి, ఉద్దాలకుడు మొ|| మునులు, వేదవేద్యులగు తత్వజ్ఞులు ఉపవిష్ణులై యుండిరి.

రాముని వాక్యములు, విచారయుతములు, జ్ఞానబోధకములు, ఆర్యోచితములు, స్ధిరములు, సంతోషదాయములైయున్నవి. అట్టి వాక్యములకు సమాధానములు వినుటకై ఎల్లరు కుతూహలురై వుండిరి. అపుడు శ్రీవాల్మికి రామునుద్దేశించి నీ ప్రశ్నలన్నియు, జ్ఞానయుతములైయున్నవి. నీవు తెలుసు కొనవలసినది ఇంకేమియులేదు అని పల్కి వ్యాసపుత్రుడైన శుకుని బుద్ధి నీ బుద్ధి కూడ జ్ఞానమును పొందియు అంతర శాంతిని కోరుచున్నది అని పల్కెను.

అంత శ్రీరాముడు, శుకుడు విచారబుద్ధి వలన జ్ఞానము పొందియు మొదట శాంతిని పొందక తదుపరి శాంతిని ఎట్లు పొందగల్గెనని ప్రశ్నించెను. అందుకు విశ్వామిత్రుడు శుకదేవుని వృత్తాంతమును తెల్పెను. శుకుడు వ్యాసుని కుమారుడు. అతడు తేజస్వి, శాస్త్రజ్ఞుడు, ప్రాజ్ఞుడు, రూపుదాల్చిన యజ్ఞము. సంసారగతిని, దాని మాలిన్యమును చింతించుట వలన అతడు వివేకి అయ్యెను. అతడు చాలాకాలము విచారణ జరిపి చివరకు సత్యమును గ్రహించెను. అయినను అతడు శాంతిని పొందలేదు. క్షణ భంగురములైన విషయముల నుండి విరక్తి కల్గెను.

ఒక పర్యాయము శుకుడు తండ్రియైన వ్యాసుని భక్తితో ఇట్లు ప్రశ్నించెను. ''ఈ సంసారాడంబరమెట్లు ఉదయించినది. ఇది ఎంతకాలము, ఎట్లు, ఎచ్చట వుండును? దీని అంతమేది? ఇది దేహేంద్రియాది సంఘాతమా? లేక అందుకు వ్యతిరేకమైనదా? అని ప్రశ్నించెను''. వ్యాసుడు అందుకుతగిన ప్రత్యుత్తర మిచ్చినప్పటికి శుకుడు తృప్తి నొంద లేదు. అపుడు వ్యాసుడు తానంతకు మించి చెప్పగల్గినదేదియు లేదు. జనకుడను రాజు ఒకడు గలడు. అతని కడకేగిన అతడు నీకు తగిన సమాధానము చెప్పగలడని పలకగా, శుకుడు తండ్రి సలహా మేరకు విదేహ నగరమునకు ఏతెంచి, ద్వారము వద్ద తన రాకను జనకునకు తెలియబంపెను. జనకుడు ద్వార పాలకుని మాటవిని ఏ మాత్రము బదులివ్వలేదు. శుకుడు ఏడురోజులట్లే ద్వారము చెంతయూరకుండెను. తదుపరి లోనికి ప్రవేశింప అనుమతి నొసంగెను. శుకుని పరీక్షింపనెంచి జనకుడు మరల ఒక వారము దినముల వరకు రాజదర్శనము లభించదని తెలియపర్చెను. వారము దినములలో శుకునకు అందమైన యువతులు, భోజన వస్తువులు విలాస ద్రవ్యములు పంపి శుకునకు బరిచర్యలు నొసర్చెను.

శుకుడు దుఃఖ స్వరూపము గల ఆభోగ్యవస్తువులకు ఏవిధముగ చలింపక స్ధిరచిత్తుడై యుండెను. అపుడు జనకుడు శుకదేవుని స్వభావమును గ్రహించి, అతనిని పిలువనంపి, రప్పించి అతనికి వందన మొనర్చి ఇట్లు పల్కెను. నీవు జగత్తు నందలి కర్తవ్యములన్నింటిని నెరవేర్చితివి కృతకృత్యుడవైతివి.

నీవేమి పని మీద వచ్చితివని ప్రశ్నించెను. అందుకు శుకుడు జనకుని గురువుగా ఎంచి, ఈ సంసారాడంబర మెట్లు ఉదయించి, ఎట్లు ఉపశమించునో తెలుపమని పల్కెను. అపుడు జనకుడు వ్యాసుడు చెప్పిన సమాధానమే చెప్పెను. అపుడు శుకుడు ఆ విషయము తనకు తెలుసుననియు, శాస్త్రములు కూడ అట్లే తెలుపుచున్నవని పల్కెను. నిస్సారమగు ఈ సంసారము అజ్ఞానము నుండి వెలువడుచున్నది. అజ్ఞానము నశించిన, ఇదియు నశించునని పల్కెను. ఈ విషయము ఎంత వరకు సత్యమో తెలియబర్చి తనకు శాంతి నొసంగుమని కోరెను.
🌹 🌹 🌹 🌹 🌹
🙏 ప్రసాద్

🌹 శ్రీ యోగ వాసిష్ఠ సారము - 2🌹

🌹 శ్రీ యోగ వాసిష్ఠ సారము 🌹
✍ రచన : పేర్నేటి గంగాధరరావు
2 వ భాగము

🌴 ఉత్పత్తి ప్రకరణము 🌴

1. వైరాగ్యము

అపుడతని వయస్సు 15 సంవత్సరములు. కొంతకాలమట్లు గడిపినపిదప, ఆలోచనా పూరితుడై, మనస్సు వికలముకాగా, చింతించుచు క్రమముగా కృశింపసాగెను. అట్లు చింతాక్రాంతుడైన రాముని గాంచి దశరధుడు, అతని భార్యలు చింతించుచుండిరి. తదుపరి వసిష్ఠునిగాంచి, రాముని గూర్చి ప్రశ్నించగా వసిష్ఠుడు ధ్యానించి రాముని ఉదాసీనతకు కారణము గ్రహించుచుండ....విశ్వామిత్రుడు తనయజ్ఞమును దానవులదాడి నుండి కాచుటకై శ్రీరాముని కొనిపోదలచి దశరథుని కోరుటకై ఏతెంచె. అపుడు దశరధుడు విశ్వామిత్రుని సాదరముగ ఆహ్వానించి, సకలోపచారములు గావించి, తాము విచ్చేసిన కారణమేమని అడుగుచు, తమకు ఏది అవసరమైనను సంతోషముగ సమర్పింతునని వినయముతో ప్రార్థించెను. 

విశ్వామిత్రుడు తాను ఆచరించుచున్న యజ్ఞరక్షణకై శ్రీరామచంద్రుని కొనిపోవుటకై వచ్చితినని, అతనిని తగిన అస్త్రశస్త్రములతో తీర్చిదిద్దగలవాడనని వివరించి చెప్పగా, దశరధుడు చింతించుచు, తన 15 సంవత్సరముల తనయుడు, రాముడు కేవలము బాలుడని, తానే స్వయముగా విచ్చేసి రాక్షస సంహారమొనర్చి యజ్ఞమునకు రక్షణనిచ్చెదనని పల్కగా, విశ్వామిత్రుడు అటులకాదని తాను రాముని తగు విధముగా తన అస్త్రశస్తముల నొసగి శిక్షకుని గావించెదనని మరల పల్కగా దశరధుడు తన కుమారునిపై గల అతిప్రేమతో భయపడుచుండ, వశిష్ఠుడు దశరధునికి విశ్వామిత్రుని శక్తి సామర్ధ్యములను వివరించి, ఏమియు భయపడవలసిన పనిలేదని నుడవగా, దశరధుడు సమ్మతించి శ్రీరాముని పిలువనంపెను. 

శ్రీరాముడు అపుడు యాత్రానంతరము కొంతకాలము విశ్రమించిన తదుపరి, ఈ ప్రాపంచిక వ్యవహారములకు డస్సి, చింతాక్రాంతుడై విచారముతో విచలిత మనస్సుడై వుండగా, దశరధుని వార్త విని, తండ్రి ఆనతితో, ఆస్ధానమునకు విచ్చేసి, అచట గల రాజ, పురోహిత, మంత్రి, సామంతులగని తాను, ప్రాపంచిక విషయములందాసక్తి, కోల్పోతినని, దుఃఖదాయకములైన జరామరణములు, సంపదలు మరల మరల వచ్చుచు పోవుచున్న ఈ ప్రపంచము ఎడ, విరక్తితో వున్నానని, మనశ్మాంతి కొరవడినదని విన్నవించగా; అలాగే మోహము, అహంకారము, సంపదలు మొదలగువానికోర్చి, అన్నపానములు వదలి వేసితినని తెల్పెను. ఇలాంటి నాకు ఆర్యులు తత్వబోధ నొనర్చుడని పల్కెను. తృష్ణవలన సంసార దోషములు కల్గి దీర్ఘ దు:ఖమును కల్గించును. బహుపశువులమెడను గట్టిన త్రాడు మరొక పెద్ద త్రాడుకు గట్టబడునట్లు, ఈ సంసారమున చరించుజీవుల మనస్సు తృష్ణయను త్రాటికి గట్టబడియున్నదని,

దీని ఫలితమే జరామరణములని శ్రీరాముడు పల్కినాడు. అలానే ఈ శరీరము మలమూత్రములతోలు సంచియని, వయస్సుతో పాటు శరీరము కొంత వయస్సు వరకు పెరుగుచూ తరువాత క్రమముగా క్షీణించి చివరకు మరణమునకు దారి తీయునని, మాంసము, నరములు, ఎముకలులో నిర్మింపబడిన ఈ అధృడ శరీరము నుండి బయటపడు ఉపాయము తెలియుటలేదనియు, ఇంకను ఈ శరీరము రోగములకు ఆవాసమై, క్రమముగా చర్మము ముడుతలుపడుచు, నెఱసిన వెంట్రుకలతో, మనోవ్యాధులతో కూడిన, ఈ శరీరమున్నంత కాలము రోతకల్గుచున్నదనియు, శైశవము, బాల్యము, యవ్వనము, వార్ధక్యములతో కూడిన ఈ శరీరము దుఃఖమయమనియు, శైశవములో అజ్ఞానము, బాల్యములో చాపల్యము, యవ్వనములో భ్రమలు కల్గిచుచుండునని, తదుపరి సంతానము కల్గి వారి పోషణ, పాలనతో దు:ఖసముద్రమున మునిగి చివరకు వార్ధక్యములో, కాలుడు సదాకాచుకొని యుండి, ఏక్షణమున కాటువేయునో అని విచారించుచుండునని జనులు నిరంతరము కుటిలయత్నము లోనర్చుచూ, కామాసక్తులై యుండగా, వివేకులు ఎచ్చటను కనిపించుట లేదని అనేక విధములుగా చింతించుచూ, మానవునికి ఉత్తమమైనది భ్రాంతినాశనమైనది, శ్రమలేనిదియైన మార్గమేమిటో తెలియపర్చవలెనని కోరుచూ.... 
జనకాది మహర్షులు అన్ని వ్యవహారములు నడుపుచూ, కర్మనిరతులై యుండియు ఎట్లు శ్రేష్ఠులుగా వ్యవహరింపబడుచున్నారని ప్రశ్నించెను. అలానే సంసార వ్యవహారములందు పాల్గొనుచున్నను, తామరాకునందలి నీటిబొట్టు వలె నిర్లిప్తులై యుండుటకు కారణమేమిటని ప్రశ్నించెను.

ఇంకను ఈ సంసారము నిరంతరము పీడకల్గించునదియెకాని, మోహరహితమై, రుచికరముగా ఎట్లు వుండగలదు? పాదరసము అగ్నిలో పడినను దహింపబడదు. అలానే మనిషి మేయుపాయమువలన, సంసారాగ్ని పడియు, తపింప బడకుండగలడు? కర్మలొనర్చినను, లేక నొనర్చకపోయినను దుఃఖముకలుగని యుత్తమయోగమును ఉపదేశింపుమనియు, లేనిచో ఈ దేహమును, ఇతర బంధుమిత్రులను పరిత్యజించి, ఈ శరీరమునుత్యజింతుననియు పల్కి మౌనము వహించెను.
🌹 🌹 🌹 🌹 🌹
🙏 ప్రసాద్

🌹 శ్రీ యోగ వాసిష్ఠ సారము - 1🌹

🌹 శ్రీ యోగ వాసిష్ఠ సారము 🌹
✍ రచన : పేర్నేటి గంగాధరరావు
1 వ భాగము
🌴 ఉత్పత్తి ప్రకరణము 🌴
వైరాగ్యము - 1

మోక్షము లభించాలంటే కేవలం కర్మయోగము లేక కేవలం జ్ఞానయోగము సరిపోదు. ఆ రెండు పరస్పర ఆధారములు.

ఎట్లనిన పక్షి ఎగరాలంటే రెండు రెక్కలు అవసరం.
విష్ణుమూర్తంతటి వాడే భక్తుల శాపవశంబున రామావతారమెత్తి సతీవియోగ దుఃఖమనుభవించె.

సనత్కుమారుడు బ్రహ్మలోకమందున్నపుడు విష్ణువు అచట కరుదెంచగా బ్రహ్మదులెల్లరు విష్ణువును పూజించ, సనత్కుమారుడు నిష్కాముడగుటచే విష్ణువును పూజించలేదు. అందుకు విష్ణువు కోపించి సనత్కమారుని కుమారస్వామివై జన్మించి, కామపీడితుడ వగుమని శపింప, సనత్కుమారుడు విష్ణువుపై అలిగి విష్ణువుని శపించెను. అపుడు విష్ణువు శ్రీరామునిగా జన్మించి సర్వజ్ఞత్వమును కోల్పోయి కొంతకాలము జీవించమనెను.

భృగువు భార్య విష్ణువుని పూజించి అతనిలో లీనమయ్యెను. అపుడు భృగువు తన భార్య మరణమునకు విష్ణువు కారణమని భ్రమించి విష్ణువును, భార్యా వియోగముతో జీవించమని శపించె.

అలాగే రాధ శాపము వలన కృష్ణుని సఖుడైన సుధాముడు మరు జన్మములో జలంధరునిగా జన్మించినపుడు అతనిని వధించుటకు కృష్ణుడు జలంధరుని భార్య బృంద యొక్క పతివ్రతా ధర్మమును మాయతో తప్పునట్లుగా చేయగా, బృంద కోపించి, భార్యావియోగముతో జీవించమని శపించెను.

ఇంకొక పర్యాయము దేవదత్తుని భార్య నృసింహ రూపి, విష్ణువుని చూచి భయంతో ప్రాణములు విడువగా దేవదత్తుడు కోపించి విష్ణువును భార్యావియోగము పొందుమని శపించె. ఈ విధముగా వివిధ భక్తుల శాప కారణమున విష్ణువు శ్రీరామునిగా అవతారమెత్తి శాప ఫలితము అనుభవించె. దేముడంత వానికే కర్మఫలిత మనుభవింప తప్పలేదు. మానవులమైన మనకు తప్పునా! (తప్పదు అని భావము) యధార్ధముగా వాస్తవము కాని ఈ జగత్తు బ్రహ్మము వలన ఆరోపించబడుచున్నది. ఇట్టి కల్పిత ప్రపంచము మరల మనస్సు నందు ఉదయించకుండునట్లు విస్మరింపబడుటమే ముక్తి స్వరూపము. కనబడే ప్రతి వస్తువు స్థిరత్వము లేనిది, ఆశాశ్వతమైది, బ్రహ్మ మొక్కటే స్థిరత్వము కల్గినది. మిగిలిన ప్రపంచము భ్రాంతి మాత్రమే. వాసనలు అనగా సంస్కారముల త్యాగమే మోక్షము.

సంస్కారములు రెండు రకములు (1) మలిన సంస్కారములు (2) శుద్ద సంస్కారములు. మలిన సంస్కారములు జన్మకు కారణము. శుద్ద సంస్కారములు జన్మ నాశనమునకు తోడ్పడును. మలిన సంస్కారములు అహంతో కూడి పునర్జన్మకు కారణమైన, శుద్ద సంస్కారములు పునర్జన్మకుపయోగ పడే అంకురములను దగ్ధము చేయును. ఇవి వేయించబడిన గింజల వంటివి. శ్రీరాముని చరిత్ర తెలుసుకున్న అతడు సంస్కారములనెట్లు తొలగించుకొనెనో తెలియగలదు.

శ్రీరాముడు గురుకులము నుండి విద్యార్జన చేసి తిరిగి వచ్చి కొంత కాలమున్న తదుపరి తీర్ధములు, పవిత్ర ఆశ్రమములు జూడ కోర్కెగల్గి తండ్రి అనుమతి పొంది, వశిష్ఠుని ఆశీస్సులతో ఒక శుభదినమున కొందరు ముఖ్యులతో కూడి అడవులు దాటి పోవుచూ, మధ్యమధ్య వచ్చు ఆశ్రమములను, పర్వతములు, నదులు, ప్రయాగ, నైమిశారణ్య, వారణాసి, గయ, కేదార, శ్రీశైల, మానస సరోవరములు మొ|| సకల తీర్థములు సేవించి అనుజులతో గూడి పరిభ్రమించె. తిరిగి నిజపురికేతెంచి, బంధుమిత్రులందరితో ఎనిమిది దినములు ఉత్సవములు జరుపుకొని సుఖముగా గృహముననుండెను.

తదుపరి రాముడు దైనిక కృత్యములు నిర్వహించుచు తమ్ములతో గూడి పితృగ్రహమున వాసమొనర్పసాగెను.
🌹 🌹 🌹 🌹 🌹
🙏 ప్రసాద్

క్రియ - పరిశ్రమ విలువ

🌹మాస్టర్ కూత్హూమి బోధనలు🌹

🌴 క్రియ - పరిశ్రమ విలువ  🌴

పని యందు ప్రేమ ప్రధానము. పని లేనివాని జీవితము వృథా. పనికిరాని జల్సారాయుళ్ళు సృష్టి కపకారము చేయుచున్న వారే.

చెట్లు, పుట్ట, పాము, పంచభూతములు, దేవతలు అందరును పని యందు నిమగ్నులై యున్నారు. పని విలువ తెలిసిన వారికే పనియందు ప్రేమ కలుగును. విలువైన విషయములందు ప్రేమ కలుగుచుండును గదా!

బంగారము, వజ్రములు, ఆభరణములు, ఆస్తులు, మనకుపయోగపడు మనుషులు, సంస్థలు వీటన్నింటిని మనము ప్రేమింతుము. కారణము వాటి విలువ తెలియుటయే. కాని యివి యన్నియు లౌకికమైన విలువలు. పని విలువ తెలిసినవారు అలౌకిక శక్తులను కూడ ఆవాహనము చేసుకొను స్థితి యందుందురు.

ప్రాణము మన యందు అహర్నిశలు పనిచేయు చున్నది. అట్లే మెలకువ కలిగిన క్షణము నుండి నిద్రించువరకు ఏదో ఒక నిర్మాణాత్మక, సృజనాత్మకము అగు కార్యమున నిల్చి యుండుట, ఆ కార్యమును క్రతుబద్ధము చేయుట దీక్ష సాగవలెను. ఇట్టి వారియందు క్రియాశక్తి పరిపూర్ణముగ వికసించి పరిసరములకు తోడ్పడును.

ఇట్టి వారికే సోదర బృందమున అర్హత కలుగును. పనికిమాలిన విషయములు పది చర్చించుట కన్న పనికివచ్చు పనిచేయుట చాల ప్రధానము.

ఇట్టి పనికి ఫలితములతో సంబంధము లేదు. పనియే జీవమై పురోగతి కలిగించగలదు.
🌹 🌹 🌹 🌹 🌹
🙏 ప్రసాద్

సర్వయోగ సమన్వయము - గుప్తవిద్య (సీక్రెట్‌ డాక్ట్రిన్‌) - 52

 

🌹 సర్వయోగ సమన్వయము - గుప్తవిద్య (సీక్రెట్‌ డాక్ట్రిన్‌) - 52 🌹 

52 వ భాగము

✍️ రచన : పేర్నేటి గంగాధరరావు

📚. ప్రసాద్ భరద్వాజ

🍃 ప్రాణాయామము - 2 🍃 

391. అభ్యాస యోగములో శ్వాసను ఓంకారముతో పీల్చి బయటకు పోకుండా ఆపి, ప్రాపంచిక విషయములపై మనస్సు పోకుండా నశింపజేయుటయే అభ్యాస యోగమని పేరు. దీని ద్వారా ఇంద్రియములను అరికట్టుట, మనస్సును హృదయమునందు స్థిరపర్చుట, ప్రాణవాయువును బ్రహ్మరంధ్రమున నిలుపుట, ఓం కారము ఉచ్ఛరించి శ్వాసను లయింపజేయుట జరుగును. 

392. ప్రాణాయామమునకు మనస్సుకు చాలా సన్నిహిత సంబంధమున్నది. ఇది మనస్సు యొక్క చంచలత్వమును నశింపజేయును. మనస్సు బహిర్ముఖము కాకుండును. మనస్సు ప్రాణములు పరస్పరము నిరోధించబడును. కావున సాధకుడు యోగాభ్యాసము నందు కొంత సమయము ప్రాణాయామ సాధనలో కేటాయించిన మనస్సు నిశ్చలమగును. 

393. సాధకులు ప్రాణాయామము చేయునపుడు 'ఓం' అను మంత్రముతో పీల్చి 'ఓం' అను మంత్రముతో వదలవలెను. అలానే 'సోహం' మంత్రమును కూడా ప్రాణాయామముతో జతపర్చాలి. శ్వాసను పీల్చినపుడు 'సో' అనియూ వదలినపుడు 'హం' అనియూ ఉచ్చరించుచుండవలెను. పీల్చుచున్నప్పుడు బ్రహ్మ భావమును పెంచుకొనుచు, వదలుచున్నప్పుడు జీవ భావము తగ్గించుకొనవలెను. చివరకు నేనే బ్రహ్మమును అని దీని భావము. 'అజప' గాయత్రిలో 'సోహం', 'హంసో' అని జపించిన, నీవే నేను, నేనే నీవు అని సాధన చేసినట్లగును. ఈ విధముగా సోహం మంత్రమును సర్వకాల సర్వావస్థలందును జపము చేయు వారికి మరుజన్మ ఉండదు. 

394. ప్రాణాయామ సాధనా విధానము: మొదట కుడిముక్కును కుడిచేతి బొటన వ్రేలితో నొక్కిపెట్టి, ఎడమ ముక్కుతో గాలిని పూర్తిగా పీల్చి నింపవలెను. ఆసమయములో బ్రహ్మ తత్త్వములో ఉండి జగత్తు తనలో లీనం అవుతున్నట్లు భావించాలి. అలా ఉంచగలిగినంత సేపు ఉంచాలి. తరువాత ఎడమ నాశికను మూసి, నిలిపి ఉంచిన గాలిని కుడి నాశిక గుండా బయటకు వదలాలి. అట్టి శూన్యక కుంభకములో ఉండగలిగినంత సేపు ఉండి, తరువాత కుడి నాశికను ద్వారా గాలిని పీల్చి, నిల్పి ఉంచి ఎడమ నాశిక ద్వారా గాలిని బయటకు వదలాలి. ఇపుడు ఒక రౌండు పూర్తి అయినట్లు. రెండవ రౌండు మొదట తెల్పినట్లు ఎడమ ముక్కుతో పీల్చి బిగబెట్టి కుడిముక్కుతో వదలాలి. మరల కుడి ముక్కుతో పీల్చి బిగించి ఎడమ ముక్కుతో వదలాలి ఇలా చేయగల్గినన్ని రౌండ్లు కనీసము 5 సార్లు ఒక వారము చేసిన తరువాత, ఒక్కొక్క రౌండు పెంచుకుంటు 10 రౌండ్ల వరకు చేయవచ్చు. సాధారణముగా 10 రౌండ్లు సరిపోతాయి. ఇలా 10 రౌండ్లు పూర్తి చేయుటకు 5 నుండి 10 నిమిషములు పట్టవచ్చు.

395. ప్రాణాయామములో ఇంకొక విధానము: పైన తెల్పినట్లు ఏ విధమైన పూరక శూన్యక కుంభకములు లేకుండా ఆపకుండా చేస్తూ పోవాలి. ఇలా చేయుటకు మొదట పదిరౌండ్లతో మొదలపెట్టి 20, 30, 50 పెంచుకుంటూ 108 రౌండ్ల వరకు చేయవచ్చు. అందుకు షుమారు 5 నిమిషములు చాలు. 

396. ప్రాణాయామములో మూడవ విధానము: కుడి ముక్కు నొక్కి పెట్టి ఎడమ ముక్కుతో శ్వాసను వదులుతూ పీల్చుకుంటూ అదే ముక్కుతో 10, 20, 30, 108 రౌండ్లవరకు క్రమముగా పెంచుకుంటూ చేయాలి. దీనికి చంద్రభేది ప్రాణాయామమని పేరు. 

397. ప్రాణాయామములో నాలుగవ విధానము: ఎడమ ముక్కు నొక్కి పెట్టి కుడి ముక్కుతో శ్వాసను వదులుతూ పీల్చుకుంటూ అదే ముక్కుతో 10, 20, 30, 108 రౌండ్ల వరకు క్రమంగా పెంచుకుంటూ చేయాలి. దీనికి సూర్యభేది ప్రాణాయామమని అంటారు. 

398. ప్రాణాయామములో ఐదవ విధానము: ఈ పద్ధతిలో రెండు ముక్కుల ద్వారా శ్వాసను వదులుతూ పీల్చుకుంటూ అలానే 10, 20, 30, 108 రౌండ్ల వరకు పెంచుకుంటూ పోవాలి. దీనికి భస్త్రికా ప్రాణాయామమని పేరు. 

399. ప్రాణాయామములో ఆరవ విధానము: ఈ పద్ధతిలో రెండు ముక్కుల ద్వారా శ్వాసను గట్టిగా వదులుతూ ఉండాలి. ప్రత్యేకంగా పీల్చుకోవలసిన పనిలేదు. దీనికి కపాలభాతి అని పేరు. ఈ పద్ధతిలో శ్వాసను ప్రత్యేకముగా పీల్చకపోయినప్పటికి ఒక సారి వదలి మరల రెండవ సారి వదలినపుడు మధ్యలో కొంత సమయము మనకు తెలియకుండానే కొంచము శ్వాసను తీసుకొనుట జరుగుతుంది. ఈ ప్రాణాయామము వలన లోపల ఉన్న చెడు అంతా వేగముగా ఊడ్చిపెట్టినట్లు బయటకు నెట్టివేయబడుతుంది. కొత్త శక్తిని నింపుకొనుటకు వీలవుతుంది. తలలో ఉన్న అడ్డంకులు (బ్లాక్సు) తొలగిపోతాయి. 

400. ప్రాణాయామములో ఏడవ విధానము (శ్రీతలి):- ఈ పద్ధతిలో నాలుకను ముందుకు చాపి మడత పెట్టి నోటి ద్వారా గాలిని పూర్తిగా పీల్చుకొని నోరు మూసి ముక్కుతో గాలిని వదలాలి. అలా నాలుక ద్వారా పీల్చుకుంటూ ముక్కు ద్వారా వదులుతున్నప్పుడు శరీరములోని వేడిగాలి. బయటకు వెళ్ళి సమత్వ స్థితి ఏర్పడుతుంది. ఇది కూడా 10, 20, 30, 108 సార్లు చేయవచ్చు.

🌹 🌹 🌹 🌹 🌹

#ChaitanyaVijnanam #PrasadBhardwaj #చైతన్యవిజ్ఞానం #BookofDzyan #Theosophy

29 Apr 2019

సర్వయోగ సమన్వయము - గుప్తవిద్య (సీక్రెట్‌ డాక్ట్రిన్‌) - 51

 

🌹 సర్వయోగ సమన్వయము - గుప్తవిద్య (సీక్రెట్‌ డాక్ట్రిన్‌) - 51 🌹 
51 వ భాగము

✍️ రచన : పేర్నేటి గంగాధరరావు
📚. ప్రసాద్ భరద్వాజ

🍃 పరాణాయామము - 1 🍃 

380. మనిషి, అనారోగ్యానికి కారణము ప్రాణ సంచారము. శరీరములో సమానముగా ప్రసరించకుండుట అని గ్రహించాలి. అందుకు కారణము చిత్త ఏకాగ్రత లేకపోవుట. చంచల మనస్సు, రజోగుణ విజృంభణ కారణముగా ప్రాణ సంచారము సమస్థితిలో జరుగుట లేదు. 

381. ప్రాణాయామము అభ్యాసము ద్వారా ఎక్కువ తక్కువలుగా నున్న ప్రాణశక్తిని, లోపములను తెలుసుకొని సమస్థితిలో ఉంచుకొని వివిధ కేంద్రాలకు పంపిణి చేయుట జరుగుతుంది. అపుడు అనారోగ్యము తొలగిపోవును. 

382. యోగ సాధనలో ప్రాణాయామము ఒక అంశము. యోగం యొక్క అష్ఠాంగములలో ప్రాణాయామము ఒక అంగము మాత్రమే. స్థిర ప్రాణము నుండి చంచల ప్రాణావస్థకు దిగినవాడి పేరు జీవుడు. తిరిగి స్థిర ప్రాణుడగుటయే ఆత్మ స్థితి. 

383. ప్రాణాయామము ద్వారా సాధకుడు భౌతిక ప్రాణశక్తులను వశపర్చుకొని ఉశ్చ్వాస నిశ్వాసముల గతిని క్రమపర్చును. యోగమునకు ప్రాణాయామము మొట్టమొదటి ఆవశ్యకత. 

384. ప్రాణాయామము అనగా ప్రాణ ''నిగ్రహత'' అని అర్థము. ఉశ్చ్వాస నిశ్వాసములను తగ్గించుటయే ప్రాణాయామ ముఖ్య ఉద్దేశము. ప్రాణవాయువును అపానములో చేర్చుటే ప్రాణాయామము. ప్రాణాన్ని వశంచేసుకోవటమే ప్రాణాయామము యొక్క ముఖ్య ఉద్దేశము. క్రమముగా ప్రాణమును బిగబట్టుచూ చేయు సాధన ప్రాణాయామాభ్యాస మనబడును. అనేక శారీరక వ్యాయామములు శరీరమునకు చెందినవి. ప్రాణాయామము ఉశ్చ్వాస నిశ్వాసములకు సంబంధించిన వ్యాయామము. 

385. అపానవాయువు నందు ప్రాణ వాయువును, ప్రాణవాయువునందు అపానవాయువును హోమము చేయుటే ప్రాణాయామము. యమనియమాలలో ఇది 4వది. 

386. ప్రాణాయామములో పూరక, రేచక, కుంభకములు కలవు. 1) బయటి వాయువును లోపలకు పీల్చుట పూరకమందురు. ఇదియె ఉశ్చ్వాసము. ప్రాణమును హోమము చేయుటను పూరకమందురు. రేచకమనగా లోపలి వాయువును ముక్కురంధ్రముల ద్వారా బయటకు వదులుట. ఇదియె నిశ్వాస క్రియ. కుంభకమనగా లోపలకు పీల్చిన గాలిని, వెంటనే బయటకు వదలక వీలైనంత సేపు నిలిపి ఉండుటను పూరక కుంభకమంటారు. గాలిని వదలిన తరువాత వెంటనే పీల్చక, నిలిపి ఉంచుటను రేచక కుంభకమని అంటారు. ఈ రెంటిని అంతఃకుంభకమని, బాహ్యకుంభకమని కూడా అంటారు. బాహ్య కుంభకాన్ని శూన్యక కుంభకమని కూడా అంటారు. 

387. కుంభక ప్రాణాయామములో గాలి పీల్చినపుడు ప్రాణవాయువు శరీర అంతర్భాగములకు లోతుగా వెళ్ళి అందున్న కణజాలముకు శక్తినొసంగును. అలానే రేచక కుంభకములో లోతైన అంతర్భాగములో గల చెడు పదార్థములను సేకరించి బయటకి నెట్టివేయును. కావున పూరకము వలన కణజాలము శక్తివంతము, రేచకము వలన చెడు తొలగి శరీరమంతయు ఆరోగ్యవంతమగును. 

388. పూరక రేచక కుంభకముల వలన శరీరాంతర్భాగములో గల వెన్నెముకలో ఉన్న ఇడ, పింగళ, సుషుమ్న నాడులు చైతన్యవంతమై మూలాధారములో ఉన్న కుండలిని ఊర్ధ్వముఖమై సహస్రారములో ప్రవేశింపజేయును. శివ శక్తుల సమ్మేళనము ఏర్పడి బ్రహ్మానంద స్థితి కల్గి ముక్తికి మార్గము ఏర్పడును. 

389. పూరక రేచక కుంభకములతో పాటు కేవల కుంభకము ఒకటి కలదు. అందులో పూరకంతో రేచకంతో పనిలేకుండా అకస్మాత్తుగా శ్వాసను కుంభించి బిగబెట్టినచాలు. దీని వలన శరీరము కాయకల్పమగును. ఆయుర్వృద్ధి అగును. 

390. 2 నయనేంద్రియముల మధ్య, 2 ముక్కు ద్వారముల యొక్క పై భాగమున, ఈ మూడు కలిసే కూడలిని భ్రూమధ్యము (త్రివేణి సంగమము) అని అంటారు. శ్వాస ఎడమ కుడి ముక్కు రంధ్రముల ద్వారా ఆడుచుండును. ఈ రెండును భ్రూమధ్యమున చేరి ఒక చోట కలసి అచట నుండి సహస్రారమునకు చేరును. అచట కుండలిని శక్తిని ప్రజ్వలింపజేయును. ఆవేడిమికి బ్రహ్మ కపాలమునందు గల అమృతము కరిగి చుక్కలుచుక్కలుగా కారుచుండును. అదే ఆనంద స్థితి. జ్యోతి స్వరూపమును దర్శించు స్థితి.

🌹 🌹 🌹 🌹 🌹

#ChaitanyaVijnanam #PrasadBhardwaj #చైతన్యవిజ్ఞానం #BookofDzyan #Theosophy

28 Apr 2019

సర్వయోగ సమన్వయము - గుప్తవిద్య (సీక్రెట్‌ డాక్ట్రిన్‌) - 50

 

🌹 సర్వయోగ సమన్వయము - గుప్తవిద్య (సీక్రెట్‌ డాక్ట్రిన్‌) - 50 🌹 
50 వ భాగము

✍️ రచన : పేర్నేటి గంగాధరరావు
📚. ప్రసాద్ భరద్వాజ

🍃 యగం చేయాలంటే శరీరం తప్పనిసరి - 3 🍃 

374. ప్రాణమయ శరీరము(ప్రాణ శక్తి): ఈ స్థూల శరీరము పనిచేయాలంటే అందుకు కావలసిన శక్తిని అందించునదే ప్రాణమయ శరీరము. ఒక వాహనము నడవాలంటే ఇంధనము కావాలి. అలానే ఈ శరీరమునకు ప్రాణ శక్తి ఇంధనము. ఈ ప్రాణ శక్తిని ఉత్పత్తి చేసే నాడులు చక్రములు. ఈ ప్రాణమయ శరీరములోనే ఉన్నవి. 

375. యాతనా శరీరము స్థూల సూక్ష్మ శరీరాలకు అనుసంధానముగా వ్యవహరిస్తున్నది. స్థూల సూక్ష్మ శరీరముల క్రియలు ఈ యాతన శరీరమునకు తెలియవు. స్థూల శరీరం లేకపోయినా, స్వర్గ నరకాలను అనుభవించేది యాతనా శరీరమే.

376. ఆత్మ శరీరము: 

మృత్యువును జయించిన వారు ఈ శరీరమును ధరిస్తారు. వీరు సత్యలోకాలలో యోగులుగా ఉంటారు. జనన మరణాలుండవు. అపుడపుడు దైవ కార్య నిమిత్తము భూమిపై అవతరిస్తుంటారు. 

377. ఇడ, పింగళ, సుషుమ్న నాడులు యోగమందు ప్రధాన పాత్ర వహిస్తాయి. ఇవి మూలాధారము వద్ద మొదలై ఆజ్ఞాచక్రము వరకు వెన్నుపూసలో ఉంటాయి. మధ్య నున్న సుషుమ్న నాడి ఆజ్ఞాచక్రమును దాటి బ్రహ్మ రంధ్రము వరకు వ్యాపించి కుండలిని శక్తిని చేరుతుంది. 

378. మూలాధార చక్రానికి ఉన్న త్రికోణానికి ఎడమవైపున వున్నది ఇడనాడి. కుడివైపున వున్నది పింగళనాడి. ఈ రెండింటికి మధ్యలో ఉన్నది సుషుమ్న నాడి. ఇది మూలాధారము నుండి సహస్రారము వరకు వ్యాపించి బ్రహ్మ రంధ్రములో చేరి బ్రహ్మానందమును అనుభవించును. ఇవిగాక 72,000 నాడులు, ఉపనాడులు వెన్నుపూస నంటి ఉండి పని చేయుచుండును. 

379. షట్‌ చక్రాలు: 1) మూలాధారము 2) స్వాధిష్ఠానము 3) మణిపూరకము 4) అనాహతము 5) విశుద్ధము 6) ఆజ్ఞా 7) సహస్రారము. 

1. మూలాధార చక్రము: గుదస్థానమున కలదు వినాయకుడు అధినేత. 4 దళములు కలిగి ఉండును.

2. స్వాధిష్ఠాన చక్రము: 6 దళములు. బ్రహ్మ దీనికి అధిష్ఠాన దేవత. లింగస్థాన మందుండును. 
3. మణిపూరక చక్రము: 10 దళములతో విష్ణువు అధిష్ఠాన దేవతగా ఉండును. నాభిస్థానమునందు కలదు. 4. అనాహత చక్రము:- ఇది హృదయ స్థానము నందు కలదు. 12 దళములు. రుద్రుడు అధిష్ఠాన దేవత.

5. విశుద్ధ చక్రము:- ఇది కంఠ స్థానమున 16 దళములతో ఉన్నది. దీనికి జీవుడు అధిష్ఠాన దేవత.

6. ఆజ్ఞా చక్రము:- ఇది 2 దళములతో ఈశ్వరుడు అధిష్ఠాన దేవతగా ఉండును. భ్రూమధ్యమున ఇది వెలుగొందుచుండును. ఇదే మూడవ నేత్రము.

7. సహస్రార చక్రము:- యోగ ప్రయాణములో చివరి స్థానము సహస్రారము. ఇది జ్యోతిర్మయ స్థానము. శ్రీ గురుమూర్తి దీనికి అధిష్ఠాన దేవత. ఈ వేయి రేకుల మధ్య అష్టదళ పద్మముండును.

8. కుండలిని: ఇది మూలప్రకృతి. దీనిని ఈశ్వరి, మహామాయ, జగదాంబ, పరాశక్తి అని అంటారు. దీనికి సహస్ర దళములు కలవు. జీవుని నడిపించే ఈ కుండలిని కొన్ని వేల నాడులతో షడ్జక్రాల ద్వారా సహస్రారమున చేరి బ్రహ్మానంద స్థితిని పొందుతుంది.

9. కుండలిని లేక మాయా శక్తి ప్రేరణలో చక్ర స్థానమందున్న దళములుకదలి, జీవుడు ప్రారబ్ధమునను భవించుటకు ప్రేరణ పొందును. త్రిగుణముల కారణముగా ఆగామికర్మ చేయుటకును ప్రేరణ పొందును.

10.చంచల ప్రాణాన్ని ఊర్థ్వ ముఖముగా నున్న ఆజ్ఞా చక్రములో స్థిరముగా నిలుపు యోగమును ఊర్థ్వ రేతస్సు అందరు. సహస్రారములో ఆత్మ సాక్షాత్కారము పొందిన వాడిని ఊర్థ్వ రేతస్కుడు అందురు.

🌹 🌹 🌹 🌹 🌹

#ChaitanyaVijnanam #PrasadBhardwaj #చైతన్యవిజ్ఞానం #BookofDzyan #Theosophy

27 Apr 2019

సర్వయోగ సమన్వయము - గుప్తవిద్య (సీక్రెట్‌ డాక్ట్రిన్‌) - 49

🌹 సర్వయోగ సమన్వయము - గుప్తవిద్య (సీక్రెట్‌ డాక్ట్రిన్‌) - 49 🌹 
49 వ భాగము

✍️ రచన : పేర్నేటి గంగాధరరావు
📚. ప్రసాద్ భరద్వాజ

🍃 యగం చేయాలంటే శరీరం తప్పనిసరి - 2 🍃 

364. ఈ శరీరము 25 తత్త్వములతో విరాజిల్లుచున్నది. అందు 5 జ్ఞానేంద్రియములు, 5 కర్మేంద్రియాలు, 5 ప్రాణములు, 5 విషయములు, 4 అంతఃకరణ చతుష్టయము, 25వది జీవాత్మ. 

1. జ్ఞానేంద్రియములు: కన్ను, ముక్కు, చెవి, నాలుక, చర్మము.
2. కర్మేంద్రియములు: కాళ్ళు, చేతులు, నోరు, గుదము, జననేంద్రియము.
3. పంచప్రాణములు: ప్రాణ,అపాన,ఉదాన,సమాన, వ్యాన వాయువులు.
4. విషయ పంచకము: భూమికి వాసన, నీటికి రుచి, అగ్నికి రూపము, వాయువుకు స్పర్శ, ఆకాశమునకు వినికిడి. ఇవి జీవుని యందు గల విషయాసక్తి.
5. అంతఃకరణ చతుష్టయము: మనస్సు, బుద్ధి, చిత్తము, అహంకారము. 25వది జీవాత్మ. 26వది పరమాత్మ.

365. పంచ ప్రాణములు కాక ఉపప్రాణములు 5 కలవు. 1) నాగవాయువు: ఇది మాటలను పలికించును. వాంతి, త్రేన్పులను తెప్పించును. 2) కూర్మవాయువు: కనురెప్పలు తెరచుట, మూయుట చేయును. 3) క్రుకురము: తుమ్ములు వచ్చునట్లు చేయును, ఆకలి దప్పికలు కలుగజేయును. 4) దేవదత్తము: ఆవులింతలు కలుగుజేయును. 5) ధనుంజయవాయువు: శిశువును గర్భము నుండి బయటకి నెట్టి వేయును. శవంలో ఉబ్బించి తరువాత పోవును. 

366. ఈ శరీరము యొక్క గుణములు: 1) కామము 2) క్రోధము 3) లోభము 4) మోహము 5) మదము 6) మాత్సర్యము 7) దంబము 8) దర్పము 9) ఈర్ష్య 10) అసూయ మొదలగునవి. 

367. శరీర రకములు: 1) స్థూల శరీరము 25 తత్వములతో కూడి కర్మలు చేస్తూనే యోగ మార్గాలను అనుసరిస్తూ ముక్తిని పొందుటకు అవసరమై ఉన్నది. అందుకే ''శరీర మాధ్యమం ఖలు ధర్మ సాధనం'' అన్నారు. కంటికి కనిపించని షడ్చక్రాలు, కుండలిని, ఇడా పింగళ, సుషుమ్ననాడులు, ఈ శరీరములోనే ఉన్నవి. ఇవే యోగ మార్గములు. 

368. అజ్ఞాన స్వరూపమైన కారణ శరీరము నుండే ఈ స్థూల శరీరము ఏర్పడినది. ఈ శరీరము 7 జానల పొడవు, 4 జానల వలయము, 70 ఎముకలు, 40 ఫలముల రక్తము, 23 కోట్ల రోమములు, 192 సంధులు, 8 ఫలముల గుండె, 360 ఫలముల మాంసము, 1 సోలెడు పైత్యము, 1 సోలెడు శుక్లములతో ఏర్పడినది. 

369. సూక్ష్మ శరీరము ఇది 17 తత్వములతో ఏర్పడినది. జ్ఞానేంద్రియములు 5, కర్మేంద్రియములు 5, ప్రాణములు 5, మనస్సు, బుద్ధి. దీనికి మనోమయ శరీరమని పేరు. ఇది శ్వేత వర్ణము కలిగి ఉండును. 

370. వ్యక్తి నిద్రించుచున్నప్పుడు, ఇంద్రియములు పని చేయుటలేదు. ఆ సమయములో సూక్ష్మ శరీరమే ఆ పనిని నిర్వహించుచున్నది. ఇట్టి సూక్ష్మ శరీరము అగ్నితో కాలదు, కత్తితో నరకబడదు, నీటిలో తడవదు, గాలికి కదలదు, ప్రళయకాలమందును నశించదు. ఈ సూక్ష్మ శరీరమునకు ఒక కారణ శరీరము కూడా కలదు. కారణ శరీరము నశించిన సూక్ష్మ శరీరము కూడా నశించును. తక్షణం జీవాత్మ పరమాత్మ యందు లయించును. 

371. మోక్షము కోరువాడు మొదట సూక్ష్మ శరీరమునకు మూల కారణమైన కారణ శరీరమును జయించవలెను. దానిని జయించాలంటే బ్రహ్మ సాక్షాత్కారము చేత భ్రాంతిని నశింపజేయాలి. కారణ శరీరమే అజ్ఞానము. స్థూల సూక్ష్మ శరీరముల రెంటికి జన్మకారణమైన అవిద్యయె కారణ దేహము. అహంకారము నశించిన కారణ శరీరము నశించి ముక్తి కలుగును. 

372. అహంకారము వలన అవివేకము కలుగును. అవివేకము వలన అభిమానం కలుగును. అభిమానం నుండి కామక్రోధములు, కామక్రోధముల వలన కర్మలు చేయుట, కర్మల నుండి పునఃజన్మలు కలుగును. 

373. మహాకారణ శరీరము కారణ శరీరమునకు మూల కారణము. జీవుడు ప్రత్యగాత్మ అన్న పేరుతో సహస్రారమున నిల్చి, తురీయావస్థను పొంది, ప్రపంచ విషయములనెరుగక తన నిజానందములో ఉండును. అందుకే యోగ సాధన. మహాకారణ శరీరము ఒక ఆధ్యాత్మికత. ఇదే ముక్తికి మార్గము.
🌹 🌹 🌹 🌹 🌹

#ChaitanyaVijnanam #PrasadBhardwaj #చైతన్యవిజ్ఞానం #BookofDzyan #Theosophy

26.Apr.2019

Is Destiny is fully ripened Karma? Or Its the result of choices we made?

🌹 *Is Destiny is fully ripened Karma? Or Its the result of choices we made?* 🌹
*✍ N.C. Krishna*

*Man is said to be the person responsible for his destiny.*

*In the absence of faith in the Law of Karma, we often curse the events that happen in our life.once we have set the ball in motion, it is definitely going to affect us.*

*With our thoughts, actions, we are responsible for our destiny.*

*As you sow, so you reap, is an old saying. Destiny is fully ripened Karma, which we have to face. Past Karma of previous lives, decides our present life we lead.*

*We cannot change the country in which we are born,the parents to whom we are born. All these unchangeable components are part of our Destiny.*
🌹 🌹 🌹 🌹 🌹
🙏 *Prasad*