స్వేచ్ఛతోనే నైపుణ్యం

🌹. స్వేచ్ఛతోనే నైపుణ్యం 🌹

🍀. ‘స్వేచ్ఛ. మీరనుకుంటున్నది కాదు’ నుంచి ( ఓషో బోధ ) 🍀

అందువల్ల వారికి సహజంగానే జీవితం విసుగనిపిస్తుంది. నా దగ్గరకు వచ్చిన వారిలో చాలామంది ‘‘జీవితం విసుగనిపిస్తోంది’’ అన్నవారే. ఎందుకంటే, వారు ఎక్కడో ఇరుక్కుపోయి చాలా విసిగిపోయారు. చేసేదేముంది? ‘‘మంత్ర జపం’’చేస్తే మళ్ళీ జీవమొస్తుందని వారనుకుంటారు. కానీ, అది అంత సులభం కాదు. అందువల్ల వారు తమ జీవన సరళిని పూర్తిగా మార్చుకోక తప్పదు.

రేపు మీరేం చెయ్యాలో ముందుగా ఊహించకండి. ఏదీ ఆశించకుండా అన్నింటికీ సిద్ధంగా ఉండండి. అప్పుడే మీరు ప్రమాదకరంగా, ప్రమోదంగా జీవిస్తున్నట్లు లెక్క.

మీ మనసులో ఎప్పుడూ ఎవరి పట్లా స్వాధీనతాభావాన్ని చేరనివ్వకండి. దాని వల్ల మీ ప్రేమ కుంగి, కృశించి, నలిగి నాశనమవుతుంది. అప్పుడు మీరు ఏమాత్రం ప్రేమించలేరు.

పనిచెయ్యండి. అది అవసరమే. కానీ, ఆ పనే మీ జీవితంగా మారనివ్వకండి. ఆట మీ జీవిత కేంద్రమవాలి. అలాగే మీ జీవితం ఆ ఆటలా సాగాలి. సరదాగా ఆడుతూ, పాడుతూ పని చెయ్యాలి. కార్యాలయంలో, కర్మాగారంలో- ఇలా ఎక్కడ ఎంత పనిచేసినా, అక్కడ ఆటపాటలకు అవకాశముండాలి. అంతేకానీ, ఎంతో విలువైన మీ జీవితాన్ని కేవలం రోజూ చేసే పని స్థాయికి దిగజార్చకండి. ఎందుకంటే, ఆటే జీవిత పరమావధి.

ఆట అంటే, దానికోసమే అన్నట్లుగా ఏదో ఒకటి చెయ్యడం. అలా దాని కోసమే అన్నట్లుగా అనేక విషయాలను ఆస్వాదిస్తూ ఆనందించినప్పుడు మీరు మరింత సజీవంగా ఉంటారు. అయితే అక్కడ మీ జీవితం ప్రమాదం కోరల్లో, అపాయం అంచుల్లో ఉంటుంది. అయినా జీవితం ఎప్పుడూ అలాగే ఉండాలి.

ప్రతి క్షణం చాలా ఆకర్షణీయంగా కనిపించే అపాయం జీవితంలో ఒక అత్యుత్తమమైన భాగం. మీకు తెలియకపోవచ్చు... మీ ఉఛ్వాస నిస్వాసలలో కూడా ప్రమాదముంది. ఊపిరి వదిలిన తరువాత కచ్చితంగా అది మళ్ళీ వెనక్కి వస్తుందో రాదో ఎవరికి తెలుసు? అందుకు ఎలాంటి హామీ లేదు కదా!

మతాన్ని కూడా భద్రత కోసం ఉపయోగించుకునే మనుషులున్నారు. దేవుడి గురించి మాట్లాడేటప్పుడు కూడా వారు దేవుణ్ణి ‘‘సర్వోన్నత రక్షకుడు’’అంటూ సంబోధిస్తారు. కేవలం భయం కారణంగా వారు దేవుడి గురించి ఆలోచిస్తారు.

అలాగే దేవుడి దృష్టిలో మంచివారుగా కనిపించేందుకు, ‘‘చిత్రగుప్తుడి చిట్టాలో’’ మంచి వ్యక్తిగా నమోదయ్యేందుకు అనేకరకాల ప్రార్థనలు చేస్తారు. అందుకే వారు ‘‘ఒకవేళ దేవుడనేవాడే ఉంటే, నేను రోజూ గుడికి వెళ్తున్నట్లు, ప్రార్థనలు, జపాలు చేస్తున్నట్లు వాడికి తెలుస్తుంది. అది నిజమో, అబద్ధమో తేల్చేందుకు నేనున్నాను’’ అంటారు.

- ఇంకాఉంది....

🌹 🌹 🌹 🌹 🌹

23 Jan 2021